1 Pitrus 4 - Intas Etipup

Nuarin-tas alupas 4.

¹ IS ohocred, a Kristo an nohun vai caija, va nitai ineigki etmu emda inliinmopomia aijaua um idivai yin: aien et leucse nohocred an nohun aien, et mun ude nedo has aien;

² mika aki jim lep umumoh aijaua, an namen unyimia irai ohumia et eled, par ago merit has u atimi, jam imyiaiji intas o Atua.

³ Is opra namen uja an nobohtan itu acen par imyiaiji intas o ilpu atimi aupat, an naopan iyehki intis ago nedo acitak akaija, um merit vai edo has, um umnyi alupas waina, um imyiacitak, um ahnag vai kava, um ago edo has esjilid an nalaigaheni vai ilpu atmas:

⁴ era imyiali ara, um asan tas has vai caua, va nedo unyimia, nikavaig, eka eti ehrathut aijaua ehele ra, um ago nedo has esjilid um idivai ra:

⁵ erupu asuptecnaig nedo ura ara sji eigki ehelen, et apena aien par asaig nimtan imi ilpu atimi umumoh im ilpu atimi emesmas.

⁶ Eris lep asuptecnaig intas-upene ehele ra eris emesmas ara, va nitai ineigki, mika eri asaig nimtan imi nohura natimi, jam imyiatamumoh nesgara a Atua.

⁷ JA et ubutpotet nehni u itai asega: va nitai ineigki akumu aktaktai upene aijaua, um aminjina nedo unyimia, um alaigaheni.

⁸ Ja etmu upyi hup um aiyu emda jipe inliinmopomia aijaua vai caua: va nitai ineig, nikavaig, “etpu adahpoi nedo has et ahinag naiyu u inliinmopja.”

⁹ Akumu alaamia sjipe itai hegaig aijaua, um jim adelelmia.

¹⁰ Et idivaig eris leh nedo aiheuc vai ra natimi, et um ucco, erumu lep ahaig jipe ira ra ara asega, et idivai ilpu aheca upene an naiheuc acheiachei jipe o Atua.

¹¹ El et tas tah natimi, etmu tas aien et idivaig intas o Atua: el et ago naheca tah natimi, etmu ago aien an nemda ineig et alupai yin a Atua: va uhpu imyiahpas Atua an niji itai asega irai Iesu Kristo; aien aigki et amen ehelen nimyiahpas im nemda irai iji mesese. Emen.

¹² Ak ilpu etoak upene, akumu jim imyiali nohocred esjilid ineig aijaua et yetpam iramia, va uhpu ato caua vaig, et idim eti yetpam iramia tah nitai mat:

¹³ jam imyiacitak va nitai ineigki, nikavaig, eka asipiaig nohocred u Kristo aijaua; mika aki lep imyiacitak alupas aijaua, an naopan iyehki uhpu ehvaig natimi alupas o un.

¹⁴ El eh asan tas has vai caua va nidai Kristo, eka mun ahesmoij aijaua; et idim amen iramia Nesgan esjilid, nikavaig, Nesgai Atua: era asan tas has vai yin ara, ja eka imyiahpas yin aijaua.

¹⁵ Ja etmu jim leucse nohocred tah iramia, et idivaig natimi atgei atmas, ka natimi ehneg itai, ka natimi ago nedo has, ka natimi ahilek niji itai oi tak atimi.

¹⁶ Ja el et leucse nohocred tah et idivaig natimi u Kristo, etmu jim ehcamai aien; jam imyiahpas Atua va nitai ineigki:

¹⁷ va nitai ineig, nikavaig, et mun yetpam naopan ineig er atupun neruvaig an neom u Atua: el et uhup um atupun iraija, uhpu uauo ra era imyipalea intas-upene o Atua ara?

¹⁸ El et ehka nimyiatamaigvaig ilpu atimi atoh nedo ura, erupu ehcohos eda a ilpu atimi eti alaigaheni, im ilpu atimi auatatimi?

¹⁹ Va nitai ineigki erumu ikni esgara ehelen ara sji eigki, era leucse nohocred ara vai intas o Atua, an nedo upene ura, et idivaig ehelen et inivaijec aien, is um ago niji itai asega.