Ezmäine kirjeine fessalonikalaižile 1 - Uz' Zavet

Ezisanad

¹ Minä, Pavel, Siluan da Timofei oigendam tervhensanoid Fessalonikan uskondkundale, kudamb eläb Tatas Jumalas i Ižandas Iisusas Hristosas. Armoid da mirud teile Jumalas, meiden Tataspäi, i Ižandas Iisusas Hristosaspäi.

Fessalonikalaižiden elo da uskond

² Mö kitäm kaiken Jumalad teiš kaikiš i johtutam teid ičemoi loičendoiš.

³ Meiden Jumalan da Tatan edes mö väzumata johtutelem, kut uskond om oigendanu teid azjoihe, armastuz – radoihe i kut tirpten tö panet teiden nadejad meiden Ižandaha Iisusaha Hristosaha.

⁴ Mö tedam, velled, miše Jumal armastab teid i om teid valičenu.

⁵ Meil saneltud hüvä vest՚ tuli teidennoks ei vaiše sanoin, a Pühän Hengenke da vägenke, i sihe voib uskta. Iče-ki tö tedat, kut mö elim teiden keskes, teiden hüvüdeks.

⁶ Tö elit meiden ozutesen mödhe da Ižandan mödhe, muga miše sures ahtištuses tö otit sanan südäimehe ihastusenke, mittušt Pühä Heng andoi.

⁷ Muga tö tegitoiš ozuteseks Makedonian da Ahaijan uskojile.

⁸ Teiden keskespäi Ižandan sana kului ei vaiše Makedoniaha da Ahaijaha, a kaikiš toižiš-ki sijoiš teiden uskond Jumalaha tegihe tutabaks. Meile ei tarbiž pagišta neciš.

⁹ Ved՚ kaik pagižeba siš, midä tegi meiden tulend teidennoks: tö kärauzitoiš sel՚gin tühjiže jumaloihe i zavodit loita eläbale, todesižele Jumalale.

¹⁰ Tö zavodit varastada taivhaspäi hänen Poigad, kudamban hän eläbzoiti kollijoišpäi, Iisusad, kudamb päzutab meid tulijas vihaspäi.