1 Samuel 13 - Intas Etipup

Nuarin tas alupas 13.

1 Ilpu atimi ehtai ra u Saal. 3 Et auud ilpu eucsupo u nup u Filistia Ciba a Jonadan, et ahlaig vai ilpu Hibru a Saal mika eri aat irai up u Filistia. 5 Inpak an nedoa alupas u nup u Filistia. 6 Nohocred u nup Isreel. 8 Et wat auatialidi a Saal par aitgaig Samuel, et ahlap aien. 11 Et acaiji yin a Samuel. 17 Et atoraliak itai nahaiji pak an nedoa et dri u nup u Filistia. 19 Nedo o nup u Filistia nigki, par atapnes ilpu atimi auud pas asega an pece Isreel.

¹ IS atimarid a Saal an mesese is ethi; is wat atimarid u nup Isreel aien an mesese is ero,

² is ehtai nup Isreel is dri dausant (3,000) aien; eris amen natimi is tu dausant (2,000) ira ra ehele Saal Mikmas im lolan nedoon Bedel; eris amen natimi is wun dausant (1,000) ehele Jonadan Cibea, an pece Benjamin: is abra atimi asega is eche aien mika eri apau irai imnim ura ara.

³ Is auud inpak an nedoa u nup u Filistia a Jonadan eris amen Ciba ara, eris atahaijeg vaig a nup u Filistia. Is ika a Saal eri ahlai intoho irai iji pece asega, um ika, Erumu ahgei a ilpu Hibru igcapan.

⁴ Eris atahaijeg a nup Isreel asega, mika is auud inpak an nedoa u nup u Filistia a Saal, im lep inig, eris amcel vai nup Isreel a nup u Filistia. Eris asjapicnaig natimi mika eri apitac Saal um yetpan Cilcal.

⁵ Eris asjapicnaig a nup u Filistia mika eri ati nedoa vai nup Isreel ara; is dirte dausant (30,000) niji jariot ura, um siks dausant (6,000) atimi ateuc irai hors, um ahinag acen intup atimi, is idivaig nauanavig an nomunjap: eris aridjipan ara um amen Mikmas, an nahaijin Bed-even an ridjai o un.

⁶ Eris wat almoi natimi mika is ehka namen ura, (eris idim ehcerucai ra,) eris atpuh natimi irai mai tan, im lep irai uarin ehka an nesei, im lep irai mai ij, im lep irai uarin ijinies, im lep irai ehpaiitai.

⁷ Eris algaunyi nofowai Jortan nahaiji ilpu Hibru, um yetpan an pece Cat im inpece Cileat. Ja is amen Cilcal a Saal; eris apitac yin natimi asega um eucjeucjeucaij.

⁸ Is aitgaig Samuel aien ira adiat is seven, is idivaig nopan is aniv a Samuel: ja is eti ham Cilcal a Samuel; eris udei yin natimi um terimterim.

⁹ Is ika a Saal, Imiehio ehelek nitai ahlap atnamud im niji itai ahlap par asa nigpa. Is ahlap an nitai ahlap atnamud aien.

¹⁰ Is wat ahlap ehni an nitai ahlap atnamud, is idim ham a Samuel; is apan a Saal um aubilid yin, um aiheuc vai yin.

¹¹ Is ika a Samuel, Na mun ago inhe aiek? Is ika a Saal, Ek mun almoi ainyak mika eris melga irak natimi, im lep inig, na mun eti ham aiek an nopan iyehki eris upyi hup um aniv, im lep inig, eris asjapicnaig a nup u Filistia Mikmas;

¹² va nitai inig ek mun ika ainyak, Erupu asuol sepam ehelek Cilcal a nup u Filistia an nopan inig, ja ek mun eti fi alaigaheni vai Ihova ainyak: ek mun eriss irak ainyak, um ahlap an nitai ahlap atnamud.

¹³ Is ika ehele Saal a Samuel, Na mun ago nedo ahnag aiek: na mun eti imiaiji intas alep u Ihova Atua unyum aiek, is asaig ehelum aien; el et uce, etpu ati aktit natimi alupas unyum an pece Isreel a Ihova au nopan inig um yetpan irai iji mesese.

¹⁴ Ja inyi idim eti amen natimi alupas unyum: et mun ahilek natimi a Ihova et tup ethi ache inliinmoporau arau; et mun asaig a Ihova vai yin mika yi atimarid u ilpu atimi o un aien, vaig inig nikavaig, na mun eti imiaiji intas aiek is asaig ehelum a Ihova.

¹⁵ It atidai a Samuel um ahes Cilcal, um han Cibea an pece Benjamin. Is esvi atimi ehelen a Saal, eris idivaig siks huntret natimi.

¹⁶ Is amen Cibea an pece Benjamin a Saal, im Jonadan inhal o un, im natimi iji ig eris atau imi yin ara: ja eris amen Mikmas a nup u Filistia.

¹⁷ Eris ahes an nuarin amen iran u nup u Filistia a ilpu atimi atoraliak itai, is dri inpak an nedoa ura: is apan inpak an nedoa is ethi an nefalaig inig et alaig apan Ofra, um yetpan au pece Sual:

¹⁸ is apan inpak an nedoa is eche an nefalaig et yetpan Bed-horon: is lep apan inpak an nedoa is eche an nefalaig et yetpan an nilpun pece, et ubutpotet an niskanse Siboem au namasacen.

¹⁹ Eris eti ecet tah natimi auud pas an pece Isreel asega: eris ika a nup u Filistia, Intumu iknipagki ra akaija, va eri jim ago auitoga im mopul uri nedoa a ilpu Hibru:

²⁰ ja eris apan a nup Isreel irai uarin iji ig eris amen iran a nup u Filistia mika yi atineijin nirak hat o un tah ra asega, im inpas, im pik.

²¹ Ja is bug niji pik ura, im niji irak hat ura, im niji itai ahre itai, im niji pas, im niji mopul.

²² Is idim uco, eris eti ecetai tah nauitoga, ka tah inmopul, an nikman tah ira atimi iji ig eris atau imi Saal im Jonadan, au nadiat inig eris ati nedoa iran: ja eris ecetai ehele Saal im Jonadan inhal o un ache.

²³ Is apan inpak an nedoa u nup u Filistia an nefalaig ahes u Mikmas.