1 Samuel 17 - Intas Etipup

Nuarin tas alupas 17.

1 Eris wat asjapicnaig niji pak an nedoa u nup Isreel im lep u nup u Filistia mika eri aat ira ra ara, 4 et ehcohos pam a Colaiad um tas emda par ati nedoa ehelen tah. 12 Et abrai Tevit a etman mika yi ateghe ilpu etwan, et leh intas o Colaiad aien, 28 Et atuh Tevit a Elaiab. 30 Er imiapan yin ehele Saal. 32 Et asuptecnaig nohuun nemda o un aien. 38 Et eti leh nij va atimi aien, ja et asgeig irai Atua ahi, um atgei natimi actalactal iyehki. 55 Et asjaaicnaig Tevit a Saal.

¹ ERIS asjapicnaig niji pak an nedoa ura a nup u Filistia vai nedoa; eris asjapicnaig ara Soko, nuarin pece et ethi u nup u Juta; eris amen ara Ifes-tamim, juju an niblai Soko im Asika.

² Eris asjapicnaig a Saal im nup Isreel, um amen an niskanse Ila, um esyei ra mika eri ati nedoa vai nup u Filistia.

³ Eris aiji a nup u Filistia an nedoon is ethi an nahaijin is ethi; eris aiji a nup Isreel an nedoon is ethi an nahaijin is eche: is um eteuc niskanse juju an nibla ra.

⁴ Is ahes an nuarin amen iran u nup u Filistia a neucsupo esjilid is ethi, nidan Colaiad, nup u Cad, is nain neduei natimi im nahaijin nijinies iran.

⁵ Is adgaig incat bras aien; is aso yin aien irai kot eris ahod irai isel bras; is paunt is sevente eet nopoc u kot iyehki.

⁶ Is lep bras incetpoi eduon; is apos nuarin bras apalapal juju an niblai neuhlin.

⁷ Is idivaig nauincai u natimi ahod napelumai inceen mopul o un; is paunt is nain irai aiurn nidjan mopul o un: is atga an nuhup o un a natimi is ethi um apos nitai ahtaipup.

⁸ Is aiji aien, um ahlaig vai niji pak an nedoa u nup Isreel, um ika ehele ra, Eka a uri aijaua par apam, um esyei caua va nedoa? ek idim up u Filistia ainyak; eka ilpu aheca u Saal aijaua; ati natimi inyi ethi vai caua aijaua; etmu apame ehelek aien.

⁹ El et emda aien nati nedoa vaig vai nyak, um atgei nyak, ecrupu ilpu aheca unyimia aijama: ja el ek esjilid iran ainyak, um atgei yin, akupu ilpu aheca unyima aijaua, um aheca unyima.

¹⁰ Is ika a nup u Filistia iyehki, Ek imilaav niji pak au nedoa u nup Isreel ainyak an nadiat inig; ati natimi inyi ethi vai nyak, mika ecru ago nedoa jipe aijumrau.

¹¹ Eris wat atahaijeg intas iji ig u nup u Filistia iyehki a Saal im nup Isreel asega, eris imtitaig ara, is ehioehio alupas inliinmopora.

¹² Is etmai Tevit a nup Efrata iyehki u Bedlehem-juta, nidan Jese; is eet inhalav atamaig o un: eris ika natimi an nopan umoh u Saal, is efatimi aien.

¹³ Taijis apan ahtaij halav atamaig u Jese uhup, um apitac irai Saal alaig u nedoa: nidai ehtaij halav atamaig o un erahki taijis apan ahtaij alaig u nedoa, nan, Elaiab inmeto, im Abinatab jusei, um Simea nijihgan atimi.

¹⁴ Is harei a Tevit: taijis apitac irai Saal ahtaij uhup erahki.

¹⁵ Ja is udei Saal a Tevit, um adumoij par asgi siip u etman Bedlehem.

¹⁶ Is apam ubutpotet a nup Filistia iyehki an nuhialeg im lep an jupura, um ehcohos pam ira adiat is forte.

¹⁷ Is ika a Jese ehele Tevit inhal o un, Leh aiek vai ehtaij etwam pakinne ahen inigki inyi ohua ifa et ethi, im nareto iji igki et ten, um athut pan ehele ehtaij etwam an nuarin amen iran u atimi;

¹⁸ um apos jiis iji igki et ten imi natimi alupas irai dausant u ehtaij, um ato namen u ehtaij etwam, um leh nitai asjaaicnaig u ehtaij.

¹⁹ Eris amen an niskanse Ila a Saal, ira ehtaij, im lep nup Isreel asega, um ati nedoa vai nup u Filistia.

