1 Samuel 14 - Intas Etipup

Nuarin tas alupas 14.

1 Et apan a Jonadan um auud nup u Filistia an nemda u Atua, ja et eti ato a etman, ka natimi ahlap, ka natimi. 15 Era auud jipe ra a nup u Filistia, et idim ika a Atua eri imtitaig alupas ara. 17 Et teloteloh pan ira ra a Saal, jam eti aitgaig intas o natimi ahlap. 21 Era atau iran a ilpu Hibru amen ehele nup u Filistia, im nup Isreel era atpuh ara, um aat ira ra. 24 Et atapnes nahau ra vaig a Saal vai intas aktit maumau o un. 32 Et acaiji atimi aien va eri jim caig inja irai itai ara. 35 Et actaig natau aien. 36 Et yetpan nitai asjaaicnaig irai Jonadan mika yi mas, ja era imiatamaig yin natimi. 47 Nemda u Saal im ilpu hal o un.

¹ AN nadiat is ethi, is ika a Jonadan inhal u Saal ehele intakuras iyehki is apos nij va atimi o un, Tu apan akaijau, um algauwaig, um yetpan an pak an nedoa u nup u Filistia an nahaijin eahki. Ja is eti asuptecnaig ehele etman aien.

² Is amen a Saal an nilpun pece acen Cibea, itlian nauincai pumcranet et eteuc Maicron: eris amen ehelen natimi is idivaig siks huntret;

³ im lep Ahaia, inhalav atamaig u Ahaitub, etwai Ikabot, inhal u Finehas, inhal u Ilai; is atimi ahlap u Ihova Sailo a Ahaia, is aso yin irai efot aien. Eris eti ato natimi mika is apan a Jonadan.

⁴ Is eteuc nij arig an nahaijin, im lep nij arig an nahaijin, juju an niblan nefalaig iji ehki, is ika a Jonadan yi algauwaig aien um yetpan an pak an nedoa u nup u Filistia iran: nidan is ethi Boses, im lep nidan is eche Sine.

⁵ Is eteuc neijin is ethi an nuarin inig et ahes narutu iran an nahaijin Mikmas, im neijin is eche an nuarin inig et ahes nuritoga iran an nahaijin Cibea.

⁶ Is ika a Jonadan ehele intakuras iyehki is apos nij va atimi o un, Tu apan akaijau, um algauwaig, um yetpan au pak an nedoa u atimi eti aperitome iji igki: kit etpu ago nauritai vai caijau a Ihova: et eti ehka vai Ihova par imiatamaig caija va atimi et ahinag, ka atimi et eti elpat.

⁷ Is ika ehelen a natimi apos nij va atimi o un, Ago nedo asega inig et eteuc an liinmopom: ahidaig pan aiek; ek idim amen ehelum ainyak et idivaig inmerit unyum.

⁸ Is ika a Jonadan, Intupu idim algauwaig akaijau, um yetpan ehele atimi iji ig; intupu lep ehcohos pan ehele ra akaijau.

⁹ El et uce intas ura eheleijau, Amen aijaurau um yetpan an napam unyima ehelemirau; intupu aiji akaijau an nuarin amen ujau, jam eti aridjipan ehele ra.

¹⁰ Ja el et uce intas ura, Aridjipam ehelema aijaurau; intupu aridjipan akaijau: etpu idim atcijaig pam ra eheleijau a Ihova: etpu itai asjaaicnaig imi caijau nitai inigki.

¹¹ Erus ehcohos pan ehele inpak an nedoa u nup u Filistia arau ero: eris ika a nup u Filistia, Almoi, era ahes irai mai tan iji ig a ilpu Hibru eris atpuh iran ara.

¹² Eris tas ehele Jonadan im natimi apos nij va atimi o un natimi an pak an nedoa, um ika, Aridjipam ehelema aijaurau; ecrupu ehvaig tah nitai ehelemirau aijama. Is ika a Jonadan ehele natimi apos nij va atimi o un, Apitac nyak aiek: et idim atcijaig pam ra ehele nup Isreel a Ihova.

¹³ Is ataprau a Jonadan, is apitac yin a natimi apos nij va atimi o un: eris eropse an nuhup u Jonadan ara; is apitac yin a natimi apos nij va atimi o un, um atgei ra.

¹⁴ Is idivaig natimi is twente natgei atimi uhup iyehki, is ago a Jonadan im natimi apos nij va atimi o un, an nuarin nobohtan apapa pan nahaijin ekir, eris acujitai irai kurimatau is ero.

