1 Pitrus 3 - Intas Etipup

Nuarin-tas alupas 3.

¹ ETMU idim ucco, ak ilpu ehgara, akumu imyiaiji intas o ilpu atamnyu unyimia aijaua; el era imyiisjis nahcil intas tah, kit uhpu leucse ra, jam eti leucse ra an tas, ja an nedo upene u ilpu ehgara;

² eru wit almoi nedo upene unyimia ara, im nedo eccen unyimia:

³ um jim yecrei inyipe nohumia ache, um atij numri nidjinimia, um ahradei a colt, um aso caua ira apelumai;

⁴ jam yecrei inliinmopomia er eti ecetai, an nitai incig inyi ti muttit, nikavaig, nedo erop um eigpa, et upene acen nitai ineigki an nuhup u Atua.

⁵ Eris lep yecrei ra a ilpu takata upene itu acen is ucce, eris aitgai Atua ara, um imyiaiji intas o ilpu atamnyura:

⁶ is idivaig is imyiaiji intas o Ebraham a Sera, um anvi nidan natimi alupas: eka lep ilpu halav atahaig o un aijaua, aku wit ago nedo upene aijaua, um eti imtitaig tah nitai er imtitaig vaig.

⁷ Etmu idim ucco, ak ilpu atamnyura, akumu amen ehele ilpu ehgamia aijaua, um arapakau, va nitai ineig, nikavaig, et auatialidi nohura ara, um ago nedo eccen vai ra, va nitai ineig, nikavaig, akupu ehrohuun nitai umoh iran ineig aijaua, er tup alupai caua, va uhpu eti atapanes nalaigaheni unyimia.

⁸ IM lep ineig, etmu tup ethi ache naktaktai unyimia aijaua asega, um aiheuc jipe vai caua; etmu aiyu jipe inliinmopomia aijaua et idivai ilpu raimu, um aiheuc va atimi, um amen imi atimi:

⁹ jim aru nedo has aijaua an nedo has, im intas has an tas has; jai eche nedo unyimia, um asan tas upene; eka idim ato aijaua, nikavaig, eris imyiacaij caua va nitai ineigki, mika aki leh niji itai upene aijaua.

¹⁰ Vanitai ineig, nikavaig, “aien et merit aien nimyiacitakvaig nitai umoh iran, um almoi niji adiat upene, etmu atapanes nipjineucsen aien vai intas has, um jim asaig tah intas efaifa:

¹¹ etmu aha va nedo has aien, um ago nedo upene; etmu ahilek neigpa aien, um aho pan:

¹² et idim alum ilpu atimi atoh nedo ura a Natimarid, et lep atahaijeg nalaigaheni ura aien; ja et aiji nesganimtai Natimarid ira ra era ago nedo has ara.”

¹³ Aien di aigki etpu ago tah nedo has vai caua aien, el eka apitac yin aijaua et upene aien?

¹⁴ Ja el eka ohocred aijaua va nedo atoh, eka mun ahesmoij aijaua: “um jim imtitaig nitai ineig era imtitaig ara, um jim eucjucjucaij;

¹⁵ jam eccen vai Atua Natimarid” anliinmopomia: akumu lep apena aijaua irai iji adiat par asuptecnaig, ehele atimi asega era ahodai caua ara, intas va naitgaig u inliinmopomia, an nedo erop im nedo eccen:

¹⁶ etmu lep upene naktaktai unyimia aijaua; mika eri ehcamai ara sji eigki, era asan tas ahcil ara va nedo upene unyimia irai Kristo, an nitai ineig era tas vai caua vaig ara, um ika eka ago nedo has aijaua.

¹⁷ Et idim upene, el et asaig a Atua, mika aki ohocred aijaua an nagovaig nedo upene, ja eti an nagovaig nedo has.

¹⁸ Va nitai ineig, nikavaig, is echethi ache ohocred a Kristo vai edo has, natimi atoh nedo o un vai ilpu atimi auatatimi, mika yi aihiaig pam caija ehele Atua aien; eris atgei yin an nohun, ja eris imyiatamumoh yin an nesgan:

¹⁹ is lep apan aien vaig, um asuptecnaig intas ehele nesga atimi amen an neom ipjin;

²⁰ eris imyiisjis nahcil ara itu acen, is wat aitgai ra a Atua an nedo eti auatiemda o un ira adiat u Noa, eris wat ago nelcau, eris imyiatamaig an wai natimi is eti elpat iran, nikavaig, natimi is eet.

²¹ Nalmui nabaptiso neigki, et lep imyiatamaig caija an naopan ineig, (ja et eti imyiatamaig caija an natipagkivaig nemeig irai ohuja, ja nasuptecnaigvaig inliinmopja upene vai Atua,) va nusjai u Iesu Kristo:

²² is apan aien an nohatag, um amen an matai Atua; era lep upoupo iran a ilpu agelo, im ilpu atimi esjilid, im ilpu atimi emda.