1 Pitrus 2 - Intas Etipup

Nuarin-tas alupas 2.

¹ VA nitai ineigki akumu atceijaig nedemda asega aijaua, im nedo ahcil asega, im nefaifa, im nauatitai, im intas has asega,

² um ahvig nidenided inivaijec an tas, et idivai ilpu halav tup pam apos ra, va akupu emda vaig aijaua:

³ al ekis atimtim an naiheuc o Natimarid aijaua.

⁴ Akis ham ehelen aijaua, et hat umoh aien, eris um esjum vai yin natimi, ja is ehtai yin a Atua, um imyiahpas yin,

⁵ eris lep actaig caua et idivaig hat umumoh, mika aki eom va Nesgan Upene aijaua, um ilpu atimi ahlap upene, par ahlap an niji itai ahlap anliinmopomia, et upene an nuhup u Atua irai Iesu Kristo:

⁶ va nitai ineigki eris lep aged intas ineigki, um ika, “Ek idim ati a Saion ainyak inhat esjilid an nesvi va neom, eris ehtaig, eris lep imyiahpas: aien et asgeig iran aien, inyi ti ehcamai aien.”

⁷ Et idim itai imyiahpas imi caua eka imyiisjis ninivaijec aijaua: ja “inhat ineig eris esjum vaig a ilpu atimi acta neom, et hat esjilid an nesvi va neom” imi ilpu atimi imyipalea,

⁸ et lep “hat epihtau iran, im inhat auahas” ra era imyipalea intas o un ara, um epihtau iran: eris lep ikni ra va nitai ineigki.

⁹ Ja eka “ilpu atimi eris ehtai ra aijaua, um ilpu atimi ahlap atimarid, um ilpu atimi itaup,” um ilpu atimi eris auarimtara; mika aki ehvaig aijaua nupene o un is ahlaig pan vai caua aien an naupat unyimia, um ikni caua an lah o un ineig er imyiali:

¹⁰ akis eti ilpu atimi u Atua aijaua itu acen, ja eka ilpu atimi o un aijaua an naopan ineig: eris eti aiheuc vai caua, ja er aiheuc vai caua an naopan ineig.

¹¹ AK ilpu etoak upene, eka idivai ilpu atimi amen ehcid aijaua, im ilpu atimi amen irai taka uarin, va nitai ineigki ek ugni caua ainyak, mika aki ude inmerit iji eigki u inliinmopomia itu aijaua, et ago nedoa vai nesgamia,

¹² um ago nedo upene an nuhup u ilpu atimi aupat: mika, eru wit almoi nedo upene unyimia ara, eri imyiahpas Atua ara an nadiat ateghe o un, an nitai ineig era tas vai caua vaig ara, um ika eka ago nedo has aijaua.

¹³ Akumu imyiaiji intas alep asega u atimi aijaua vai Natimarid; kit intas alep u natimarid ineig et esjilid aien;

¹⁴ ka ilpu atimi alupas, is ikni ra aien, mika eri aru nedo has u ilpu atimi auatatimi, um lep imyiahpas ra era ago nedo upene ara.

¹⁵ Et idim asaig a Atua, mika aki atapanes intas aupat u ilpu atimi ahnag aijaua, an nedo upene unyimia:

¹⁶ eka ilpu atimi eti aheca aijaua; ja akumu jim adahpoi nedemda unyimia aijaua va neti aheca unyimia, jam ago nedo o ilpu aheca u Atua.

¹⁷ Akumu ago nedo eccen va atimi asega aijaua. Etmu aiyu inliinmopomia aijaua vai ilpu etoamia. Akumu imtitai Atua aijaua. Ago nedo eccen vai natimarid unyimia aijaua.

¹⁸ AK ilpu aheca, akumu imyiaiji intas o ilpu atimi alupas unyimia aijaua, um imtitai ra; kit era upene ara um erop, ka era ipjin ara.

¹⁹ Er imyiahpas nedo ineigki, et wat leucse nohocred tah natimi va nimyiaiji intas o Atua, jam ohocred va nedo eit atoh vai yin.

²⁰ Nimyiahpas caua yek ed, el et eropse inliinmopomia aijaua uhu wit abli caua va nedo has unyimia? ja el et eropse inliinmopomia aijaua, aku wit ago nedo upene aijaua, jam ohocred vaig, el et upene irai Atua nedo ineigki.

²¹ Eris idim imyiacaij caua va nitai ineigki: is idim lep ohocred a Kristo vai caija, um uhup um asjaaicnaig an nefalaig imi caija, mika aki apitac aijaua an nugnyan neduon:

²² “aien aigki is eti ago tah nedo has aien, eris eti lep ecetai tah nefaifa an nipjineucsen:”

²³ eris wat atuh yin, is eti lep atuh atimi aien; is wat ohocred aien, is eti asan tas edemda aien; ja is ati yin aien ehelen et asuptenaig nimtan atoh aien:

²⁴ is lep leucse nimtan nedo has uja an nohun aien an nauincai atgeig, mika ti umumoh u nedo atoh akaija, an nemesmas uja an nedo has: “eka cehcehe aijaua va naredei yin.”

²⁵ Akis idivaig siip ahnag aijaua; ja eka mun lep adumoij pan aijaua ehele natimi ineig et alaamia aien, um aminjina nesgamia.