СВЯТОЙ АПОСТОЛ ПАВЕЛЫН ТИТЛАН КОЛТЫМО СЕРЫШЫЖЕ 2 - У Сугынь

2 ГЛАВА 1-15 Чын туныктымылан келшыше илыш.

¹ А тый яндар туныктымаш дене келшышын ойло.

² Илалше пӧръеҥ-влакым айык шонымашан, чын илыше, ушан-шотан, ӱшанымаште, йӧратымаште, чытымаште чын лияш туныкто.

³ Тыгак илалше ӱдырамаш-влакат святой-влаклан келшен толшо вургемым чийышт, еҥ ӱмбаке ынышт ойло, аракан кулжо ынышт лий, порылан веле туныктышт.

^4-5 Нуно самырык ӱдырамаш-влакым марийыштым, йочаштым йӧраташ, ушан-шотан, яндар, сурт сомылкам тыршен шуктышо, поро, шке марийыштым колыштшо лияш туныктышт. Юмын шомакше ынже мыскылалт.

⁶ Рвезе-влаклан ушан-шотан лияш каҥашым пу,

⁷ тый шке поро пашат дене чыла шотыштат илыш корным ончыктышо лий. Тек туныктымет яндар, пагалымашым лукшо, локтылалтдыме лийже.

⁸ Ойлымет чын лийже, титаклаш амалым ынже пу, тунам ваштареш шогышо-влак мемнан нерген нимо удам каласен огыт керт, вожылмашке пурат.

⁹ Кул-влакым озаштым чыла шотыштат колышташ, келшыше лияш туныкто, ваштареш ынышт ойло,

¹⁰ ынышт шолышт, эре поро да ӱшанле лийышт, тыге нуно мемнан Утарышынан, Юмынан, туныктымыжлан чыла шотыштат поро чапым кондат.

¹¹ Юмын утарыше порылыкшо чыла еҥлан почылтын.

^12-13 Ӱшаныме поро пиалым – Кугу Юмын, мемнам Утарыше Иисус Христосын, чапшын шумыжым – вучымына годым Юмын порылыкшо мемнам шотдымо илышым да тӱнясе сутланымым кораҥдаш виктара, кызытсе курымышто яндар уш-акыл дене, чын, Юмым пагален илаш туныкта.

¹⁴ Мемнам чыла закондымылык деч утараш, поро пашам тыршен ыштыше калыкым Шкаланже эрыкташ манын, Тудо Шкенжым мемнан верч пуэн.

¹⁵ Тидым ойло, каҥашым пуэде, уло властетым кучылтын шылтале. Тек нигӧат тыйым шотлыдымо ок лий.