²⁰ Is atidai a Tevit an nuhihialeg, um udei siip iji ehki ehele natimi aminjinaig, um lucsei itai, um apan, is idivaig is asaig ehelen a Jese; is um yetpan an nuarin amen iran u atimi aien, eris wat apan a ilpu eucsupo, um esyei ra, um aunyauwaig va nedoa.

²¹ Eris idim esyei ra a nup Isreel im lep nup u Filistia, um ati inpak an nedoa et ethi an nuhup u inpak an nedoa et eche.

²² Is udei nitai iji ig eris apos a Tevit an nikmai atimi aminjinaig nitai iji ig eris apos, um athut pan an pak an nedoa, um apan, um aiheuc vai ehtaij etwan.

²³ Is wat tas ehele ehtaij aien, is idim apam a neucsupo esjilid iyehki, nup u Filistia, an maliyum Cad, nidan Colaiad; is ahes irai pak an nedoa u nup u Filistia aien, um tas intas iji ehki: is atahaijeg intas o un a Tevit.

²⁴ Eris wat ecet yin a nup Isreel asega, eris imtitaig alupas vai yin ara, um aha vai yin.

²⁵ Eris ika ehelen a nup Isreel, Na mun ecet natimi inigki aiek, ka oʼo? et mun ehcohos pam aien, mika yi imilaav nup Isreel: el et atgei yin tah natimi, etpu ahtai imi yin inpadiaig alupas a natimarid, um alupai yin inhalav atahig o un ehgan, um aiheuc vai ilpu atimi ehpan iran asega.

²⁶ Is tas a Tevit ehele atimi iji ig eris aiji ehelen ara, um ika, Eri ago inhe vai natimi inig etpu atgei nup u Filistia inigki aien, um atipagki nitai ehcamai vaig irai up Isreel? Et idivai di a nup u Filistia inig eris eti aperitome iran, mika yi imilaav niji pak an nedoa u Atua umoh?

²⁷ Eris asaig ehelen natimi is idivaig intas iji ehki, um ika, Inyi uce, uhpu ago irai natimi inig etpu atgei yin aien.

²⁸ Is wat tas ehele atimi aien, is atahaijeg a Elaiab etwan inmeto; is atavaitap a Elaiab vai Tevit; is ika aien, Na a uri aiek par apam igcaki? na mun udei siip eti elpat iji ehki ehele di aiek an namasacen? Ek ato ainyak mika et ijinies inliinmopom um has; na mun asuol sepam aiek mika an almoi nedoa.

²⁹ Is ika a Tevit, Ek mun ago inhe ainyak? Ek mun eti ispuk apam ainyak?

³⁰ Is udei yin aien um ahidaig pan yin ehelen tah is eche, um tas is idivaig intas iyehki: eris lep tas ehelen natimi is idivaig intas iji ehki.

³¹ Eris wat atahaijeg intas iji ig is asaig a Tevit, eris asuptecnaig an nuhup u Saal: is ika a Saal yi apam ehelen a Tevit.

³² Is ika a Tevit ehele Saal, Etmu jim auatialidi inliinmopon tah natimi vai yin; etpu apan a naheca unyum inigki, um ago nedoa vai nup u Filistia inigki.

³³ Is ika a Saal ehele Tevit, Na eti emda aiek napan vaig ehele nup u Filistia inigki, um ago nedoa vai yin: na idim tup takuras aiek, ja is eucsupo aien an takuras o un um imihum pam an nopan inig.

³⁴ Is ika a Tevit ehele Saal, Ak natimarid, kis aminjinaig siip u etmak ainyak, is ham laion is ethi, im lep beer is ethi, um atoraliak inhakli siip is ethi an pak irai siip:

³⁵ kis apitac yin ainyak, um auud yin, um atipagki inhakli siip an nipjineucsen: is wat atidai vai nyak aien, kis asjiraig numri ingeijin ainyak, um auud yin, um atgei yin.

³⁶ Is atgei laion im lep beer a naheca unyum inigki: etpu idivaig tah rau a nup Filistia inig eris eti aperitome iran, va nedo o un, nikavaig, et mun tas ijinies aien ehele pak an nedoa u Atua umoh.

³⁷ Is lep ika a Tevit, Ihova inig is imiatamaig nyak aien vai nikmai laion, im lep vai nikmai beer, etpu imiatamaig nyak aien vai nikmai nup u Filistia inigki. Is ika a Saal ehele Tevit, Apan aiek, etmu lep atau imi euc a Ihova.

³⁸ Is aso Tevit a Saal ira apelumai o un va nedoa, is adgaig imi yin incat bras aien, um aso yin irai kot inig eris ahod irai isel bras.

³⁹ Is arore nijihgan an nitai arore nauitoga o un a Tevit, um ika yi apan, ja is ehka; vaig inig nikavaig, is eti upyi ato nedo iran aien. Is lep ika a Tevit ehele Saal, Et ehka vai nyak napan vaig irai itai iji igki; kis eti upyi ato nedo iran ainyak. Is iknipagki iran a Tevit.

