1 Samuel 1 - Intas Etipup

Nuarin tas alupas 1.

1 Et alaigaheni an maliyum Sailo irai iji mesese a Elkana mapoi Livai is ethi, et ero ehnaa o un. 4 Et eti asvalav a Hanna, et auahas inliinmopon a Peninna, ja et aiheuc vai yin a Elkana. 9 Et ohocred a Hanna um ugyi Atua vai inhalav atamaig. 12 Et uhup a Ilai um acaiji yin, ja et par apitac aien um asan tas acis yi alwai yin. 19 Et wat apos Samuel a Hanna, et amen an nimnim o un aien um yetpan an natwa nided o un. 24 Et ati yin an nuhup u Ihova aien et idivaig intas upyi asaig o un.

¹ IS eteuc natimi is ethi Ramade-em-sofim an lolan nedoon Ifreem, nidan Elkana, inhal u Jeroham, is hal u Elaihu a Jeroham, is hal u Tohu a Elaihu, is hal u Suf a Tohu: is up Efrata aien:

² erus eteuc ahwat ehnaa o un is ero; nidan is ethi Hanna, im nidan is ethi Peninna: is asvalav a Peninna, ja is ti inhal u Hanna.

³ Is ahes an maliyum o un a natimi iyehki irai iji mesese, um apan Sailo, par alaigaheni um ahlap vai Ihova Atua emda acen. Erus atimi ahlap vai Ihova ahwat hal u Ilai eahki, nan, Hofnai im Finehas.

⁴ Is wat yetpan an nopan iyehki is ahlap iran a Elkana, is ahtai imi Peninna ehgan, im ilpu halav atamaig o un asega, im ilpu halav atahig o un asega, niji uarin nitai caig incara:

⁵ ja is ahtai imi Hanna nuarin esjilid aien; is aiyu inliinmopon aien vai Hanna: ja is ika a Ihova inyi eti asvalav aien.

⁶ Is ahinag intas auyat u intakata iyehki, par auahas inliinmopon, vaig inig nikavaig, is ika a Ihova inyi eti asvalav aien.

⁷ Is ago nedo inigki aien irai iji mesese, an napan o un an neom u Ihova; is auahas inliinmopon aien, is taig a Hanna, um eti hag.

⁸ Is ika ehelen a Elkana natamnyu un, Ak Hanna, na a uri aiek par taig? na a uri aiek par eti hag? na a uri aiek par ohocred inliinmopom? ek idim esjilid ainyak vai euc irai ilpu halav atamaig et ten.

⁹ Eris wat hag ara um umwig Sailo, is atidai a Hanna. Is ateuc a Ilai natimi ahlap an nitai ateuc is ethi u noboatau is ethi an neom u Ihova.

¹⁰ Is ohocred inliinmopoi Hanna, um alaigaheni vai Ihova, um taig alupas.

¹¹ Is asan tas aktit aien, um ika, Ak Ihova Atua emda acen, el et aespam nohocred u naheca atahig unyum inigki aiek, um imiehva nyak, um eti ahnag irai naheca atahig unyum inigki, jam alupai naheca atahig unyum inigki inhalav atamaig, ekpu alupai Ihova yin ainyak an numoh asega o un, eri eti ucsei numri nidjinin.

¹² Is wat alaigaheni opra aien an nuhup u Ihova, is almuktit nipjineucsen a Ilai.

¹³ Is tas an liinmopon ache a Hanna; is omomoi nipjineucsen aien, ja eris eti ahgei nohran: va nitai inigki is aktaktai a Ilai mika is ahnag va waina aien.

¹⁴ Is ika ehelen a Ilai, Napu ahnag va waina aiek um yetpan an nahopan? Udei waina unyum aiek.

¹⁵ Is tas a Hanna, um ika, Oʼo, ak etmak, ek takata ainyak et ohocred inliinmopok: ek mun eti umnyi waina ainyak ka kava, ja ek mun asuptecnaig asega inliinmopok ainyak ehele Ihova.

¹⁶ Jim aktaktai aiek mika et takata has a naheca atahig unyum inigki: ek mun tas ainyak um uhum pam an nopan inig va naktaktai im nohocred alupas unyak.

¹⁷ Is tas a Ilai, um ika, Atga unyum aiek an liinmopom eropse: etmu alupai euc a Atua u nup Isreel nitai inig na mun ugyi yin vaig aiek.

¹⁸ Is ika aien, Etmu upene inliinmopom aiek vai naheca atahig unyum inigki. Is atga o un a intakata iyehki, um hag; is eti imtimlai an nesganimtan aien.

¹⁹ Eris auroauro ara, um aiji an nuhialeg, um atpuse an nuhup u Ihova, um adumoij, um apan an nimnim ura Rema: is amen ehele Hanna ehgan a Elkana; is imiehva yin a Ihova.

²⁰ Is um opoc a Hanna; is wat yetpam nopan o un, is apos inhalav atamaig aien, um anvi nidan par ika Samuel, (nesgan tas nigki, Eris ugyi Atua vai yin,) is ika aien, Kis ugyi Ihova vai yin ainyak.

²¹ Is apan Sailo a Elkana natimi iyehki, im natimi asega an nimnim o un, mika eri ahlap vai Ihova an nitai ahlap irai mesese asega, im nitai ahlap iyehki eris upyi asaig vaig.

²² Jais eti apan a Hanna; is idim ika ehele natamnyu un aien, Inki eti apan ainyak um yetpan an nopan natwa nided imi inhalav, ja ekpu imiapan yin ainyak an nopan iyehki, mika yi ehcohos aien an nuhup u Ihova, um amen eahki irai iji mesese.

²³ Is ika ehelen a Elkana natamnyu un, Ago nitai inig aiek et upene iram; amen aiek um yetpan an nopan natwa nided imi yin unyum; ja etmu ago aktit intas o un a Ihova. Is amen a intakata iyehki, um alidai inhal o un, um yetpan an nopan natwa nided imi yin o un.

²⁴ Is atwa nided imi yin aien, ja par leh yin, um imiapan yin Sailo, um lep leh kurimatau atamaig is ethi is dri inmesese iran, ira flaur is ohua ifa is ethi, im nide vaine is ohua inhubej is ethi, um imiapan an neom u Ihova Sailo: is haklin inhalav iyehki.

²⁵ Eris ahlap irai kurimatau iyehki ara, um imiapan inhalav ehele Ilai.

²⁶ Is ika a Hanna, Ak etmak, et idim inveijec intas unyak, ak etmak, ek takata iyehki ainyak kis aiji ehelum igcaki ainyak, um alaigaheni vai Ihova.

²⁷ Kis ugyi yin ainyak vai inhalav inigki; is alupai nyak a Ihova nitai inig kis ugyi yin vaig ainyak:

²⁸ va nitai inigki ek atcijai yin pan irai Ihova ainyak; uhpu atcijai yin pan irai Ihova an numoh asega o un. Is alaigaheni vai Ihova eagko a Ilai.