Mark 1 - Uz' Zavet

IISUS ZAVODIB RADON 1-3 Joan Valatai

¹ Hüvä vest՚ Iisusan Hristosan polhe, Jumalan Poigan polhe, mäneškanzi ninga:

² Jumalan sanankandajiden kirjutusiš oma mugomad Jumalan sanad: – Minä oigendan vestinkandajan edel sindai, hän vaumištab ten sinun edes.

³ Kirgujan än՚ kulub rahvahatomas mas: Puhtastagat Ižandale te, tehkat oiktoikš hänele tehuded!

⁴ I oli muga. Joan valati rahvahatomas mas i saneli, miše rahvahale tarbiž kärautas grähkišpäi i valatadas, miše heiden grähkäd oliži pästtud.

⁵ Hänennoks tuli rahvast kaikiš Judejan agjoišpäi i Jerusaliman lidnaspäi. Hö avaižiba ičeze grähkäd, i Joan valati heid Jordanjoges.

⁶ Joannal oli päl soba verbl՚udan karvoišpäi i nahkvö vösijal, hän söi čirggäižid i mezjaižiden met.

⁷ Hän saneli: «Minun jäl՚ghe tuleb vägevamb mindai, minä en rohti kumartas i rušta hänen kengiden pagloid-ki.

⁸ Minä olen valatanu teid vedel, a hän valatab teid Pühäl Hengel.»

Iisusan valatuz

⁹ Nenil päivil Iisus tuli Galilejan Nazaretan lidnaspäi, i Joan valati händast Jordanjoges.

¹⁰ Konz Iisus libui vedespäi, Joan nägišti, kut rebitihe taivaz i Heng päzui Iisusan päle kut kühkjaine.

¹¹ Taivhaspäi kului än՚: «Sinä oled minun armaz Poig, i sinunke om minun armastuz.»

¹² Pigai necen jäl՚ghe Heng vedi Iisusan rahvahatomha maha.

¹³ Hän oli rahvahatomas mas nel՚l՚kümne päiväd, i soton kodvi händast. Hän eli sigä mecživatoiden keskes, i angelad pidiba hänes hol՚t.

Iisus saneleb hüvän vestin

¹⁴ Konz Joan oli tactud türmha, Iisus pördihe Galilejaha i saneleškanzi hüväd vestid Jumalan valdkundan polhe.

¹⁵ Hän saneli: «Se aig om tulnu, Jumalan valdkund om lähenu. Käraukatoiš grähkišpäi i uskkat hüvähä vestihe!»

Ezmäižed openikad

¹⁶ Konz Iisus astui Galilejajärven randadme, hän nägišti Simonan i hänen vellen Andrejan. Hö laskiba verkoid järvhe, sikš ku oliba kalanikad.

¹⁷ Iisus sanui heile: «Astkam minunke. Minä tegen teid mehiden kalanikoikš.»

¹⁸ Hö sid՚-žo jätiba ičeze verkod i läksiba Iisusanke.

¹⁹ Päliči tekeskustas Iisus nägišti Jakovan i hänen vellen Joannan, Zevedejan poigad. Hö-ki oliba venehes verkoid kohendamas.

²⁰ Iisus sid՚-žo kucui heid-ki. Hö jätiba ičeze tatan Zevedejan i paukatud radnikoid veneheze i läksiba Iisusanke.

Iisus Kapernauman suimpertiš

²¹ Hö tuliba Kapernauman lidnaha. Sobatan Iisus teravas mäni suimpert՚he i openzi sigä.

²² Rahvaz čududelihe hänen opendushe. Hän openzi muga kut se, kenel om vald, a ei kut käskištonopendajad.

²³ Siloi lidnan suimpert՚he tuli mez՚, kudambas oli pagan heng. Hän kidastaškanzi:

²⁴ «Midä sinä meišpäi tahtoid, Iisus Nazaretalaine? Sinä oled tulnu vemha meid surmha! Minä tedan, ken sinä oled – Jumalan Pühä!»

²⁵ No Iisus kel՚di henged kovas: «Ole vaikti! Lähte hänespäi!»

²⁶ Siloi pagan heng peksaškanzi mest, kidastaškanzi komedal änel i läksi hänespäi.

²⁷ Kaik čududelihe i küzeliba toine tošt: «Mi nece om? Ka mitte nece uz՚ openduz om, miše hän valdanke käskeb paganoile hengile, i hö kundleba händast?»

²⁸ I teravas hänen polhe tedištiba kaikjal, ümbri kaikes Galilejas.

Iisus tervehtoitab Simonan anopen i toižid läžujid

²⁹ Suimpertišpäi lähttes hö pigai tuliba Simonan i Andrejan kodihe. Jakov i Joan oliba mugažo ühtes heidenke.

³⁰ Simonan anop՚ venui sijal, hänel oli žar, i hänen polhe sanuiba kerdalaz Iisusale.

³¹ Iisus mäni hänennoks, oti kädes, abuti libuda. Kibu sid՚-žo läksi Simonan anopespäi, i hän zavodi adivoičetada heid.

³² Ehtkoižel, konz päiväine oli lasknus, Iisusannoks todihe kaikid läžujid i mugomid, kenes eliba pahad henged.

³³ Rahvaz kaikes lidnaspäi oli keradanus verajannoks.

³⁴ Hän tegi tervhikš äi mehid, kudambad läžuiba erazvuiččil kibuil, küksi äi pahoid hengid i ei andand heile pagišta, ved՚ hö teziba, miše hän om Messia.

Iisus lähteb Kapernaumaspäi

³⁵ Aigoiš homendesel, konz oli völ pimed, Iisus nouzi i läksi irdale. Hän mäni rahvahatomha tahoze i loiči sigä Jumalale.

³⁶ Simon i hänenke olijad läksiba ecmaha Iisusad

³⁷ i löuziba händast. Hö sanuiba hänele: «Kaik eciba sindai.»

³⁸ No Iisus sanui: «Mängam nügüd՚ lähembaižihe külihe i lidnoihe. Minei tarbiž sinna-ki veda Jumalan sana, sen täht minä olen-ki tulnu.»

³⁹ Muga hän läksi i käveli kaikjal Galilejas, saneli Jumalan sanad äjiš suimpertiš i küksi pahoid hengid.

Iisus tegeb tervheks prokazas läžujan

⁴⁰ Iisusannoks tuli prokazas läžui, lanksi kombuile, pakičeškanzi hänel abud i sanui: «Ku sinä tahtoid, ka void puhtastada mindai.»

⁴¹ Iisusale tegihe žal՚ händast. Hän oigenzi käden, kosketi mest i sanui: «Minä tahtoin. Tehte puhthaks.»

⁴² Neniden sanoiden jäl՚ghe kibu kerdalaz läksi hänespäi, i hän tegihe puhthaks.

⁴³ Iisus kovil sanoil käski hänele sid՚-žo lähtta täspäi

⁴⁴ i sanui: «Kacu, ala pagiže necen polhe nikenele. Mäne vaiše, ozutade papile i ve Jumalale lahj, kudamban oli käsknu Moisei antta puhtastandas, todištuseks heile.»

⁴⁵ No sigäpäi lähttes nece mez՚ zavodi kaiktäna pagišta i sanelda vestid necen polhe, muga miše Iisus ei voind jo peitmata tulda ni ühthe lidnaha. Hän eläškanzi rahvahatomiš tahoiš, i kaikjalpäi hänennoks tuleskeli rahvast.