1 Joanes 3 - Intas Etipup

Nuarin-tas alupas 3.

¹ AKUMU almoi aijaua naiheuc esjilid ineig o Etmaija vai caija, nikavaig, er anvi nidaija par ika ilpu hal o Atua! va nitai ineigki era eti ato caija natimi an nobohtan, va nitai ineig, nikavaig, eris eti ato yin ara.

² Ak ilpu etoak upene, inta ilpu hal o Atua akaija an naopan ineig; er eti ato an naopan ineig, nikavaig, intupu idivai di akaija, ja inta ato akaija mika, et wit ehcohos aien, intupu idivai yin akaija; va nitai ineig, nikavaig, intupu ecet iktit upene yin akaija.

³ Ara asega era aitgai yin ara va nitai ineigki, era ago upene ra ara, et idivaig et upene aien.

⁴ Ara asega era ago nedo has ara, era lep imyipalea intas alep ara: et idim edo has neigki, nimyipaleavaig intas alep.

⁵ Eka ato aijaua mika, is ehcohos aien par iknipagki edo has uja; ja et eti eteuc tah nedo has o un.

⁶ Ara asega era amen ehelen ara, era eti ago nedo has ara: ara asega era ago nedo has ara, eris eti ecet yin ara, um eti ato yin.

⁷ Ak ilpu hal unyak, etmu jim imyiahnag caua tah natimi: aien et ago nedo atoh aien, et atoh nedo o un, et idivaig et atoh nedo o un.

⁸ Aien et ago nedo has aien, is ahes ehele Tiapolo aien; is ago nedo has a Tiapolo itu acen um uhum pam. Va nitai ineigki, is idim ehcohos a Inhal o Atua, mika yi auahas nauritai u Tiapolo.

⁹ Ara asega is apos ra a Atua, era eti ago nedo has ara; et idim amen anliinmopura nupsinitai o un: et ehka vai yin nagovaig nedo has, va nitai ineig, nikavaig, is apos yin a Atua.

¹⁰ Er ato ilpu hal o Atua, im ilpu hal o Tiapolo, va nitai ineigki: ara asega era eti ago nedo atoh ara, eris eti ahes ehele Atua ara, im lep ra et eti aiyu inliinmopura ara vai ilpu etoara.

¹¹ Akis atahaijeg intas alep ineigki aijaua itu acen um uhum pam, mika yi aiyu jipe inliinmopja akaija vai caija:

¹² um eti idivai Kein, aien is ahes ehele natimi auatatimi inaico aien, um atgei etoan. Is atgei yin aien vanhe? Va nitai ineig, nikavaig, is has nedo o un, ja is atoh nedo o etoan.

¹³ Ak ilpu etoak, jim imyiali aijaua, el era edemda vai caua natimi an nobohtan.

¹⁴ Inta ato akaija, nikavaig, intis anusjai vai inmas akaija, um umumoh, va nitai ineig, nikavaig, et aiyu inliinmopja akaija vai ilpu etoaija. Aien et eti aiyu inliinmopon aien vai etoan, et amen an mas aien.

¹⁵ Ara asega et acen inliinmopura ara vai ilpu etoara, era atimi atgei atmas ara: eka lep ato aijaua mika, et eti amen nitai umoh iran ineig inyi ti lep ti, anliinmopon tah natimi atgei atmas.

¹⁶ Inta ato akaija naiyu u inliinmopon, va nitai ineig, nikavaig, is mas aien vai caija: eris idim ika ti emesmas akaija vai ilpu etoaija.

¹⁷ Aien et ikni itai aien an nobohtan, um almoi nihki natimi u etoan, jam eti aiheuc vai yin, et idim eti aiyu inliinmopon aien vai Atua.

¹⁸ Ak ilpu hal unyak, ti jim aiheuc va atimi akaija an tas im nipjineucseija ache; jam aiheuc vai ra an nedo uja, um inivaijec.

¹⁹ Va nitai ineigki inta ato akaija mika,inta inivaijec akaija; etpu lep emda inliinmopja akaija an nuhup o un.

²⁰ El et ated caija inliinmopja, et esjilid a Atua irai inliinmopja, et lep ato niji itai asega aien.

²¹ Ak ilpu etoak upene, el et eti ated caija inliinmopja, intupu ahlahusjai akaija an nuhup u Atua:

²² intupu lep leh nitai iji eigki asega akaija, inta ugni yin vaig akaija, va nitai ineig, nikavaig, inta imyiaiji tas alep o un akaija, um ago nedo ineig et upene an nuhup o un.

²³ Intas alep o un neigki, nikavaig, inti asgeig an nidai Iesu Kristo Inhal o un akaija, um lep aiyu jipe inliinmopja vai caija, et idivaig is tas alep vai caija aien.

²⁴ Aien et imyiaiji tas alep o un aien, et amen ehelen aien, et lep amen aien ehelen. Inta ato akaija mika, et amen eheleija aien va nitai ineigki, nikavaig, is alupai caija Nesgan Upene aien.