РИМЛЯН-ВЛАКЛАН 7 - У Сугынь

7 ГЛАВА 1-6 Закон деч эрык. 7-25 Закон да язык.

¹ Иза-шольо-влак, – мый кызыт законым палыше-влаклан ойлем, – айдемын илымыж годым веле ӱмбалныже законын вийже улмым огыда пале мо?

² Марлан лекше ӱдырамаш марийжын илымыж годым закон почеш тудын дене кылдалтын. А марийже колымеке‚ марийже деке тудым кылдыше закон деч эрыкан лиеш.

³ Тыгеже марийже илыме годымак весе дене ила гын‚ яжарланышылан шотлалтеш‚ но‚ марийже колымеке‚ тиде закон деч тудо эрыкан лиеш‚ сандене, весылан марлан лектеш гынат‚ ок яжарлане.

⁴ Тендан денат тыгак‚ иза-шольым-влак: весын, колымаш гыч Ылыжтымын‚ лияш манын, теат Христосын капше дене законлан коленда. Тыге ме чылан Юмылан саскам кондена.

⁵ Кунам ме шкенан кап ден чон йодмо почеш иленна, законлан кӧра пален налме языкан сутланымаш мемнан капыште ыштен, да ме колымашлан саскам конденна.

⁶ Кызыт ме тиде закон деч ойырленна‚ мо мемнам кылден, тудлан коленна‚ тыгеже ме законын ожнысо букваже почеш огыл‚ а Шӱлыш уэмдыме почеш Юмылан служитлена.

⁷ Мом каласена? Закон язык мо? Уке. Туге гынат закон огеш лий гын‚ мо тугай язык, мый ом пале ыле. Закон «ит сутлане» манын ок ойло гын‚ мо тугай сутланымаш, мый ом пале ыле.

⁸ Но‚ законысо кӱштымаш деч амалым налын‚ язык мыйын кӧргыштем тӱрлӧ сутланымашым шочыктен‚ вет закон деч посна язык – колышо.

⁹ Мый ондакше закон деч посна иленам‚ но кунам законысо кӱштымаш пуалтын‚ язык ылыжын‚

¹⁰ а мый коленам. Тыгеракын илышым кондышаш кӱштымаш мылам колымашым конден.

¹¹ Язык‚ законысо кӱштымаш деч амалым налын‚ мыйым ондален да тиде кӱштымаш дене пытарен.

¹² Тугеже, закон святой‚ кӱштымашат святой‚ чын да поро.

¹³ Тыгеже тиде порыжо мылам колымашым конден мо? Уке. Но язык, языкан улмыжо палдырныже манын‚ поро гоч мылам колымашым конден, да законысо кӱштымаш гоч язык моткоч чот языкан лийын.

¹⁴ Ме палена‚ закон – Юмын Шӱлыш деч‚ а мый капан улам‚ языклан кулыш ужалыме.

¹⁵ Мом ыштем‚ ом умыло: мом ыштынем‚ тудым ом ыште‚ а мом ужмем ок шу‚ тудым ыштем.

¹⁶ Мом мый ынем ыште‚ тудым ыштем гын‚ тугеже закон поро манын келшем.

¹⁷ Тугеже ынде тидым мый шке огыл ыштем‚ а кӧргыштем илыше язык ышта.

¹⁸ Мый палем: мый денем, вес семынже капыштем, нимо поро уке. Мый порым ыштынем‚ но тудым ыштен ом керт.

¹⁹ Могай порым ыштынем‚ тудым ом ыште‚ но могай осалым ынем ыште‚ тудым ыштем.

²⁰ А мом мый ынем ыште‚ тудым ыштем гын‚ тыгеже ынде тидым мый шке огыл‚ а кӧргыштем илыше язык ышта.

²¹ Тыгеракын‚ мый тыгай законым пален налынам: кунам мый порым ыштынем‚ осал паша лектеш.

²² Кӧргӧ чонем дене мый Юмын законлан куанем‚

²³ но шке кап-кылыштем вес законым ужам. Мыйын ушем дене сайлан шотлымо закон дене тиде закон кучедалеш да кап-кылыштем илыше языкын законыш мыйым кучен петыра.

²⁴ Могай пиалдыме айдеме мый улам! Кӧ мыйым колымаш кид йымалсе капем деч утара?

²⁵ Господьна Иисус Христос гоч Юмылан таум ыштем! Тыгеракын‚ мый ушем дене гына шке кӧргыштем Юмын законжылан служитлем‚ а капем дене язык законын кулжо улам.