1 Pitrus 1 - Intas Etipup

Nuarin-tas alupas 1.

¹ AK ilpu atimi amen irai taka uarin, eka terimterim aijaua Pontus, im Calesya, im Kapatosya, im Esya, im Bidinya,

² ek aiheuc vai caua ainyak Pitrus, napostolo o Iesu Kristo, eris ehtai caua et idivaig nupyi ato o Atua Etmaija, an nago upene caua irai Nesgan Upene, va akupu imyiaiji intas o un aijaua, uhpu lep ohaig iramia inja irai Iesu Kristo: Etmu amen alupas ehelemia naiheuc im neigpa.

³ UHMU imyiahpas Atua, Etmai Iesu Kristo Natimarid uja, aien is aketo aien um apos caija an naiheuc esjilid o un, mika ti aitgaig nitai umoh iran akaija va nusjai u Iesu Kristo vai inmas o un,

⁴ um ohuun nitai iji eigki inyi ti muttit, um eti has, um eti imlai, eris ikni an nohatag imi caua,

⁵ ak ra sji eig er aminjinai caua an nemda u Atua va nimyiisjis ninivaijec unyimia, va akupu leh nimyiatamaig caua ineig aijaua, eh mun ago ehni, va uhpu ehvaig an naopan apitac.

⁶ Eka lep imyiacitak vaig aijaua, ja, el et upene vai caua, eka taigtaig aijaua an naopan ineig, ja et ipjidipjid, va niji oop caua et acheiachei:

⁷ va uhpu ecetai nimyiisjis ninivaijec unyimia, eris ahilek, um ato mika, et esjilid irai colt ineig etpu ti, ja er ati an cop par ato; uhpu lep tas upene vaig, um naaurineig, um imyiahpas, an naopan iyehki etpu ehcohos a Iesu Kristo:

⁸ akis eti alum yin aijaua, ja et aiyu inliinmopomia aijaua yin; eka eti alum yin aijaua an naopan ineig, jam asgeig iran ache, ja eka cediaig aijaua, an nimyiacitak ineig et ehka nasuptecnaigvaig, um esjilid acen:

⁹ um lep leh nitai ineig eka imyiisjis ninivaijec vaig aijaua, nikavaig, nimyiatamaig nesgamia.

¹⁰ Eris eas um ahilek emda nimyiatamaig ineig a ilpu profeta iji ehki, eris upyi tas ara va naiheuc ineig etpu yetpam iramia:

¹¹ um lep aktaktai naopan iyehki im nedo iran, is ehvaig ehele ra a Nesgai Kristo, is wat upyi hup aien um asuptecnaig nohocred u Kristo, im natimi alupas o un etpu apitac:

¹² ja eris ehvaig nitai ineigki ehele ra, nikavaig, eris eti aheca ura ara, jam aheca uja an nitai iji eigki, eris asaig ehelemia a ilpu atimi asuptecnaig intas-upene ehelemia, vai Nesgan Upene eris abrai yin an nohatag; era lep merit a ilpu agelo nalmoivaig nitai iji eigki.

¹³ Va nitai ineigki akumu aroraijiraig inliinmopomia aijaua, um aminjina nedo unyimia, um aitgaig emda naiheuc ineig, uhpu alupai caua an naopan iyehki etpu ehcohos a Iesu Kristo;

¹⁴ et idivai ilpu halav imyiaiji intas, um jim ago nedo et idivai merit has unyimia itu acen an naupat unyimia:

¹⁵ ja, et idim upene aien is ahlaig vai caua aien, et idim ucco, akumu upene aijaua an nedo asega unyimia;

¹⁶ va nitai ineig, nikavaig, eris aged, um ika, “Akumu upene aijaua; ek idim upene ainyak.”

¹⁷ El eka anvi nidai Etmamia aijaua, et asuptecnaig atoh nimtan aien imi atimi asega et idivaig nauritai ura, akumu imtitai yin aijaua an namen unyimia igcaki:

¹⁸ eka idim ato aijaua, nikavaig, eris eti auarimtamia irai itai muttit, nikavaig, silver im colt, va nedo ahnag unyimia akis ago aijaua vai intas alep is ahes ehele ilpu retpomia;

¹⁹ ja an ja esjilid irai Kristo, et idivaig inja an hakli siip et upene asega um ti nitai has iran:

²⁰ eris idim upyi ati yin an naopan iyehki is pam eti eteuc nobohtan, ja is ehcohos aien ira aopan apitac iji eigki vai caua,

²¹ eka asgeig irai Atua ineig vai yin aijaua, is imyinusjai yin aien vai inmas o un, um alupai yin natimi alupas o un; va nitai ineigki eka asgeig irai Atua aijaua, um aitgai yin.

²² Akis idim ago adicinadicin inliinmopomia aijaua an nimyiaiji intas inivaijec vai Nesgan Upene, um aiheuc inivaijec vai ilpu etoaija, etmu lep aiyu jipe alupas inliinmopomia aijaua vai caua, um inivaijec:

²³ eris aketo um apos caua, jam eti apos caua an nupsinitai ineig inyi muttit, ja an nupsinitai ineig inyi ti muttit, nikavaig, intas o Atua et umoh um amen irai iji mesese:

²⁴ va nitai ineig, nikavaig, “era idivaig nefelelicai natimi asega, et lep idivaig intisiancai natimi alupas asega u atimi. Et imlai nefelelicai, um lep eijis intisian:

²⁵ ja inyi amen intas o Natimarid irai iji mesese.” Intas neigki, er asuptecnaig ehelemia an tas-upene.