1 Joanes 4 - Intas Etipup

Nuarin-tas alupas 4.

¹ AK ilpu etoak upene, akumu jim imyiisjis ninivaijec natimi asega aijaua, er ahu intas ira ra, jam aktaktai ra sji eigki, kit eris ahes ehele Atua ara, ka oʼo: eris apaahni an nobohtan a ilpu profeta efaifa et ahinag.

² Akupu ato Nesgai Atua aijaua va nitai ineigki, nikavaig, natimi asega er ahu intas ira ra, um ika is ham an nohun a Iesu Kristo, era ahes ehele Atua ara:

³ ja natimi asega er ahu intas ira ra, um ika is eti ham an nohun a Iesu Kristo, era eti ahes ehele Atua ara: intaka kristo neigki, akis atahaijeg vaig aijaua mika etpu ham aien; et idim amen aien an nobohtan an naopan ineig.

⁴ Akis ahes ehele Atua aijaua, ak ilpu hal unyak, eka lep esjilid ira ra aijaua: et idim esjilid aien et amen aien ehelemia iran naico, et amen aien ehele atimi an nobohtan.

⁵ Era atimi an nobohtan ara: va nitai ineigki era tas ara va nobohtan, era lep atahaijeg ra natimi an nobohtan.

⁶ Ecra ahes ehele Atua aijama; aien et ato Atua aien, et atahaijeg cama aien; aien et eti ahes ehele Atua aien, et eti atahaijeg cama aien. Va nitai ineigki inta ato nesgan nimyiisjis ninivaijec akaija, im lep nesgan nimyiisjis nahcil.

⁷ AK ilpu etoak upene, etmu aiyu jipe inliinmopja akaija vai caija: et idim ahes ehele Atua naiyu u inliinmopja; is apos ra asega a Atua et aiyu inliinmopura ara va atimi, era lep ato Atua ara.

⁸ Aien et eti aiyu inliinmopon aien va atimi, et eti ato Atua aien, et idim itai aiyu a Atua.

⁹ Nitai ehvaig naiyu u inliinmopoi Atua vai caija neigki, nikavaig, is abraig pam Inhal o un aien an nobohtan, is apos yin aien is tup ethi ache, mika ti umumoh akaija vai yin.

¹⁰ Neti aiyu neigki, nikavaig, is aiyu inliinmopja akaija vai Atua, ja naiyu neigki, is aiyu inliinmopon aien vai caija, um abrai Inhal o un, mika yi itai ahlap aien vai edo has uja.

¹¹ Ak ilpu etoak upene, el is ucce naiyu u inliinmopoi Atua vai caija, eris idim ika eheleija yi aiyu jipe inliinmopja akaija vai caija.

¹² Is eti ecet Atua tah natimi an tah naopan. El et aiyu jipe inliinmopja akaija vai caija, el et amen eheleija a Atua, et lep aiyu asega inliinmopja akaija vai yin.

¹³ Inta ato akaija, nikavaig, inta amen ehelen akaija, um lep amen eheleija aien, va nitai ineig, nikavaig, is alupai caija Nesgan Upene aien.

¹⁴ Ecris ecetai aijama, um asuptecnaig mika, is abrai Inhal o un a Etman, mika yi atimi imyiatamaig atimi an nobohtan aien.

¹⁵ Aien et asuptecnaig aien, um ika et Hal o Atua a Iesu, et amen ehelen a Atua, um lep amen ehele Atua aien.

¹⁶ Inta ato akaija um imyiisjis ninivaijec naiyu u inliinmopoi Atua vai caija. Et itai aiyu a Atua; aien et amen an naiyu u inliinmopon, et amen ehele Atua aien, um lep amen ehelen a Atua.

¹⁷ Et idim aiyu asega inliinmopja akaija, vai intupu ahlahusjai akaija an nadiat asuptecnaig nimtan imi atimi; va nitai ineig, nikavaig, inta amen an nobohtan akaija et idivai yin.

¹⁸ Et eti ahes nimtitaig anliinmopja aiyu; ja et ahlo nimtitaig naiyu asega anliinmopja: nitai auaohocred atimi neigki, nimtitaig ura. Aien et imtitaig aien, et eti aiyu asega inliinmopon aien.

¹⁹ Et aiyu inliinmopja akaija vai yin, va nitai ineig, nikavaig, is upyi hup aien um aiyu inliinmopon vai caija.

²⁰ El et ika tah natimi, Et aiyu inliinmopok ainyak vai Atua, jam acen inliinmopon vai etoan, et atimi ahcil aien: aien et eti aiyu inliinmopon aien vai etoan et ecet yin aien, et ehka vai yin par aiyu inliinmopon vai Atua et eti ecet yin aien.

²¹ Intis leh intas alep ineigki ehelen akaija, nikavaig, Aien et aiyu inliinmopon aien vai Atua, etmu lep aiyu inliinmopon aien vai etoan.