1 Samuel 11 - Intas Etipup

Nuarin tas alupas 11.

1 Et ika a Nehas eri ago nitai er ehcamai vaig a nup u Jebes-cileat. 4 Era abra atimi mika eri apan um asuptecnaig ehele Saal, et imiatamai ra aien. 12 Era ago emda Saal natimi vaig, era aketo ara, um ati nelcau imi yin.

¹ AN nopan iyehki is apam a Nehas natimarid u nup Amon, um amen arehed irai Jebes-cileat: eris ika a nup u Jebes asega ehele Nehas, Namu asan tas etipup ehelema aiek, ecrupu aheca unyum aijama.

² Is ika ehele ra a Nehas natimarid u nup Amon, Ekpu asan tas etipup ehelemia ainyak, el eh ago nitai inigki, Inki ucjaliek inmatan nesganimtamia asega ainyak, um ika, Et itai ehcamai vaig va nup Isreel asega nitai inig.

³ Eris ika ehelen a ilpu atimi alupas u nup u Jebes, Udei cama aiek ira adiat inyi seven, mika ecrupu abra atimi aijama mika eri apan irai iji uari pece Isreel asega: el et eti eteuc tah natimi par imiatamaig cama, ecrupu apam ehelum itac aijama.

⁴ Eris apan inmaliyum Cibea u Saal a ilpu atimi eris abrai ra, um asan tas iji ehki irai tikga atimi: eris ehtigtaig ijinies natimi asega.

⁵ Ja is ahes uman a Saal um apitac kurimatau o un is ero; is ika a Saal, Et echamecha va atimi era ehtigtaig ara? Eris asuptecnaig ehelen ara intas iji ehki u nup u Jebes.

⁶ Is wat atahaijeg intas iji ehki a Saal, is yetpan iran a Nesgai Atua; is ere alupas nedemda o un.

⁷ Is leh kurimatau eraigko o un is ero aien, um attai ehni, um abra atimi mika eri imiterimterim niji uarin asega ara irai iji uari pece Isreel asega, um ika. Aien et eti ham aien, um apitac Saal im Samuel, uhpu ago inyi uce irai kurimatau o un. Is yetpan ira atimi nimtitai Ihova, eris apan ara, is um tup ethi ache inliinmopora ara.

⁸ Is wat esvi ra aien Bisek, eris dri huntret dausant (300,000) a nup Isreel, eris lep dirte dausant (30,000) a nup u Juta.

⁹ Eris ika ara ehele ilpu atimi eris abrai ra mika eri apam, Etmu uce intas unyimia ehele nup u Jebes-cileat, Etu wit adiatadiat imraig uhmu imiatamaig caua. Eris apan a ilpu atimi iji ehki, um asuptecnaig intas iji ig ehele nupu Jebes; eris imiacitak ara.

¹⁰ Va nitai inigki eris ika a nup u Jebes ehele nup Amon, Ecrupu apam ehelemia itac imraig aijama, akupu ago nedo asega inig aijaua vai cama et upene iramia nago vaig.

¹¹ Is upyi hup a Saal um ahaig atimi an pak an nedoa is dri; is wat lahlah an tak apnyin, eris apan ara an niblan nuarin amen u ilpu eucsupo an nathut u nadiat, um atgei nup Amon um yetpan an nadiatadiat: eris imiterimterim ra sji igki asega eris eled, va nitai inigki eris eti amen natimi is ero an nuarin is ethi.

¹² Eris ika natimi ehele Samuel, Is asaig a di, um ika, Inyi eti atimarid uja a Saal? imiapam atimi iji ehki mika ti atgei ra akaija.

¹³ Is um ika a Saal, Uhmu jim atgei tah natimi inpig: vaig inig nikavaig, et imiatamaig nup Isreel inpig a Ihova.

¹⁴ Is um ika a Samuel ehele atimi, Intumu idim apan Cilcal akaija, um aketo um ati nelcau eahki.

¹⁵ Eris apan Cilcal natimi asega; eris lep ati Saal Cilcal an nuhup u Ihova, mika yi atimarid aien; eris ahlap irai iji itai ahlap naaurinig ara an nuhup u Ihova; Is imiacitak alupas eahki a Saal im nup Isreel asega.