РИМЛЯН-ВЛАКЛАН 14 - У Сугынь

14 ГЛАВА 1-12 Ида судитле. 13-26 Икте-весынам судитлышаш огынал.

¹ Тӱрлӧ шонымаш шотышто ӱчашыде‚ начар ӱшанымашан еҥым шке коклашкыда налза.

² Ӱшанымаш иктылан чыла кочкаш эрыкым пуа‚ весе начар улешат, пакчасаскам веле кочкеш.

³ Кӧ чыла кочкеш‚ кочдымо ӱмбаке кӱшыч ончышаш огыл‚ да кӧ ок коч‚ кочшым титаканыш лукшаш огыл‚ вет Юмо тудымат шкенжынлан шотла.

⁴ Весын тарзыжым титаканыш лукташ кӧ тый улат? Тудо шке Господьшо ончылно шога але йӧрлеш. Но тудо шогалтыме лиеш, вет тудым шогалташ Юмын куатше уло.

⁵ Южо еҥ ик кечым вес кече деч кугураклан шотла, а весылан чыла кече икгай. Тек кажне шке уш виктарымыжлан ӱшана.

⁶ Кӧ посна кечым палемда‚ тидым Господьлан ышта. Кӧ посна кечым ок палемде‚ Господьлан ок палемде. Кӧ кочкеш – Господь лӱмеш кочкеш‚ вет тудо Юмылан таум ышта‚ а кӧ ок коч – Господь лӱмеш ок коч‚ тудат Юмылан таум ышта.

⁷ Мемнан кокла гыч иктат шкаланже ок иле да шкаланже ок коло.

⁸ Ме илена гын‚ Господьлан илена‚ колена гынат‚ Господьланак колена. Илена але колена‚ ме Тудын улына.

⁹ Илыше-влакынат, колышо-влакынат Господьышт лияш манынак‚ Христос колен да ылыж кынелын.

¹⁰ А тый иза-шольычым молан титаканыш луктат? Але тыйже молан иза-шольычым ӱлык шындет? Вет ме чылан Юмын судшо ончылан шогалына.

¹¹ Возымо: «Мый илем, – ойла Господь‚ – да ончыланем кажне пулвуй сукен шичшаш‚ кажне йылме Мыйым Юмо манын чапландарышаш».

¹² Мемнан кокла гыч кажныже Юмын ончылно шке верчше мутым куча.

¹³ Тыгеракын, ме тылеч вара икте-весым судитлышаш огынал. А ончыза, иза-шольылан шӱртняш але камвозаш амалым ида ыште.

¹⁴ Господь Иисус дене ушнен, мый ӱшанем да сайын палем: шке шот дене ару огыл нимо уке‚ но айдеме иктаж-мом ару огыллан шотла гын‚ тудлан тиде ару огыл.

¹⁵ Иза-шольыч кочкышетлан ойганат гын‚ ынде тый йӧратен от ыште. Кӧн верч Христос колен‚ тудым кочкышет дене ит пытаре.

¹⁶ Мом те сайлан шотледа, тудо ынже вурсалт.

¹⁷ Юмын Кугыжаныш кочкыш-йӱыш огыл‚ а Святой Шӱлыш дене ушнымаште чын ыштымаш‚ тыныслык да куанымаш.

¹⁸ Кӧ Христослан тыге служитла‚ тудо Юмылан келша‚ калыклан пагалаш йӧра.

¹⁹ Тугеже, мо тыныслыкышке да ваш-ваш пеҥгыдемдымашке наҥгая‚ тудым кычалына.

²⁰ Кочкышлан лийын‚ Юмын пашажым ида шалате. Чыла кочкыш ару‚ но мо вес еҥым шӱртньымашке конда, айдемылан тугайым кочкаш сай огыл.

²¹ Лучо шылым кочкаш огыл‚ аракам йӱаш огыл‚ нимомат тугайым ышташ огыл‚ мо иза-шольым шӱртньымашке конда, алгаштара але вийдымым ышта.

²² Тиде шотышто тый молан ӱшанет? Юмын ончылно шке шӱмыштет тудым кучо. Кӧ ойырен налмыжлан шкенжым ок судитле‚ тудо пиалан.

²³ Кӧ кочкеш да тиде жапыштак кокыте шона‚ тудо титаканыш лукталтеш‚ вет тудо ӱшанлан ок эҥерте‚ а чыла‚ мо ӱшан почеш огыл – язык.

^24-25 Мыйын увертарыме, Иисус Христос нерген каласкалыше Поро Увер дене да курым-курымеш ойлыде кодымо, но ынде, чыла калык ӱшанымаш мутым колыштшо лийже манын, курымашлык Юмын кӱштымыж почеш пророк-влакын возымышт гоч палдарыме тайнын почылтмыж дене тендам пеҥгыдемден Кертшылан,

²⁶ кугу уш-акылан шкет ик Юмылан, Иисус Христос гоч курым-курымеш чап лийже! Аминь.