СВЯТОЙ АПОСТОЛ ПАВЕЛЫН ТИТЛАН КОЛТЫМО СЕРЫШЫЖЕ 3 - У Сугынь

3 ГЛАВА 1-11 Порым ыште. 12-15 Каҥаш ден саламлымаш.

¹ Тӱрлӧ вуйлатыше да тӧра-влаклан мут колыштшо лийышт манын, ӱшаныше-влаклан эре ушештарен шого, нуным колыштышт да кеч-могай поро пашам ышташ ямде шогышт.

² Нигӧн ӱмбаке осалым ынышт ойло, нигӧ дене ынышт ӱчаше, тыматле, чыла еҥлан поро кумылан лийышт.

³ Ондак меат шонен моштыдымо, мутым колыштдымо, йомшо лийынна, сутланымын да тӱрлӧ ракатланымын кулышт улына ыле: осалланен да кӧранен иленна, йырнык да икте-весынам ужмышудымо лийынна.

⁴ А кунам мемнан Утарыше Юмынан порылыкшо да айдемым йӧратымыже почылтын,

⁵ Тудо мемнан ыштыме чын пашаланна огыл, а угыч шочыктышо мушмаш да Святой Шӱлыш дене уэмдымаш гоч шке порылыкшо дене мемнам утарен.

⁶ Мемнан Иисус Христос Утарышына гоч Святой Шӱлышым ӱмбакына Юмо лыҥ опталын.

⁷ Тыгеракын ме, Тудын порылыкшо дене чыныш лукмо-влак, ӱшанен вучымо курымашлык илышым налын кертына.

⁸ Тиде шомак чын. Мый тидым тыланет поснак палемдыктынем. Юмылан ӱшанаш тӱҥалше-влак поро пашалан тыршышт. Тидыже еҥ-влаклан сай да пайдале.

⁹ Но шотдымо тӱрлӧ ӱчашымаш, тукымвожым шымлымаш да закон нерген икте-весе ваштареш ойлымаш деч кораҥ, тиде нимогай пайдам ок пу да кӱлдымӧ.

¹⁰ Ик гана да вес гана шижтарымекет, шояк туныктымашан еҥ деч кораҥ.

¹¹ Тыгай еҥ пужлен, тудо языкым ышта, шкенжым шке титаканыш луктеш манын, тый палет.

¹² Кунам тый декет Артемам але Тихикым колтем, мый декем Никопольыш вашке тол, тушто телым эртараш шонен пыштенам.

¹³ Закон туныктышо Зинам да Аполлосым корныш тыршен ямдыле, нунылан мо кӱлеш, тек чылажат лийже.

¹⁴ Мемнан-влакат, саскадыме лияш огыл манын, полыш кӱлмӧ годым тек поро пашам тыршен ышташ тунемыт.

¹⁵ Мый денем улшо-влак чылан тыйым саламлат. Мемнам ӱшанымаште йӧратыше-влакым саламле. Чыланда дене Юмын порылыкшо лийже. Аминь.