РИМЛЯН-ВЛАКЛАН 16 - У Сугынь

16 ГЛАВА 1-24 Римын христиан-влакшым саламлымаш.

¹ Мемнан Фива акана дене тендам палымым ыштынем, тудо Кенхрейысе черкыште полышкала.

² Кузе святой-влаклан келшен толеш, туге тудым Господь лӱм дене вашлийза‚ мо тудын ок сите‚ чыла шотыштат полышым пуыза. Тудо шкежат шукылан полшен‚ мыламат полшен.

³ Мый денем пырля Христос Иисуслан пашам ыштыше Прискилла ден Акилалан саламым каласыза.

⁴ Нуно мыйын чонем верч вуйыштым пышташ ямде лийыныт‚ нунылан мый веле огыл тауштем‚ а чын Юмым палыдыме калык-влак кокла гыч ӱшанаш тӱҥалше-влакын чыла черкыштат таум ыштат. Тыгак нунын пӧртыштӧ погынышо черкылан салам лийже.

⁵ Ахаийыште эн ондак Христослан ӱшанаш тӱҥалше йӧратыме Епенет йолташемлан саламым каласыза.

⁶ Мыланна кӧра тыршен пашам ыштыше Мариамлан салам лийже.

⁷ Мый денем пырля петырымаште лийше, мыйын родо-тукым гыч улшо Андроник ден Юниялан салам лийже. Нуно Апостол-влак коклаште кумдан палыме улыт‚ мый дечем ончыч Христос деке савырненыт.

⁸ Господь дене ушнен шогымаште мыйын йӧратыме Амплийлан саламым каласыза.

⁹ Христос дене ушнымаште мемнан дене пырля пашам ыштыше Урбанлан да йӧратыме Стахий йолташемлан салам лийже.

¹⁰ Христос дене ушнымаште тергыме Апеллеслан саламым каласыза. Аристовулын мӧҥгысыштлан саламым каласыза.

¹¹ Мыйын родо-тукым гыч улшо Иродионлан‚ Наркиссын мӧҥгысыж-влак кокла гыч кӧ Господь дене ушнен шога, нунылан саламым каласыза.

¹² Господьлан тыршен пашам ыштыше ӱдырамаш-влак Трифена ден Трифосалан саламым каласыза. Господьлан шуко пашам ыштыше йӧратыме Персидалан саламым каласыза.

¹³ Господьын ойырен налме Руфлан да тудын аважлан саламым каласыза, тудо мыламат авам гай.

¹⁴ Асинкритлан‚ Флегонтлан‚ Ермлан‚ Патровлан‚ Ермийлан да нунын дене улшо иза-шольо-влаклан саламым каласыза.

¹⁵ Филологлан‚ Юлиялан‚ Нирейлан да тудын акажлан‚ Олимпанлан да нунын дене улшо чыла святой-влаклан саламым каласыза.

¹⁶ Святой шупшалмаш дене икте-весыдам саламлыза. Христосын черкыже-влак чылан тыланда саламым колтат.

¹⁷ Иза-шольо-влак‚ сӧрвалем: молан тендам туныктымо, тиде туныктымаш ваштареш кӧмыт шогалыт, шеледылмашым ӱдат да еҥ-влакым алгаштарынешт, нунын деч шекланыза. Нунын деч кораҥ коштса.

¹⁸ Тыгай еҥ-влак мемнан Господьна Иисус Христослан огыл служитлат‚ а шке мӱшкырыштлан тарзыланат. Нуно йӧраш тӧчымӧ, яклака мутышт дене пушкыдо кумылан еҥ-влакым ондалат.

¹⁹ Тендан мут колыштшо улмыдам чылан пален налыныт‚ сандене мый тендан верч куанем‚ да те порылык шотышто ушан, а осаллык шотышто моштыдымо лийза манын шонем.

²⁰ Тыныслыкым пуышо Юмо вашке тендан йол йымалан сатанам шалата! Господьна Иисус Христосын порылыкшо тендан дене лийже. Аминь.

²¹ Мый денем пырля ыштыше Тимофей‚ тыгак мыйын родо-тукым гыч Луций‚ Иасон да Сосипатр саламым колтат. –

²² Мыят‚ тиде серышым кагазыш возышо Тертий‚ тендам Господь дене ушнен саламлем. –

²³ Мыйымат, уло черкымат шке суртыштыжо унала вашлийше Гаий тыланда саламым колта. Оласе казнам кучышо Ераст да Кварт иза деч саламым каласыза.

²⁴ Мемнан Господьна Иисус Христосын порылыкшо чыланда дене лийже. Аминь.