РИМЛЯН-ВЛАКЛАН 2 - У Сугынь

2 ГЛАВА 1-16 Юмын чын судшо. 17 – 3:8 Закон да иудей-влак.

¹ Титаканыш лукшо айдеме‚ кеч-кӧ тый лий‚ шкендым нигузе чыныш луктын от керт: весым титаканлан шотлымет годым шкендымат титаканыш луктат‚ вет тый‚ весым титаканыш лукшо‚ шкежат тудымак ыштет.

² Юмо тыге ыштышым чынжымак титаканыш луктеш манын‚ ме палена.

³ Тый‚ тыге ыштышым титаканыш лукшо да шкежат тыгак ыштыше айдеме‚ Юмын судшо дечын утлен кодын кертам, шонет?

⁴ Але тый Тудын кугу порылыкшым, чаманымыжым да кужун чытымыжым от шотло? Юмын порылыкшо тыйым, языкетым касарыктен, Юмо деке савырынеже манын от пале мо?

⁵ Но тый ӱскырт улат, шӱмет язык деч ынеже кораҥ, сандене тый Юмын шыде кечыжлан шке ӱмбакет Тудын шыдыжым погет‚ тиде кечын Юмын чын судшо почылтын толеш‚

⁶ да Юмо кажнылан пашаж почеш тӱла:

⁷ кӧ‚ чарныде поро пашам ыштен‚ чапым‚ пагалымашым‚ колыдымашым кычалеш, тудлан курымашлык илышым пуа‚

⁸ а шкаланже пайдам кычалшылан‚ чыным колыштдымо‚ но чын огылым колыштшылан кугу шыдым пуа.

⁹ Осалым ыштыше кажне айдемылан нелылык да орланымаш лиеш‚ – ондак иудейлан‚ вара эллинлан.

¹⁰ Но порым ыштыше кажне айдемылан чап‚ пагалымаш да тыныслык лиеш‚ – ондак иудейлан‚ вара эллинлан.

¹¹ Юмо чыла еҥым ик семын онча.

¹² Кӧмыт закон деч посна языкым ыштат‚ нуно закон деч поснак пытат. А кӧмытын законышт уло да языкым ыштат‚ нуно закон дене судитлыме лийыт.

¹³ Вет законым колыштшо-влак огыл‚ а тудым шуктен шогышо-влак Юмын ончылно чыныш лукмо лийыт. –

¹⁴ Чын Юмым палыдыме-влак закондымо улыт гынат‚ закон кӱштымым шӱм-чон шупшмышт денак шуктен шогат гын‚ законышт уке гынат, нуно шкаланышт шке закон улыт:

¹⁵ нуно законын йодмыжо шӱмешышт возалтын манын ончыктат, тидын нерген тыгак совестьышт палдара, да тӱрлӧ шонымашышт нуным але титакла, але арала. –

¹⁶ Чылажат тудо кечын лиеш‚ кунам Юмо еҥ-влакын шӱм шылтымыштым, мыйын каласкалыме Поро Увер дене келшышын, Иисус Христос гоч судитла.

¹⁷ Теве тый иудей маналтат‚ законлан эҥертет да Юмо дене моктанет‚

¹⁸ законын туныктымыж дене тый Юмын эрыкшым палет‚ мо эн сай – умылет.

¹⁹ Сокырым вӱден коштшо‚ пычкемыште коштшо-влаклан волгыдо улам манын, тый ӱшанет‚

²⁰ умылыдымо-влаклан илыш корныш лукшо, кушкын шудымо-влаклан туныктышо улам, шонет‚ вет законышто шинчымаш ден чыным тичмашын ужам манын ӱшанет.

²¹ Тый, весым туныктышо, шкендым от туныкто мо?

²² «Ит шолышт» манын ойлет‚ а шкеже шолыштат? «Ит яжарлане» манше, яжарланет? Шояк юмо-влак деч йырныше‚ але нунын пӧртыштым агет?

²³ Тый, закон дене моктаныше‚ законым пудыртылмет дене Юмым чапшым волтет!

²⁴ Возымо семын «Тыланда кӧра Юмын лӱмжӧ чын Юмым палыдыме-влак коклаште мыскылалтеш».

²⁵ Законым шуктен шогет гын, пӱчмаш пайдам пуа‚ а тый законым пудыртылат гын‚ пӱчмашет пӱчдымӧ улмо дене иктак.

²⁶ Тыгеже‚ пӱчдымӧ еҥ законын кӱштымыжым шуктен шога гын‚ тудын пӱчдымӧ улмыжо пӱчмашлан ок шотлалт мо?

²⁷ Возымо законет да пӱчмашет уло гынат‚ законым пудыртылат гын‚ пӱчдымӧ‚ но законым шуктышо еҥ тыйым титаканыш луктеш.

²⁸ Тудо огыл иудей‚ кӧ тӱжвач ончымаште иудей‚ пӱчмашат тудо огыл, мо капыште коеш‚

²⁹ но тудо иудей‚ кӧ кӧргӧ чонжо дене иудей, да чын пӱчмашат тудо веле, могайым законын букваже огыл‚ а Шӱлыш айдемын шӱм-чоныштыжо ышта. Тыгай еҥлан моктымаш айдеме деч огыл‚ а Юмо деч.