1 Joanes 2 - Intas Etipup

Nuarin-tas alupas 2.

¹ AK ilpu hal unyak, ek aged nitai iji eigki imi caua ainyak, mika aki jim ago nedo has aijaua. El et ago nedo has tah natimi, et eteuc natimi imyiahras caija ehele Etman, Iesu Kristo et atoh nedo o un:

² et itai ahlap va nedo has uja aien: ja eti va nedo has uja ache, jam lep va nedo has u atimi asega ari nobohtan.

³ Inta ato akaija mika, inta ato yin akaija va nitai ineigki, nikavaig, ele ta imyiaiji tas alep o un akaija.

⁴ Aien et ika aien, Ek ato yin ainyak, jam eti imyiaiji tas alep o un, et atimi ahcil aien, um eti amen nedo inivaijec ehelen.

⁵ Ja aien et imyiaiji intas o un aien, et idim aiyu asega inliinmopon aien vai Atua: va nitai ineigki inta ato akaija mika, inta amen ehelen akaija.

⁶ Aien et asaig aien mika et amen ehelen aien, et upene vai yin nagovaig nedo et idiva nedo ineig is ago aien.

⁷ Ak ilpu etoak, ek eti aged tah intas alep mat imi caua ainyak, ja intas alep itu acen is amen ehelemia irai iji adiat. Intas alep itu acen neigki, et lep intas iyehki akis atahaijeg aijaua itu acen um imyihum pam an naopan ineig.

⁸ Im lep ineig, ek aged intas alep mat imi caua ainyak; is inivaijec nitai ineig vai yin, et lep inivaijec vai caua, is idim ti pan itac naupat, et lep ememina inlah inivaijec an naopan ineig.

⁹ Aien et ika aien et amen aien an lah, jam acen inliinmopon vai etoan, is amen aien an naupat um uhum pam an naopan ineig.

¹⁰ Aien et aiyu inliinmopon aien vai etoan, et amen aien an lah, et eti eteuc nitai epihtau iran anliinmopon.

¹¹ Ja aien et acen inliinmopon aien vai etoan, et amen aien an naupat, um atga an naupat, um eti ato nuarin ineig et apan iran aien; et idim eti alum itai nesganimtan va naupat.

¹² Ek aged intas imi caua ainyak, ak ilpu hal unyak, va nitai ineig, nikavaig, uhpu eti aru nedo has unyimia va nidan.

¹³ Ek aged intas imi caua ainyak, ak ilpu atimi alupas, va nitai ineig, nikavaig, eka ato yin aijaua is eteuc aien itu acen um uhum pam. Ek aged intas imi caua ainyak, ak ilpu takuras, va nitai ineig, nikavaig, eka esjilid irai natimi auatatimi inaico aijaua. Ek aged intas imi caua ainyak, ak ilpu hal unyak, va nitai ineig, nikavaig, eka ato Etman aijaua.

¹⁴ Ek mun aged intas imi caua ainyak, ak ilpu atimi alupas, va nitai ineig, nikavaig, eka ato yin aijaua is eteuc aien itu acen um uhum pam. Ek mun aged intas imi caua ainyak, ak ilpu takuras, va nitai ineig, nikavaig, eka emda aijaua, is lep amen anliinmopomia intas o Atua, eka lep esjilid aijaua irai natimi auatatimi inaico.

¹⁵ Etmu jim aiyu inliinmopomia aijaua va nobohtan, im lep niji itai an nobohtan. El et aiyu inliimmopon tah va nobohtan, el et eti aiyu inliinmopon aien vai Etmaija.

¹⁶ Et eti ahes ehele Etmaija niji itai asega an nobohtan, nikavaig, inmerit has u nohuja, im inmerit has u nesganimtaija, im intas ijinies vai inpadiaig, ja et ahes an nobohtan.

¹⁷ Etpu yetpan nobohtan, im lep nitai iji eigki eh merit vaig: ja aien et imyiaiji intas o Atua aien, etpu amen aieu irai iji mesese.

¹⁸ Ak ilpu hal unyak, naopan apitac neigki: akis idim atahaijeg aijaua mika etpu ham intaka kristo, et idim ucco, era amen intaka kristo et ahinag an naopan ineig; va nitai ineigki inta ato akaija mika, naopan apitac neigki.

¹⁹ Eris ude caija ara, ja eris eti tup ethi ache pan iraija ara: el eris tup ethi ache pan iraija ara, el eris amen eheleija ara: ja eris ude caija ara, va uhpu ato mika, eris eti tup ethi ache pan iraija ara asega.

²⁰ Ja is aspi caua Aien et upene aien, eka lep ato niji itai asega aijaua.

²¹ Ek mun eti aged intas imi caua ainyak va neti ato intas inivaijec unyimia, ja va natovaig unyimia; im lep va nitai ineig, nikavaig, et eti ahes an tas inivaijec tah intas ahcil.

²² Natimi ahcil a di? aien marom et asaig aien mika, et eti Kristo a Iesu; et taka kristo aien, et ateri Etman im Inhal o un aien.

²³ Aien et ateri Inhal o Atua aien, et eti amen ehelen a Etman: ja aien et asuptecnaig Inhal o Atua aien, et amen ehelen a Etman.

²⁴ Etmu amen anliinmopomia nitai ineigki, akis atahaijeg aijaua itu acen um uhum pam. El et amen anliinmopomia nitai ineigki, akis atahaijeg aijaua irai iji adiat, akupu lep apol aktit aijaua irai Etman im Inhal o un.

²⁵ Intas upyi asaig o un neigki, is upyi asaig eheleija aien, nikavaig, nitai umoh iran ineig inyi ti lep ti.

²⁶ Ek mun aged nitai iji eigki ainyak imi caua vai ra era imyiahnag caua ara.

²⁷ Ja et amen anliinmopomia naspi caua ineigki, akis leh ehelen aijaua, et eti lep upene vaig tah natimi nesege imi caua vaig: ja er esege imi caua niji itai asega an naspi caua ineigki, et lep inivaijec, um eti ahcil, er idim esege imi caua an nedo ineigki, et idim ucco, akupu apol aktit iran aijaua.

²⁸ Va nitai ineigki, ak ilpu hal unyak, akumu apol aktit iran aijaua; va etpu emda inliinmopja akaija an naopan iyehki etpu ehcohos aien, um eti ehcamai an nuhup o un an napam o un.

²⁹ El eka ato aijaua mika, et atoh nedo o un, eka lep ato aijaua mika, is apos ra asega aien era ago nedo atoh ara.