¹⁵ Is eteuc neucjeucjeucaij irai ilpu eucsupo, im ilpu atimi anliin pece, im natimi asega: eris lep eucjeucjeucaij natimi an pak an nedoa, im natimi atoraliak itai; is omoi nobohtan: is idim alupas neucjeucjeucaij o un.

¹⁶ Eris easpan a ilpu atimi asjeucjinaig itai u Saal Cibea an pece Benjamin, um almoi; eris idim tup tiih pan natimi is ahinag; eris eti atumop ara um auud jipe ra.

¹⁷ Is ika a Saal ehele atimi amen ehelen, Esvi atimi aijaua, um ato ra sji ig eris udei caija ara. Eris wat esvi atimi ara, erus idim ti a Jonadan im natimi apos nij va atimi o un.

¹⁸ Is ika a Saal ehele Ahaia, Imiapam nelcau u Atua igcaki aiek, Is idim amen nelcau u Atua ehele nup Isreel an nadiat iyehki.

¹⁹ Is wat tas ehele natimi ahlap a Saal, is eti atumop nohran nedoa u nup u Filistia, jam auata alupas: is ika a Saal ehele natimi ahlap, Atise nikmam aiek.

²⁰ Is asjapicnaig atimi asega a Saal eris amen ehelen ara um yetpan an nedoa, um almoi; ja eris auud jipe ra asega ara; is alupas acen natgei atimi iyehki.

²¹ Im lep inig, ilpu Hibru iji ig eris upyi hup ara um amen ehele nup u Filistia, eris ahes anliin pece ara marehed mihtag, um ahced ra um yetpan an pak an nedoa; eris idim adumoij pan ara mika eri atau pan nup Isreel iji ig ara eris amen ehele Saal im Jonadan ara.

²² Im lep nup Isreel asega eris atpuh ara an nedoon Ifreem, eris wat atahaijeg ara mika eris aha a nup u Filistia, eris idim ahau emda ra ara an nedoa.

²³ Is idim uce nimiatamaig nup Isreel u Ihova an nadiat iyehki: is yetpan irai Bed-even nedoa.

²⁴ Eris ohocred a nup Isreel an nadiat iyehki: is idim tas emda va atimi a Saal, um ika, Etmu ahlaijaig a natimi inig et caig tah nitai caig aien um yetpan an jupura, mika ki aru nedo o ilpu atimi tak atimi irak ainyak. Is eti caig tah nitai caig tah natimi.

²⁵ Eris apan a nup urai pece asega an nuarin nesei is ethi; is amen hune an nobohtan.

²⁶ Ja eris wat apan anliin nuarin nesei natimi, is ahtatise hune; ja is eti caig tah natimi: eris imtitaig intas emda iyehki natimi.

²⁷ Ja is wat tas emda va atimi a etman, is eti ato a Jonadan: va nitai inigki is adai nilpun niseuc iyehki aien an nikman, um ahtaijuli irai hunekom, um caig; ja is par lah nesganimtan.

²⁸ Ja is tas ehelen a natimi is ethi, um ika, Et mun tas emda va atimi a etmam, um ika, Etmu ahlaijaig a natimi inig et caig tah nitai caig aien an nadiat inigki. Eris idim arici natimi.

²⁹ Is um ika a Jonadan, Et mun imiedohalav atimi a etmak: almoi aiek, et idim lah nesganimtak ainyak vai hune inig ek mun caig tintin ainyak.

³⁰ Inyi idim uce, el era caig upene natimi an nadiat inig irai itai caig iji ig u ilpu atimi tak atimi ira ra, era mun ecetai ara; el eh idim atcei nup u Filistia et ahinag acen an nopan inig.

³¹ Eris atgei nup u Filistia ara an nadiat iyehki um ahes Mikmas um yetpan Ajalon: eris arici alupas natimi.

³² Eris auroauro natimi um arop irai iji itai, um lucsei siip, im kurimatau, im hakli kurimatau, um atgei ra an nobohtan: eris caig nohui itai natimi im inja ira ra.

³³ Eris asuptecnaig ehele Saal ara, um ika, Almoi aiek, era ago nedo has vai Ihova natimi, nikavalg, era caig nohui itai ara im inja ira ra. Is ika aien. Eka mun ago nedo maumau aijaua: atcelcaig pam inhat alupas ehelek aijaua an nopan inig.

³⁴ Is ika a Saal ehele ilpu atimi alupas, Imiterimterim caua aijaua ehele atimi, um ika ehele ra, Imiapam ehelek natimi asega kurimatau o un tah, im siip o un tah, um atgei igcaki, um caig; jam jim ago nedo has vai Ihova aijaua, um caig nohui itai im inja ira ra. Eris imiapan ehelen natimi asega kurimatau o un tah an nikman an nepig iyehki, um atgei ra eahki.