⁴⁰ Is leh niseuc o un an nikman aien, um ahilek nepaig is faiv an niskanse, um atohwaig an cat u natimi asgi siip is eteuc ehelen; is um uce is leh tup incat aien im namaka o un an nikman, um apan ubutpotet ehele nup u Filistia iyehki.

⁴¹ Is atga a nup u Filistia iyehki, um apan ubutpotet ehele Tevit; is uhup iran a natimi apos nitai ahtaipup.

⁴² Is wat easpan a nup u Filistia, um ecet Tevit, is imiafakahcil yin aien: is idim tup takuras aien: is ere nahpan, um eklim upene nesganimtan.

⁴³ Is ika a nup u Filistia ehele Tevit, Ek kuri ainyak, ka oʼo, mika an ham ehelek aiek, um apos iseuc im inhat? Is asan tas ah ai-jeg Tevit a nup u Filistia irai ilpu atmas o un.

⁴⁴ Is lep ika a nup u Filistia ehele Tevit, Apam ehelek aiek, ekpu alupai niji man an nauanohatag, im niji itai eklim edo irai pece nohum incara ainyak.

⁴⁵ Is um ika a Tevit ehele nup u Filistia, Na ham ehelek aiek, um apos nauitoga im inmopul, im nitai ahtaipup: ja ek ham ehelum ainyak an nidai Ihova emda acen, Atua irai pak an nedoa u nup Isreel, na mun tas ijinies vaig aiek.

⁴⁶ Etpu atcijaig pam euc a Ihova an nikmak an nadiat inig; ekpu auud euc ainyak, um atipagki nidjinum; ekpu alupai niji man an nauanohatag, im niji itai eklim edo irai pece aleg niji ohui an pak an nedoa u nup u Filistia incara ainyak an nadiat inig; mika eri ato natimi an nobohtan asega, mika et eteuc a Atua u nup Isreel.

⁴⁷ Erupu ato natimi asjapicnaig iji igki asega, mika et eti imiatamaig atimi a Ihova va nauitoga im inmopul: tup Ihova marom, mika etpu esjilid a di an nedoa inig, etpu atcijaig pam caua aien irai ikmama.

⁴⁸ Is wat atidai a nup u Filistia, um atga, um apam ubutpotet, mika yi ehtet, irai Tevit aien, is auroauro a Tevit, um athut pan an pak an nedoa, mika yi ehtet irai nup u Filistia aien.

⁴⁹ Is atise nikman an cat o un a Tevit, um ahyausei nepaig is ethi, um amaka iran, um asji nipjinimtai nup u Filistia; is um tau an nipjinimtan nepaig; is um eropse aien an nobohtan.

⁵⁰ Is idim uco, is esjilid irai nup u Filistia a Tevit vai namaka o un im nepaig, um asji nup u Filistia, um atgei yin; ja is ti nauitoga an nikmai Tevit.

⁵¹ Is um athut a Tevit, um aiji irai nup u Filistia, um leh nauitoga o un um ahyausei an cetpon, um atgei yin, um auud yi amud nidjinin iran. Eris wat almoi a nup Filistia mika is mas a neucsupo esjilid ura, eris ahapan ara.

⁵² Eris atidai a nup Isreel im nup u Juta, um aunyauwaig, um ahau nup u Filistia um yetpan u niskanse, um yetpan an neucse nathatahau u Ekron. Eris eropropse a nup u Filistia; eris auud ra an nefalaig et yetpan Seareem, im lep Cad, im lep Ekron.

⁵³ Eris ahes a nup Isreel u napitac vaig nup u Filistia, um atoraliak itai irai iji eom atga ura.

⁵⁴ Is leh nidjini nup u Filistia a Tevit, um imiapan Jerusalem; ja is ati nij va atimi o un an neom atga itap.

⁵⁵ Is wat ecet Tevit a Saal an napan o un par aubilid nup u Filistia, is ika aien ehele Abner natimi alupas an pak an nedoa, Ak Abner, et hal u di a intakuras inaico? Is ika a Abner, Ak natimarid, ek idim eti ato ainyak.

⁵⁶ Is ika a natimarid, Ahodaig aiek et hal u di a intakuras inaico.

⁵⁷ Is wat ahes a Tevit u natgei nup u Filistia, is leh yin a Abner, um imiapam yin an nuhup u Saal; is apos nidjini nup u Filistia an nikman aien.

⁵⁸ Is ika ehelen a Saal, Nai hal u di aiek, ak intakuras inigki? Is ika a Tevit, Ek hal ainyak u Jese nup u Bedlehem naheca unyum.