Matvei 1 - Uz' Zavet

IISUSAN SÜNDUND I LAPS՚AIG 1-2 ( Luk. 3:23-38 ) Iisusan sugu

¹ Nece om Iisusan Hristosan, Davidan Poigan i Avraaman poigan sugu:

² Avraamale sündui Isak, Isakale Jakov, Jakovale Juda i hänen velled,

³ Judale Fares i Zara, kudambiden mam oli Famar, Faresale Esrom, Esromale Aram,

⁴ Aramale Aminadav, Aminadavale Naasson, Naassonale Salmon,

⁵ Salmonale Vooz, kudamban mam oli Rahav, Voozale Ovid, kudamban mam oli Ruf, Ovidale Jessei,

⁶ i Jessejale David, kunigaz. David-kunigahale sündui Solomon, kudamban mam oli Urian ak,

⁷ Solomonale sündui Rovoam, Rovoamale Avia, Aviale Asa,

⁸ Asale Josafat, Josafatale Joram, Joramale Ozia,

⁹ Oziale Joafam, Joafamale Ahaz, Ahazale Ezekia,

¹⁰ Ezekiale Manassia, Manassiale Amon, Amonale Josia,

¹¹ i Josiale Joakim, Joakimale Jehonia i hänen velled Vavilonha sirdämižen aigan.

¹² Jäl՚ges sidä, konz rahvaz oli sirttud Vavilonha, Jehoniale sündui Salafiil, Salafiilale Zorovavel,

¹³ Zorovavelale Aviud, Aviudale Eliakim, Eliakimale Azor,

¹⁴ Azorale Sadok, Sadokale Ahim, Ahimale Eliud,

¹⁵ Eliudale Eleazar, Eleazarale Matfan, Matfanale Jakov

¹⁶ i Jakovale Josif, Marian mužik, Maria sai Iisusan, kudamban kuctas Messiaks.

¹⁷ Avraamaspäi Davidahasai kaiked oli nel՚l՚toštkümne sugupol՚ved; Davidaspäi rahvahan Vavilonha sirdämižehesai oli mugažo nel՚l՚toštkümne sugupol՚ved, i sišpäi völ nel՚l՚toštkümne sugupol՚ved Messiahasai.

Iisusan sündund

¹⁸ Iisusan Hristosan sündund oli mugoine. Maria, Iisusan mam, oli kozitud Josifale. Edel naindad homaitihe, miše Maria om kohtištunu. Hänen laps՚ oli Pühäs Hengespäi.

¹⁹ Josif, hänen ženih, oli oiged mez՚, ei tahtoind huigenzoitta Mariad, a tahtoi peitos jätta händast.

²⁰ Ku Josif meletaškanzi muga, hänele uniš ozutihe Ižandan angel, kudamb sanui: «Josif, Davidan poig, ala varaida otta Mariad mehele, ved՚ laps՚, kudamb om hänes, om Pühäs Hengespäi.

²¹ Hän sündutab poigan, i sinei tarbiž antta hänele nimi Iisus, sikš ku hän päzutab ičeze rahvahan heiden grähkišpäi.»

²² Muga tegihe, miše tuliži todeks, min polhe Ižand oli sanunu ičeze sanankandajan kal՚t:

²³ – Kacu, neižne kohtištub i sündutab poigan. I hänele anttas nimi Emmanuil – se znamoičeb: meidenke om Jumal.

²⁴ Heraštudes unespäi Josif tegi ninga, kut Ižandan angel oli käsknu, i oti Marian mehele.

²⁵ Hän ei koskend Mariad. Sid՚ Maria sünduti poigan, ičeze ezmäižen. Josif andoi poigale nimen Iisus.