1 Joanes 5 - Intas Etipup

Nuarin-tas alupas 5.

¹ ARA asega era imyiisjis ninivaijec nitai ineigki ara, nikavaig, et Kristo a Iesu, is apos ra a Atua: ara asega et aiyu inliinmopura ara vai etman tah, et lep aiyu inliinmopura ara vai inhal o un.

² Inta ato akaija mika, et aiyu inliinmopja akaija vai ilpu hal o Atua an nitai ineigki, nikavaig, an naiyu u inliinmopja vai Atua, im lep an nimyiaiji tas alep o un uja.

³ Naiyu u inliinmopja vai Atua neigki, nimyiaijivaig tas alep o un uja: et idim eti opouc intas alep o un.

⁴ Ara asega is apos ra a Atua, era idim esjilid ara irai iji itai an nobohtan: nitai er esjilid vaig irai iji itai an nobohtan neigki, nikavaig, nimyiisjis ninivaijec uja.

⁵ Aien di aigki et esjilid aien irai iji itai an nobohtan? aien marom et imyiisjis ninivaijec aien mika, et Hal o Atua a Iesu.

⁶ Aien aigki is ham aien an wai im inja iran, Iesu Kristo marom; eti ham aien an wai ache, ja an wai im lep inja iran. Et asuptecnai yin a Nesgan Upene, va nitai ineig, nikavaig, et inivaijec a Nesgan Upene.

⁷ Ehtaij asuptecnaig an nohatag ahtaij, nikavaig, Etman, im Intas, im Nesgan Upene: ja ehtaij tup ethi ache ahtaij raigki.

⁸ Ehtaij lep asuptecnaig an nobohtan ahtaij, nikavaig, Nesgan, im lep inwai, im inja iran: ja et idim tup ethi ache nitai eraigki.

⁹ Ele ta eteuc an tas asuptecnaig u atimi akaija, et esjilid intas asuptecnaig u Atua: intas asuptecnaig u Atua neigki, is ati vai Inhal o un aien.

¹⁰ Aien et imyiisjis ninivaijec vai Inhal o Atua aien, et amen nitai asuptecnaig anliinmopon: aien et eti imyiisjis ninivaijec vai Atua aien, et ika aien et ahcil aien; et eti imyiisjis ninivaijec aien nasuptecnaig u Atua vai Inhal o un.

¹¹ Nasuptecnaig u Atua neigki, nikavaig, is alupai caija nitai umoh iran ineig inyi ti lep ti, et lep amen nitai umoh iran ineigki ehele Inhal o un.

¹² Aien et amen ehelen a Inhal o un, et umoh aien; ja aien et eti amen ehelen a Inhal o Atua, et eti umoh aien.

¹³ EK mun aged nitai iji eigki ainyak imi caua, eka asgeig an nidai Inhal o Atua aijaua; va akupu ato aijaua, nikavaig, et amen ehelemia nitai umoh iran ineig inyi ti lep ti, um lep asgeig an nidai Inhal o Atua.

¹⁴ Nimyiisjis ninivaijec vai yin uja neigki, nikavaig, ele ta ugni tah nitai akaija et idivaig nasaig o un, et atahaijeg caija aien:

¹⁵ ele ta ato akaija, nikavaig, et atahaijeg caija aien an nugni yin uja vai itai, inta ato akaija, nikavaig, inta leh akaija nitai iji eigki inta ugni yin vaig akaija.

¹⁶ El et alum etoan tah natimi nagovaig nedo has, jam eti ago nedo has ineig eh mas vaig, etmu ugni itai aien, etpu alupai yin nitai umoh iran a Atua imi ra, era eti ago nedo has ineig ara eh mas vaig. Et eteuc nedo has ineig eh mas vaig: ek eti asaig ainyak mika yi alaigaheni vaig aien.

¹⁷ Nedo has neigki, nedo asega et eti atoh; ja et lep eteuc nedo has ineig er eti mas vaig.

¹⁸ Inta ato akaija, nikavaig, era eti ago nedo has ara asega is apos ra a Atua; ja et aminjinai yin aien is apos yin a Atua, et eti lep ubli yin natimi auatatimi inaico.

¹⁹ Inta ato akaija, nikavaig, intis ahes ehele Atua akaija, era lep amen atimi asega an nobohtan ehele natimi auatatimi inaico.

²⁰ Inta lep ato akaija, nikavaig, is ham a Inhal o Atua, is lep alupai caija narapakau aien, mika ti ato yin akaija et inivaijec aien: inta lep amen ehelen akaija et inivaijec aien, Iesu Kristo Inhal o un. Atua inivaijec neigki, im lep nitai umoh iran ineig inyi ti lep ti.

²¹ Ak ilpu hal unyak, aminjinai caua aijaua vai ilpu atmas. Emen.