1 Samuel 12 - Intas Etipup

Nuarin tas alupas 12.

1 Et asuptecnaig nedo inveijec o un a Samuel. 6 Et acaiji atimi aien va nedo ura par eti imiehva Ihova. 16 Et ika aien eri imtitaig alupas ara van munuka an nopan asjapicnaig ohwai itai. 20 Et ago eropse inliinmopora aien va nedo aiheuc u Atua.

¹ IS ika a Samuel ehele nup Isreel asega, Ek idim atahaijeg intas asega unyimia ainyak akis asaig ehelek aijaua, ek mun ati natimarid ehelemia ainyak.

² Et idim atga a natimarid an nuhup unyimia an nopan inig: ek mun efatimi ainyak um ahleuco; im lep inig, erau amen ehelemia ahwat halav atamaig unyak: kis idim atga ainyak an nuhup unyimia an halav unyak um imihum pam an nadiat inigki.

³ Ainyak ap aigki: akumu asuptecnaig nedo unyak aijaua an nuhup u Ihova, im lep an nuhup u natimi inig is ati yin aien: kis leh kurimatau u di ainyak? kis leh togke u di ainyak? kis ago nedo efaifa vai di ainyak? kis ehcerucai di ainyak? kis leh nimtan ehele di ainyak mika ki adahpoi nesganimtak vai yin ainyak? inki aru inigki ainyak.

⁴ Eris ika ara, As eti ago nedo efaifa vai cama aiek, um eti ehcerucai cama; as eti leh tah nitai irai nikmai tah natimi aiek.

⁵ Is ika ehele ra aien, Et idim ato a Ihova an nadiat inigki, et idim ato a natimi inig is ati yin aien, mika eka mun eti ecetai tah nitai unyimia an nikmak aijaua. Eris ika ara, Et idim ato a Ihova.

⁶ Is ika a Samuel ehele atimi, Et ato a Ihova inig is ati Moses im Eron aien, um iknipagki ilpu retpomia an pece Ijipt.

⁷ Va nitai inigki akumu aiji aijaua, mika ki tas ehelemia ainyak an nuhup u Ihova va niji auritai upene asega iji ig u Ihova, is ago aien vai caua, im lep vai ilpu retpomia.

⁸ Is wat han Ijipt a Jekob, eris wat ahlaig vai Ihova a ilpu retpomia, is ati Moses im Eron a Ihova, erus iknipagki ilpu retpomia, an pece Ijipt arau, um ika eri amen an nuarin inigki.

⁹ Eris wat ahnag irai Ihova Atua ura ara, is atcijai ra aien ehele Sisera natimi alupas u inpak an nedoa u nup u Hesor, im lep ehele nup u Filistia, im lep ehele natimarid u nup u Moab, eris ati nedoa vai ra.

¹⁰ Eris ahlaig vai Ihova ara, um ika, Ecra mun ago nedo has aijama; ecra mun udei Ihova aijama, um aheca u ilpu atmas um ago niji atmasimai: ja namu imiatamaig cama aiek vai nikmai ilpu atimi tak atimi irama, ecrupu aheca unyum aijama.

¹¹ Is ikni Jerub-beal, im Bitan, im Jefda, im Samuel a Ihova, um imiatamaig caua vai nikmai ilpu atimi tak atimi iramia marehed mihtag, akis amen upene aijaua.

¹² Ja akis wat ecetai aijaua mika is ati nedoa vai caua a Nehas natimarid u nup Amon, akis ika aijaua ehelek, Oʼo; ja inyi esjilid irama a tah natimarid: is wat atimarid unyimia a Ihova Atua unyimia.

¹³ Va nitai inigki akumu alum natimarid inig aijaua eka mun ati yin aijaua, um merit vai yin! et idim ati natimarid ehelemia a Ihova.

¹⁴ El eka imiimtacimtac Ihova aijaua, um aheca o un, um atahaijeg intas o un, um eti imipalea intas alep u Ihova, akupu umumoh aijaua, im lep natimarid inig et esjilid iramia, um apitac irai Ihova Atua unyimia:

¹⁵ ja el eka eti atahaijeg intas o Ihova aijaua, jam imipalea intas alep u Ihova, etpu imiham nedoarimia nikmai Ihova, et idivaig is imiham nedoari ilpu retpomia aien.

¹⁶ Va nitai inigki akumu aiji aijaua, um almoi nitai alupas inigki, etpu ago a Ihova an nuhup u nesganimtamia.

¹⁷ Et idim nopan nasjapicnaig hwiit inpig, ekpu ahlaig vai Ihova ainyak, etpu ika aien yi eteuc inmunuka im incopda; mika aki ato aijaua um almoi, mika et alupas nedo has inig unyimia, akis ago aijaua an nuhup u Ihova, par ugyi yin vai natimarid imi caua.

¹⁸ Is um ahlaig vai Ihova a Samuel; is um ika a Ihova yi eteuc inmunuka, ja is par ehe an nadiat iyehki: eris imtitaig alupas Ihova im Samuel natimi asega.

¹⁹ Eris ika ehele Samuel natimi asega, Namu alaigaheni vai Ihova Atua unyum aiek vai cama ilpu aheca unyum, vai ecri jim emesmas aijama: ecra mun ehcilpun nedo has unyima asega an nitai has inigki, nikavaig, par ugyi vai natimarid imi cama.

²⁰ Is ika ehele atimi a Samuel, Akumu jim imtitaig aijaua: eka mun ago nedo has asega inigki aijaua: jam jim melga aijaua par apitac irai Ihova, jam aheca u Ihova aijaua an liinmopomia asega;

²¹ jim melga aijaua, um jim alaigaheni vai takitai aijaua, et eti upene nitai iji ig, et ehka vai ra nimiatamaig caua vaig; et idim takitai nitai iji igki.

²² Inyi idim eti udei ilpu atimi o un a Ihova va nidan alupas: is upene irai Ihova par ika aki atimi o un aijaua.

²³ Im lep inig, et ehka vai nyak nago vaig nedo has inigki vai Ihova, par eti alaigaheni vai caua: ja ekpu esege imi caua ainyak nedo upene im nedo atoh:

²⁴ akumu imiimtacimtac Ihova ache aijaua, um aheca o un, um ago nedo inveijec an liinmopomia asega: akumu idim aktaktai niji itai alupas iji ig is ago vai caua aien.

²⁵ Ja el eka aketo aijaua um ago nedo has, uhpu auahas caua; maiya, aijaua im lep natimarid unyimia.