1 Samuel 10 - Intas Etipup

Nuarin tas alupas 10.

1 Et aspi Saal a Samuel. 2 Et ago emda yin aien va nitai asjaaicnaig et dri et ika aien yi ecetai. 9 Et eche inliinmopoi Saal, et acesaces nohranitai aien. 14 Et ateri ehele etwai etman aien intas va nelcau. 17 Eh ehtai Saal Mispi an nitai asjaaicnaig. 26 Et eche inmerit u atimi vai yin.

¹ Is leh inhubej haklin an narakei a Samuel, um atladwi an nidjinin, um aijumnyi yin, um ika, Nesgan tas nigki, et mun ati euc a Ihova mika an atimi alupas u ilpu atimi o un aiek.

² Nau wit udei nyak aiek an nadiat inig, napu ecet natimi inyi ero aiek Selsa u netheso u Rejel an natcai van pece Benjamin; arupu ika ehelum arau, Eh mun ecetai niji togke as apan aiek par ahilek: im lep inig, et eti aktaktai niji togke a etmam, ja et taigtaig aien vai euc, um ika, Ekpu ago inhe ainyak vai inhal unyak?

³ Napu ahes eahki aiek um yetpan an nuarin marara Tebor, ehtaijpu ehtet iram natimi inyi eseij an naridjipan Bedel mika taijpu alaigaheni vai Atua ahtaij, etpu apos hakli nanin inyi eseij tah ehtaij; etpu lep apos nareto inyi eseij tah ehtaij; etpu lep apos inhubej an nide vaine tah ehtaij:

⁴ taijpu aiheuc vai euc ahtaij, um ahtai imi euc nareto inyi ero; napu leh aiek irai ikmai ehtaij.

⁵ Etu wit ti pan itac nitai iji igki napu yetpan an nedoon u Atua inig aiek, era amen iran a ilpu eucsupo u nup u Filistia: nau wit yetpan an maliyum iyehki aiek, napu ehtet irai inpak irai ilpu profeta nahes vaig an nuarin ijinies um asuol, etpu uhup ira ra saltere, im nelcau, im natarau, im harp; eri acesaces nohranitai ara:

⁶ etpu yetpam iram a Nesgai Ihova, napu ehracesaces nohranitai ehele ra aiek, napu lep atimi et eche aiek.

⁷ Etu wit yetpam vai euc niji itai asjaaicnaig iji ig, namu ago nedo inig aiek etpu upene iram; etpu idim amen ehelum a Ihova.

⁸ Napu uhup irak um asuol Cilcal; ekpu asuol ainyak ehelum mika ki ahlap irai iji itai ahlap atnamud ainyak, um lep atgei niji itai eklim edo irai pece par asa nigpa: namu aitgaig nyak aiek ira adiat inyi seven, um yetpan an napam unyak ehelum, mika ki asuptecnaig ehelum ainyak nedo inig napu ago aiek.

⁹ Is wat atidjin aien mika yi udei Samuel, is alupai yin inliinmopon is eche a Atua: is yetpan iran niji itai asjaaicnaig asega iji ig an nadiat iyehki.

¹⁰ Erus wat yetpan eahki arau an nedoon u Atua, eris ehtet iran inpak irai ilpu profeta; is yetpan iran a Nesgai Atua, is ehracesaces nohranitai ehele ra aien.

¹¹ Eris wat ecet yin natimi asega iji ig eris upyi ato yin ara, mika is ehracesaces nohranitai ehele ilpu profeta aien, eris tas jipe ara, um ika, Et echamecha vai inhal u Kis? Et amen a Saal ehele ilpu profeta, ka oʼo?

¹² Ja is tas tah an nuarin iyehki, um ika, Et etmara a di? Va nitai inig eris tas ecsipece ara, um ika, Et amen a Saal ehele ilpu profeta, ka oʼo?

¹³ Is wat acesaces ehni nohranitai, is yetpan an nuarin ijinies aien.

¹⁴ Is tas a etwai etmai Saal ehelen, im lep ehele naheca o un, um ika, Erus apan eda aijaurau? Is ika aien, Par ahilek niji togke: ja ecrus wat eti ecetai an tah anuarin aijumrau, ecrus apan ehele Samuel aijumrau.

¹⁵ Is ika a etwai etmai Saal, Et idim upene mika an asuptecnaig ehelek intas is asaig ehelemirau a Samuel.

¹⁶ Is ika ehele etwai etman a Saal, Is idim asuptecnaig ehelumrau aien, mika eris ecetai niji togke. Ja is eti asuptecnaig ehelen aien tah intas va nelcau is asaig ehelen a Samuel.

¹⁷ Is asjapicnaig atimi a Samuel ehele Ihova Mispi;

¹⁸ is ika aien ehele nup Isreel, Et ika a Ihova Atua u nup Isreel, Kis lucsei pam nup Isreel ainyak an pece Ijipt, um imiatamaig caua vai nikmai nup Ijipt, im lep vai nikmai nup urai iji elcau asega irai ra sji igki eris ehcerucai caua ara:

¹⁹ ja eka mun adwo Atua unyimia aijaua an nadiat inigki, aien aigko is imiatamaig caua va niji ohocred asega unyimia, im niji ehcerucai caua unyimia; eka mun asaig ehelen aijaua, um ika, Oʼo, ja namu ati tah aiek mika yi atimarid unyima aien. Va nitai inigki akumu apam aijaua an nuhup u Ihova, et idivaig irai iji elcau unyimia im niji dausant atimi iramia.

²⁰ Is wat ika a Samuel eri apan ubutpotet a nup urai iji elcau u nup Isreel asega, eris ehtai nup an nelcau u Benjamin.

²¹ Is wat ika a Samuel eri apan ubutpotet a ilpu eteuc u nup an nelcau u Benjamin eris ehtai neteuc u Metrai, eris lep ehtai Saal inhal u Kis: ja eris wat ahilek yin ara, eris eti ecet yin.

²² Va nitai inigki eris aketo ara um ahodaig Ihova, um ika, Etpu apan eahki a natimi iyehki, ka oʼo? Is ika a Ihova, Et idim atpuh an naga aien.

²³ Eris athut ara um leh yin eahki: is wat aiji aien ehele atimi, eris tau jai an neuhlin ache nidjini atimi asega.

²⁴ Is ika a Samuel ehele atimi asega, Alum yin aijaua is ati yin a Ihova, et eti eteuc tah ira atimi asega et idivai yin aien. Eris ahlaig ijinies natimi asega, um ika, Etmu umoh a natimarid um itu iran!

²⁵ Is asuptecnaig ehele atimi nedo atoh va nelcau a Samuel, um aged an nitaasviitai, um atijai an nuhup u Ihova. Is adcijaig atimi asega a Samuel, mika eri apan irai imnim ura ara asega, athi um athi ehni.

²⁶ Is apan an nimnim o un Cibea a Saal; eris ahced yin inpak ira atimi, is atcei inliinmopora a Atua.

²⁷ Ja eris ika hal ilpu ihki atimi, Etpu evimiatamaig caija a natimi inig? Eris amcel vai yin ara, um eti leh pam tah naiheuc imi yin; ja is eti tas vaig aien.