РИМЛЯН-ВЛАКЛАН 6 - У Сугынь

6 ГЛАВА 1-14 Языклан колышо‚ Христос дене ушнымаште илыше. 15-23 Языкын куллыкшо деч эрык.

¹ Мом каласена? Юмын порылыкшо кугемже манын‚ мыланна языкеш кодман мо? Уке.

² Ме, языклан колышо-влак, кузе эше языкыште илен кертына?

³ Але огыда пале: ме чылан‚ Христос Иисус дене ушнаш тынеш пурышо-влак‚ Тудын колымашыж деке ушнаш тынеш пуренна?

⁴ Тыгеракын, ме Тудын колымашыж деке ушнаш тынеш пурымо дене Христос дене пырля тоялтынна: кузе Христос колымаш гыч Ачан чапше дене ылыж кынелын‚ тугак меат уэмдыме илыш дене илышаш улына.

⁵ Ме икгай колымаш дене Тудын деке ушненна гын‚ икгай ылыжмаш денат Тудын деке ушымо лийына.

⁶ Ме палена: языкан капым укешке лукташ да мыланна тылеч вара языкын кулжо лияш огыл манын‚ «тошто айдемынам» Христос дене пырля ыресеш пудалыме.

⁷ Вет колышо еҥ язык деч эрыкан.

⁸ А ме Христос дене пырля коленна гын‚ Тудын дене пырля илашат тӱҥалына манын ӱшанена.

⁹ Ме палена: Христос колымаш гыч ылыжын, да Тудо ынде ок коло, Тудын ӱмбалне ынде колымашын вийже уке.

¹⁰ Могай колымаш дене колен‚ языклан ик гана эрелан колен‚ могай илыш дене ила‚ Юмылан ила.

¹¹ Тыгак теат шкендам языклан колышылан‚ а, мемнан Господьна Иисус Христос дене ушнен, Юмылан илышылан шотлыза.

¹² Тугеже‚ тек язык тендан колышаш капыштыда ок озалане да сутланымашым колышташ тендам ок ӧкымлӧ.

¹³ Шкендан кап ужашда-влакым осалын паша ӱзгарже семын языклан ида пу‚ а, колымаш гыч илышыш кусненда гын, шкендам Юмылан пуыза, кап ужашда-влакым чын ыштымашын паша ӱзгарышт семын Юмылан пуыза.

¹⁴ Язык тендан озада ынже лий‚ вет те закон кид йымалне огыл‚ а Юмын порылыкшо йымалне улыда.

¹⁵ Тугеже, закон кид йымалне огынал‚ а Юмын порылыкшо йымалне улына гын‚ языкым ышташ тӱҥалына мо? Уке.

¹⁶ Огыда пале мо: кӧлан те шкендам кул семын колышташ пуэда‚ тудынак кулжо улыда? Те але языкым колыштыда‚ тидыже колымашке наҥгая‚ але Юмым колыштыда‚ тидыже чыныш лекмашке наҥгая.

¹⁷ Те ондак языкын кулжо лийында, но, Юмылан тау‚ тендам могай туныктымашым колышташ пуымо, тугайым уло шӱм дене кызыт колышташ тӱҥалында.

¹⁸ Язык дечын эрыкыш лукталтмеке‚ те чын ыштымын тарзыже лийында.

¹⁹ Те чыла еҥ гай начар улыда, сандене тыланда айдемын шонымыж семын ойлем. Кузе те ондак кап ужашда-влакым тӱрлӧ осал пашам ышташ амырчыклан да закондымылыклан кулыш пуэнда‚ тугак, святой лияш манын, нуным ынде чын ыштымылан служитлаш пуыза.

²⁰ Кунам те языкын кулжо лийында‚ чын ыштыме деч эрыкан лийында.

²¹ Тунам те могай саскам налында? Тугайым, могайже деч ынде вожылыда‚ вет тудын мучашыже – колымаш.

²² А кызыт, язык деч эрыкыш лукталтмеке да Юмын тарзыже лиймеке‚ святой илышыш наҥгайыше саскада уло, тудын мучашыже – курымашлык илыш.

²³ Вет языкын акше – колымаш‚ а Юмын поро пӧлекше – Господьна Иисус Христос пелен налме курымашлык илыш.