РИМЛЯН-ВЛАКЛАН 3 - У Сугынь

3 ГЛАВА 9-20 Чын ыштыше иктат уке. 21-31 Ӱшанымаш гоч чыныш лекмаш.

¹ Тыгеже иудей лияш мо дене сайрак, да пӱчмаш могай пайдам пуа?

² Чыла шотыштат сайже шуко‚ эн ондак тиде: Юмын шомак иудей-влаклан ӱшанен пуалтын.

³ Южышт ӱшанле лийын огытыл гынат‚ нунын ӱшанле огыл улмышт Юмын ӱшанле улмыжым укешке луктеш мо?

⁴ Уке! Еҥ-влак чылан шояче лийыт гынат‚ Юмо чын. Возымо: «Ойлымет годым Тый чыныш лектат, Тыйым судитлыме годым сеҥет».

⁵ Мемнан чын огыл ыштымына Юмын чын ыштымыжым утларак раш ончыкта гын‚ мом каласена? Юмо шыдыжым ончыктымо дене чын ок ыште манын кертына мо? Мый айдеме семын ойлем.

⁶ Уке! Тыге гын‚ Юмо кузе тӱням судитлен кертеш ыле?

⁷ Но Юмын чынже мыйын чын огылемлан кӧра Тудлан шукырак чапым конда гын, молан мыйым языкан семын судитлаш?

⁸ Поро лийже манын‚ осалым ышташ тӱҥалына мо? Тидлан туныктена манын‚ южышт мемнам мыскылат. Тыгай еҥ-влак судитлалтмыштым сулен налыт.

⁹ Тугеже ме, иудей-влак‚ моло деч сайрак улына мо? Изишат уке! Ме титаклымашым луктынна ыле: иудей-влакат‚ эллин-влакат – чылан языкын кид йымалныже улыт.

¹⁰ Тыге возымо: «Чын ыштыше иктат уке‚

¹¹ шонен моштышат уке‚ нигӧ Юмым ок кычал.

¹² Чылан корно гыч кораҥыныт‚ икте-кодде йӧрдымӧ лийыныт. Порым ыштыше уке‚ иктат уке.

¹³ Нунын логарышт – почмо шӱгар‚ йылмышт дене ондалкалат‚ тӱрвышт гыч кишке аяр йога,

¹⁴ нунын умшашт каргымаш да кочо дене темын.

¹⁵ Вӱрым йоктараш йолышт писе,

¹⁶ нуно корнешышт шалатылмашым да орлыкым кодат,

¹⁷ тыныслык корным огыт пале,

¹⁸ Шинча ончылнышт Юмо деч лӱдмаш уке».

¹⁹ А ме палена: законышто мо ойлалтеш‚ чылажат закон йымалсе-влаклан веле. Тыгеже‚ кажне еҥ шып лийшаш, да уло тӱня Юмын ончылно титакан лиеш.

²⁰ Вет законым шукташ тыршыме дене ик айдемат Юмын ончылно чыныш ок лек. Закон гоч мо тугай язык манын умылымаш веле толеш.

²¹ А кызыт Юмын чынжым закон деч посна палдарыме. Закон да пророк-влак тиде чын нерген таныклат.

²² Юмын тиде чынже ӱшаныше кажне айдемын кӧргыштыжӧ Иисус Христослан ӱшаныме дене лиеш. Нунын коклаште нимогай ойыртем уке,

²³ вет чылан языкым ыштеныт да Юмын чапше деч посна кодыныт,

²⁴ но Христос Иисус гоч шуктымо сулен налмаш дене Юмын порылыкшылан кӧра чылалан чыныш лекмаш пӧлеклалтеш.

^25-26 Юмо Христосым сӧрасымашым ыштыше жертвылан пыштен, сӧрасымаш ӱшаныме гоч Тудын Вӱржӧ дене лиеш. Тыге Юмо шке чынжым ончыкта. Шуко чытымыж дене Тудо еҥ-влакын ончычсо языкыштым кудалтен да кызытат, мемнан жапыште, Шкенжын чынжым ончыкта: Тудо Шкеже чын да Иисуслан ӱшаныше-влакым чыныш луктеш.

²⁷ Тыгеже, мо дене мыланна моктанаш? Моктанаш амал уке. Могай закон дене амал уке? Пашам йодшо закон дене мо? Уке‚ ӱшанымашым йодшо закон дене.

²⁸ Ме тыге шотлена: айдемым ӱшанымашыже чыныш луктеш, законым шуктымо тыште шотыш ок налалт.

²⁹ Юмыжо иудей-влакын веле Юмышт мо? Тудо Юмым палыдыме-влакынат Юмышт огыл мо? Туге‚ Юмым палыдыме-влакынат Юмышт‚

³⁰ вет Юмо икте‚ Тудо пӱчман-влакымат ӱшанымыштлан кӧра чыныш луктеш‚ пӱчдымӧ-влакымат Христослан ӱшаныме гоч чыныш луктеш.

³¹ Тыгеже‚ тидлан ӱшаныме дене ме законым укеш луктына мо? Уке. Законым пеҥгыдемдена веле.