³⁵ Is actaig nefata ehele Ihova a Saal: nefata uhup iyehki is actaig aien ehele Ihova.

³⁶ Is ika a Saal, Intumu asuol akaija um apitac nup u Filistia an nepig, um auahas ra, um yetpan an nuhialeg, um jim udei natimi inyi ethi ira ra. Eris ika ara, Ago nedo inig aiek et upene iram, Is ika a natimi ahlap, Intumu asjapicnaig igcaki akaija ehele Atua.

³⁷ Is ahodaig Atua a Saal, um ika, Ekpu asuol ainyak um apitac nup u Filistia, ka oʼo? napu atcijaig pam ra aiek ehele nup Isreel, ka oʼo? Ja is eti tas ehelen aien an nadiat iyehki.

³⁸ Is ika a Saal, Akumu ayihio aijaua ilpu atimi alupas asega an pece: um ato, um almoi nedo has uja inpig.

³⁹ Ek idim tas inveijec ainyak an nuhup u Ihova, et imiatamaig nup Isreel aien, mika el et eteuc irai Jonadan inhal unyak, etpu idim mas aien, Ja is eti tas ehelen tah natimi ira atimi asega.

⁴⁰ Is ika aien ehele nup Isreel asega, Akumu aiji aijaua an na-haijin inyi ethi; ecrupu aiji aijumrau, ainyak im Jonadan inhal unyak, an nahaijin inyi eche. Eris ika natimi ehele Saal, Ago nedo inig aiek et upene iram.

⁴¹ Va nitai inig is ika a Saal ehele Ihova Atua u nup Isreel, Asjaaicnaig atoh aiek ira atimi ago nedo has. Is tau irai Saal im Jonadan: ja is eti tau ira atimi.

⁴² Is ika a Saal, Uhmu ati nitai asjaaicnaig vai nyak im Jonadan inhal unyak. Is um tau irai Jonadan.

⁴³ Is ika a Saal ehele Jonadan, Asuptecnaig ehelek nedo unyum aiek, Is asuptecnaig a Jonadan ehelen, um ika, Ek mun ago nitai inig ache ainyak, ek mun caig nuari hune haklin an nilpun niseuc an nikmak ainyak, er idim asaig mika ekmu mas ainyak.

⁴⁴ Is ika a Saal, Etmu idim aru alupas a Atua: an idim mas aiek, ak Jonadan.

⁴⁵ Eris ika natimi ehele Saal, Inyi idim eti mas a Jonadan, aien aigki et mun ago nimiatamaig alupas vai nup Isreel aien, Inyi idim eti uce: ecra idim tas inveijec aijama an nuhup u Ihova, inyi eti etjose an nobohtan tah numri nidjinin inyi ethi; et mun ehrauritai ehele Atua aien an nadiat inigki. Is idim uco, eris imiaras Jonadan natimi, mika is eti mas aien.

⁴⁶ Is aridjipan a Saal um eti apitac nup u Filistia: eris apan an nuarin ura a nup u Filistia.

⁴⁷ Is idim uco, is leh natimi alupas u nup Isreel a Saal, um ago nedoa vai ilpu atimi tak atimi iran asega marehed mihtag, vai nup u Moab, im lep vai nup Amon, im lep vai nup Itom, im lep vai ilpu atimarid u nup u Soba, im lep vai nup u Filistia: is esjilid ira ra aien irai iji uarin asega is apan iran aien.

⁴⁸ Is asjapicnaig inpak an nedoa aien um auud nup Amalek, um imiatamaig nup Isreel vai nikma atimi iji ig eris atoraliak itai ura.

⁴⁹ Ehtijis halav atamaig u Saal ahtaij, nan, Jonadan, im Isuai, im Melki-sua: Nidai ohwat halav atahig o un eraigko; nidai inmeto, nan, Mirab, nidai inharei, nan, Maikal:

⁵⁰ nidai ehgai Saal, nan, Ahinoam, inhalav atahig u Ahimeas: nidai natimi alupas u ilpu eucsupo o un Abner, inhal u Ner, etwai etmai Saal.

⁵¹ Erus ohwat halav atamaig u Ahai el, nan, Kis etmai Saal, im Ner etmai Abner;

⁵² Is eteuc nedoa alupas vai nup u Filistia an numoh asega u Saal: is wat ecet tah natimi emda, ka tah natimi esjilid an nedoa a Saal, is leh yin aien imi yin.