РИМЛЯН-ВЛАКЛАН 8 - У Сугынь

8 ГЛАВА 1-17 Юмын Шӱлыш почеш илымаш. 18-30 Ончыкылык чап. 31-39 Юмын йӧратымашыже.

¹ Тыгеракын‚ кӧмыт Христос Иисус дене ушнен шогат да кап ден чонын йодмышт почеш огыл‚ а Шӱлыш почеш илат‚ нунылан ынде нимогай судитлымашат уке.

² Христос Иисус гоч илышым пуышо Шӱлыш закон мыйым языкын да колымашын законжо деч утарен.

³ Айдемын кап ден чонжо начар улмылан кӧра мом закон ыштен кертын огыл‚ Юмо тудым ыштен: язык верч Тудо шке Эргыжым языкан айдеме гайым колтен да тиде айдеме кап дене языкым титаканыш луктын.

⁴ Тыгеракын, законын йодмыжо мемнан, кап ден чон йодмо почеш огыл, а Шӱлыш почеш ыштыше-влакын, илышыште шукталтын.

⁵ Кап ден чон йодмо почеш илыше-влак кап ден чонысо нерген веле шонат‚ а Шӱлыш почеш илыше-влак – Шӱлыш дене кылдалтше нерген.

⁶ Кап ден чонын шонымыжо – колымаш‚ а Шӱлышын шонымыжо – илыш да тыныслык.

⁷ Кап ден чонын шонымыжо Юмын ваштареш тушманлымаш лиеш‚ вет тудо Юмын законым ок колышт да колыштынжат ок керт.

⁸ Кап ден чон йодмо почеш илыше-влак Юмылан йӧрышӧ лийын огыт керт.

⁹ А Юмын Шӱлыш тендан кӧргыштӧ ила гын‚ те кап ден чон йодмо почеш огыл‚ а Шӱлыш почеш иледа. А кӧн кӧргыштӧ Христосын Шӱлышыжӧ уке‚ тудо Христосын огыл.

¹⁰ Христос тендан дене гын‚ капда языклан колышо‚ а чын ыштымылан кӧра Шӱлыш тыланда илышым конда.

¹¹ Иисусым колымаш гыч Ылыжтышын Шӱлышыжӧ тендан кӧргыштыда ила гын‚ Христосым колымаш гыч Ылыжтыше кӧргыштыда илыше Шӱлышыж дене тенданат колышаш капдам илышым ышта.

¹² Тугеже‚ иза-шольо-влак‚ ме кап ден чонлан огыл парыман улына: ме кап ден чонын йодмышт почеш илышаш огынал.

¹³ Вет кап ден чон йодмо почеш иледа гын‚ тендам колымаш вуча‚ а кап ден чонын ыштымыжым Шӱлыш дене пытареда гын‚ илаш тӱҥалыда.

¹⁴ Кӧм Юмын Шӱлыш вӱда, чылан Юмын эргыже улыт.

¹⁵ Адак лӱдын илаш огыл манын‚ те кул шӱлышым огыл‚ а эргылык Шӱлышым налында, Тудын дене ме «Авва! Ачай!» манын ӱжына.

¹⁶ Юмын шочшыжо улмынам Юмын Шӱлыш Шкежак мемнан шӱм-чон шӱлышна дене таныкла.

¹⁷ Шочшыжо улына гын‚ тугеже тыгак наследник улына‚ Христос дене пырля Юмын наследникше улына. Ме Христос дене пырля орланена гын‚ Тудын дене пырля чапышкыжат шуына.

¹⁸ Мый ӱшанем: мемнан илышыште почылтшаш чап дене таҥастарена гын, кызытсе жапыште орланыме – нимо.

¹⁹ Юмын ыштыме уло тӱня Тудын икшывыж-влакын чапланен почылтмыштым вученак вуча‚

^20-21 вет тӱням кӱлдымашын кид йымакыже налме. Тиде шке кумылын огыл‚ а кид йымаке налшылан кӧра лийын. Шӱймашын куллыкшо гыч Юмын икшывыж-влакын эрыкышкышт да чапышкышт лукмо лиям манын, Юмын ыштыме уло тӱня шкежат ӱшана.

²² Ме палена‚ Юмын ыштыме уло тӱня кызыт мартеат кечкыжеш да орлана.

²³ Тудо шкет огыл орлана‚ а меат‚ икымше пӧлек семын Юмын Шӱлышым налше-влак‚ эргылыкеш пуртымым, капнам сулен налмым вучен, чон кӧргына дене кечкыжына.

²⁴ Вет ӱшанен вучымо дене ме утарыме лийынна‚ а ӱшанен вучымын шукталтмыже коеш гын‚ ӱшанен вучымаш уке. Мо шинча ончылно шога, кӧ тудым ӱшанен вуча?

²⁵ Но мом огына уж, тудым ӱшанен вучена гын, чытенак вучена.

²⁶ Шӱлышат мыланна, начар-влаклан, полша‚ вет мо нерген да кузе кумалшашымат ме огына пале. Шӱлыш Шкежак каласен мошташ лийдыме шӱлалтыш дене мемнан верч тырша.

²⁷ Шӱлышын шонымыжым шӱм-чоннам шымлыше Юмо пала‚ вет Шӱлыш святой-влак верч Юмын эрыкше дене келшышын тырша.

²⁸ Ме палена: Юмым кӧ йӧрата да кӧм Тудо шке эрыкше почеш ӱжын‚ нунылан чылажат порылан лиеш.

²⁹ Эргыже шуко иза-шольо коклаште икымше шочшо лийже манын, ончылгоч пален налме еҥже-влакым Юмо Шкенжын Эргыж гай лияш ончылгоч палемден.

³⁰ А кӧм Юмо ончылгоч палемден‚ тудымак ӱжын; кӧм ӱжын‚ тудымак чыныш луктын; а кӧм чыныш луктын‚ тудланак Шкенжын чапшым пӧлеклен.

³¹ Ме тидлан мом каласена? Юмо мемнан верч гын‚ кӧ мемнан ваштареш лийын кертеш?

³² Тудо шке Эргыжымат чаманен огыл, но чыланна верч пуэн гын‚ Тудын дене пырля мыланна чыла молымат ок пӧлекле мо?

³³ Юмын ойырен налме-влакым кӧ титаклен кертеш? Нуным Юмо чыныш луктеш!

³⁴ Кӧ титаканыш луктын кертеш? Христос Иисус, Тудо колен, адакшым ылыжын. Тудак Юмын пурла могырыштыжо шинча да мемнан верч кумалеш!

³⁵ Юмын йӧратымыж деч кӧ мемнам ойырен кертеш? Йӧсӧ але нелылык‚ поктылмаш але шужымаш‚ вургем ситыдымаш але шучкылык‚ але керде?

³⁶ Тыге возымо: «Тылат верч мемнам кече мучко пуштедат‚ шӱшкылшаш шорыклан шотлат».

³⁷ Но мемнам Йӧратышын полшымыж дене ме чыла годымат сеҥымашке шуына.

^38-39 Вет мый ӱшанем: Господьна Иисус Христос гоч Юмын мыланна ончыктымо йӧратымашыж деч колымашат‚ илышат‚ Суксо-влакат‚ Тӱҥалтыш-влакат‚ Куат-влакат‚ кызытсат‚ ончыкылыкат‚ кӱкшытат‚ келгытат‚ Юмын ыштыме нимоат мемнам ойырен огыт керт.