Yahuda-ne̱ 1 - Mɑ‑to̱ Shir Taku̱rda-o swo̱r o-nu pu̱-o̱

Bo̱r-o gaan Ma-to̱ ka Shir to̱mmo̱nte̱ Wà u̱n wu̱ Ye̱so rem na

¹ N-ga N-ga, Shir no̱mo̱g u̱t-ma u̱n tat-ne̱ na ne̱ be-to̱ u̱n yan-Rwo̱r u̱n Ma-to̱ Shir o-da u̱t-mo̱o̱r ne̱, u̱s-co̱w ne̱ u̱n ho̱n u̱n ho̱n.

² Amba m-mo̱ka u̱n kà da-o̱ u̱r-bu̱ste̱ o̱, wu̱ nomu̱tu̱ na u̱t-ma be-u̱r Wà u̱n wu̱ Ye̱so, wu̱ Shir no̱me̱ ho̱no o-dak u̱n bu̱-yo u̱n wu̱ à, da-o̱ u̱r-ko̱m tomso Ye̱so wargu̱ru̱ wan-gwo̱mo-to̱ u̱n ko̱ yo ke rii-yo remen Shir daagne̱ wu̱.

³ Wo̱ gu̱te̱ Wà-wu̱ Shir, o hyanu̱ru̱ se̱ps-mo̱ Shir. Wo̱ hyene̱ wu̱, ragaan-wu̱ ro̱ u̱n Shir ne̱. Wu̱ ro̱ bo̱k ho̱no o-dak u̱n ma-to̱ u̱n wu̱ to̱ u̱r-be̱e̱b. Bo̱ wu̱ soksu̱tu̱ na ba'as-u̱t na à, wu̱ daaru̱ n-To̱n u̱n shir, wu̱ she'etu̱ru̱ u̱n be-de u̱t-gwo̱mo n-riib o̱ u̱n Shir Wa-u̱t-Hyat.

Wà-wu̱ Shir jiishte̱ yan-to̱m-ye̱ Shir

⁴ Wà-wu̱ Shir jiishte̱ yan-to̱m-ye̱ Shir. Shir ak wu̱ Wà u̱n wu̱. Kane̱ wu̱ jiishe̱ ye̱ be-de u̱n ka jin-de.

⁵ Shir ze̱e̱ru̱ wu̱, “Wo̱ Wà re wu̱, Caane̱ u̱m waragte̱ Tato ru.” Komo Shir doog m-rwo̱r u̱n ma-to̱ u̱n wu̱ u̱n nu-o̱ u̱n wu̱ ken wu̱, wu̱ zee, “Man warag Tato u̱n wu̱, Wu̱a warag Wà re.” Amba wu̱ tak m-ze̱e̱ u̱n yan-to̱m-ye̱ u̱n wu̱ kaane̱ á.

⁶ Da-o̱ Shir to̱mne̱ Wà u̱n wu̱, wu̱ co, u̱n ho̱no o-dak à, wu̱ ze̱e̱ru̱, “Yage̱ yan-to̱m-ye̱ Shir kap ye̱ kwu̱ktu̱tu̱ wu̱, ye̱ nomote̱ wu̱ u̱r-bo̱ngo̱n.”

⁷ Shir ru̱ru̱tu̱ na ma-to̱ u̱n yan-to̱m-ye̱ u̱n wu̱. Wu̱ ze̱e̱ru̱, “Wu̱ ro̱ m-muut u̱n yan-to̱m-ye̱ u̱n wu̱ u̱ntu̱n m-yo, Gu̱w-ne̱ ye̱ u̱n wu̱ u̱ntu̱n rem-de o-ra.”

⁸ Amba u̱n ma-u̱t Wà u̱n wu̱, wu̱ zee, “Wo̱ Shir, gwo̱mo-u̱t ru to̱ m-ta to̱ á. Piish u̱n ma-to̱ o-nip, to̱ ro̱ gwo̱o̱b-yo u̱n gwo̱mo-u̱t ru.

⁹ O bo̱k o-nip. Wo̱ u̱n no̱m u̱r-ba'as á. Remen kaane̱ o̱, me̱, Shir ru, u̱m dagantu̱ wo̱, U̱m sagabu̱tu̱ wo̱ u̱t-gwo̱mo arge̱ o̱r ru ne̱ o-zak ne̱.”

¹⁰ Wu̱ ze̱e̱ru̱ wu̱ komo, “Wan-Ko̱yan o̱, cin u̱r-takan, wo̱ no̱me̱ o-to̱n o-dak ne̱.

¹¹ Komo to̱a tees. Wo̱ ne̱, wo̱a te á. O-dak o-to̱n ne̱ to̱a tees u̱ntu̱n bo̱ o-gund ro̱ m-ta à.

¹² Wo̱a putum to̱ u̱ntu̱n u̱t-gund, Wo̱a su̱gu̱ to̱ bo̱ ne̱t ro̱ m-su̱ge̱ matuku-u̱t ut à. Amba wo̱, wo̱a barme̱ á. Komo hak-u̱s ru se a te á.”

¹³ Shir dooru̱ m-ze̱e̱ u̱n Wà u̱n wu̱, “She'et u̱n ka be-de u̱t-gwo̱mo de, har u̱m ru̱'u̱t yan-yage̱-u̱t ru waragte̱ rii-yo o he m-yawag u̱n na-u̱s ru à.” Shir tak m-ze̱e̱ yan-to̱m-ye̱ u̱n wu̱ kaane̱ á.

¹⁴ Ye̱ yan-to̱m-ye̱ Shir gu̱w-ne̱ ye̱ cot. Ye̱ ku̱kt-to̱ to̱ Shir to̱mne̱ remen ye̱ no̱mu̱té̱ hun-ne̱ ye̱ he kum u̱n gwu̱ à, m-gu̱w.