1 Pitrus 5 - Intas Etipup

Nuarin-tas alupas 5.

¹ EK ated ilpu atimi tas alep ehelemia ainyak, ek lep atimi tas alep ainyak, um atimi asuptecnaig nohocred u Kristo, um atimi asipiaig nupene ineig uhpu ehvaig:

² akumu alayi siip u Atua ehelemia aijaua, um aminjinai ra, um jim esjum, jam merit vaig; um jim ago vai inmerit vai inpadiaig, jam ago anliinmopomia cediaig;

³ um jim idivai ilpu atimarid irai ilpu atimi eris ikni imi caua; ja akumu asjaaicnaig an nefalaig aijaua imi siip o un.

⁴ Et wit ehcohos natimi alayi siip esjilid, akupu leh korona esjilid ineig aijaua inyi ti imlai.

⁵ Etmu idim ucco, ak ilpu takuras, akumu imyiaiji intas o ilpu atimi tas alep aijaua: akumu lep upoupo jipe vai caua aijaua asega, um ahid nedo eropse imi caua: “et idim ahcadai ra a Atua et ijinies inliinmopura ara, ja et aiheuc vai ra aien et upoupo inliinmopura ara.”

⁶ Va nitai ineigki etmu upoupo inliinmopomia aijaua an namen u nikmai Atua emda iramia, va etpu atijai caua aien an naopan upene:

⁷ um atijai iran naktaktai alupas asega unyimia; et idim aktaktai caua aien.

⁸ AKUMU aminjina nedo unyimia aijaua, um aiji lahlah; et idim atga jipe a Tiapolo, natimi tak atimi iramia, et idivaig laion aunyauwaig, um ahilek atimi par auahas ra:

⁹ akumu ahcadai yin aijaua, um aiji aktit an nimyiisjis ninivaijec, eka ato aijaua, nikavaig, era lep leucse niji ohocred iji eigki a ilpu etoamia an namen ura an nobohtan.

¹⁰ Aku wit ohocred ipjidipjid aijaua, etmu ago upene asega caua a Atua, um ikni ahtu caua, um ago emda caua, um ikni upene caua: aien aigki et esjilid naiheuc o un, is lep imyiacaij caija aien va nitai upene iji eigki o un inyi ti lep ti, vai Iesu Kristo.

¹¹ Etmu amen natimi alupas ehelen, im nemda, irai iji mesese. Emen.

¹² EK mun aged intas ipjidipjid imi caua ainyak irai Sailas, ek ika ainyak et etoamia inivaijec aien, um ated caua, um asuptecnaig mika, naiheuc inivaijec o Atua neigki eka apol iran aijaua.

¹³ Era aiheuc vai caua nup an nakalasia Babelon, eris ehras ehtai ra pan ehelemia, im lep Markus inhal unyak.

¹⁴ Akumu aiheuc vai caua aijaua an naijumnyi aiheuc. Etmu amen neigpa ehelemia asega, eka amen ehele Iesu Kristo aijaua. Emen.