1 Samuel 16 - Intas Etipup

Nuarin tas alupas 16.

1 Et abraig Samuel a Atua mika yi apan Bedlehem aien, um ika yi ahlap an nitai ahlap. 6 Et acaiji intup naktaktai o un a Atua. 11 Et aspi Tevit aien. 15 Et abraig hal a Saal mika eri imiapam Tevit ehelen par ago eropse nesgai nitai has o un.

¹ IS ika a Ihova ehele Samuel, An taig aiek vai Saal um yetpan an nahopan? ek mun idim atcijaig yin ainyak, mika etpu eti lep atimarid irai up Isreel aien; atladwi narakei an nipat unyum aiek inyi ohua, um apan (ek abrai euc ainyak) ehele Jese nup u Bedlehem: ek mun alum natimarid imi nyak ainyak irai ilpu halav atamaig o un.

² Is ika a Samuel, Et ehka vai nyak napan vaig: el et atahaijeg a Saal, etpu atgei nyak aien. Is ika a Ihova, Lehpan kurimatau atahig aiek, um apos, um ika, Ek mun ham ainyak mika ki ahlap vai Ihova ainyak.

³ Namu lep imiacaij Jese u nitai ahlap aiek, ekpu lep asuptecnaig ehelum ainyak nitai inig napu ago aiek: namu aspi vai nyak aiek natimi inig ekpu aniv yin ehelum ainyak.

⁴ Is ago nitai inig a Samuel is asaig ehelen a Ihova, um yetpan Bedlehem. Eris eucjeucjeucaij a ilpu atimi alupas u inmaliyum iyehki an napam o un, um ika, Nai ham aiek an liinmopom igpa, ka oʼo?

⁵ Is ika aien, Nigpa marom nigki: ek ham ainyak mika ki ahlap vai Ihova: ago adicinadicin caua aijaua, um ahced nyak u nitai ahlap. Is ago adicinadicin Jese im ilpu halav atamaig o un aien, um imiacaij ra u nitai ahlap.

⁶ Eris wat ham ara, is alum Elaiab aien, um ika, Et idim inveijec nitai inig, nikavaig, et amen an nuhup u Ihova a natimi inig et mun ati yiu aien.

⁷ Ja is ika a Ihova ehele Samuel, Namu jim alum nesganimtan aiek, ka nijinies iran; ek eti merit vai yin ainyak: et eti almoi a Ihova et idivaig nalmoi u atimi; era almoi nesganimta atimi natimi, ja et almoi inliinmopora a Ihova.

⁸ Is lep ahlaig vai Abinatab a Jese, um ika yi atga an nuhup u Samuel. Is ika aien, Et lep eti merit vai natimi inig a Ihova.

⁹ Ja is aketo a Jese um ika yi atga an nuhup o un a Simea. Is ika aien, Et eti lep merit vai natimi inig a Ihova.

¹⁰ Is lep aketo a Jese um ika eri atga an nuhup u Samuel inhalav atamaig o un is seven. Is ika a Samuel ehele Jese, Et eti merit va atimi iji igki a Ihova.

¹¹ Is ika a Samuel ehele Jese, Ilpu halav atamaig unyum asega sji igki, ka oʼo? Is ika aien, Et eled inharei ache, ja et idim aminjinaig siip aien. Is ika a Samuel ehele Jese. Abraig tah aiek mika yi apan aien um imiapam yin: intumu eti ateucse akaija um hag, jam aitgaig napam o un.

¹² Is abraig tah aien mika yi apan, is imiapam yin aien. Is ere nahpan, um eklim upene nesganimtan; is upene nalmu yin vaig. Is ika a Ihova, Atidai aiek, um aspi yin: aien ap aigki.

¹³ Is leh narakei an nipat a Samuel am aspi yin an niblai ilpu etwan: is amen alupas ehele Tevit a Nesgai Ihova an nadiat iyehki um yetpan irai iji adiat. Is lep atidai a Samuel um apan Rema.

¹⁴ Ja is udei Saal a Nesgai Ihova, is lep auahas inliinmopon a nesgai nitai has is ahes ehele Ihova.

¹⁵ Eris ika ehele Saal a ilpu aheca o un, Et idim auahas inliinmopom a nesgai nitai has et ahes ehele Atua.

¹⁶ Ak natimarid unyima, asaig aiek ehele ilpu aheca unyum iji ig era amen an nuhup unyum ara, mika eri ahilek tah, et arapakau aien par atcei harp: etu wit yetpam iram nesgai nitai has et ahes ehele Atua, etpu atcei harp aien an nikman, ja napu cehcehe aiek.

¹⁷ Is ika a Saal ehele ilpu aheca o un, Ahilek aijaua an nopan inig natimi inyi ethi imtak, et ato aien um atcei harp, um aces upene ohrai itai iran, um imiapam yin ehelek.

¹⁸ Is tas is ethi irai ilpu aheca o un, um ika, Ek mun idim ecet ainyak inhalav atamaig et ethi u Jese, nup u Bedlehem, et ato aien um atcei harp, um aces upene ohrai itai iran: et atimi emda alupas aien, um atimi ago nedoa; et tas arapakau aien, um eklim upene nesganimtan aien; et lep amen ehelen a Ihova.

¹⁹ Va nitai inigki is abra atimi a Saal mika eri apan ehele Jese, um ika, Abraig pam ehelek Tevit aiek inhal unyum et asgi siip aien.

²⁰ Is leh togke is ethi a Jese, um atijai iran areto, im inhubej an nide vaine is ethi, im inhaklin nanin is ethi, um ika ehele Tevit inhal o un, eri imiapan ehele Saal.

²¹ Is yetpan ehele Saal a Tevit, um aheca o un: is aiyu alupas inliinmopon vai yin; is um atimi apos nij va atimi o un aien.

²² Is yetpan intas o Saal ehele Jese, um ika. Ek ugyi euc ainyak mika yi amen ehelek a Tevit; et upene inliinmopok ainyak vai yin.

²³ Is wat amen alupas an liinmopoi Saal a nesgai nitai has iyehki is ahes ehele Atua, is leh harp a Tevit um atcei an nikman, um aces upene ohraiitai: va nitai inigki is eropse inliinmopoi Saal, is lep cehcehe aien, is um udei yin a nesgai nitai has.