РИМЛЯН-ВЛАКЛАН 13 - У Сугынь

13 ГЛАВА 1-7 Власть кучышо-влаклан мут колыштшо лиймаш. 8-10 Лишыл-влакым йӧратыме нерген. 11-14 Христосын кечыже.

¹ Кӱшыл властьым кучышо-влакын мутыштым кажне еҥ колыштшаш‚ вет кеч-могай власть – Юмо деч‚ чыла властьым Юмо шогалтен.

² Тыгеракын, кӧ властьлан торешлана‚ Юмын ыштыме радам ваштареш шогалеш‚ а ваштареш шогалше-влак судитлымашым шке ӱмбакышт налыт.

³ Вет поро пашам ыштыше огыл‚ а осалым ыштыше еҥ вуйлатыше-влак деч лӱдшаш. Власть деч ынет лӱд гын‚ порым ыште‚ тунам тудо тыйым мокта.

⁴ Тудо – Юмын тарзыже, тыланет сай лийже манын ышта. Но тый осалым ыштет гын‚ лӱд, вет тудо таклан огыл кердым нумалеш: тудо – Юмын тарзыже‚ тудын гоч Юмын шыдыже осалланыше ӱмбак возеш.

⁵ Тыгеже мут колыштшо лийман. Тидыжым Юмын судшылан кӧра веле огыл‚ но совестьлан кӧрат ыштыман.

⁶ Тидлан верч те йозакымат тӱледа‚ вет власть кучышо-влак Юмылан служитлат‚ эре тиде пашам ыштат.

⁷ Тыгеракын‚ мом пуышашдам кажнылан пуыза: кӧлан лӱм окса – лӱм оксам, кӧлан йозак – йозакым‚ кӧлан лӱдмаш – лӱдмашым‚ кӧлан чап – чапым.

⁸ Ваш йӧратымаш деч моло шотышто нигӧланат парымеш ида код. Весым йӧратыше еҥ законын чыла йодмыжым шуктен.

⁹ Вет кӱштымаш-влак: «ит яжарлане»‚ «ит пушт»‚ «ит шолышт»‚ «шойыштын, еҥ ӱмбаке таныклен ит ойло»‚ «еҥын мо улыжлан ит сутлане» да кеч-могай моло кӱштымаш ик ойышто иктешлалтеш – «шкендым кузе йӧратет‚ лишыл еҥетымат тугак йӧрате».

¹⁰ Йӧратымаш лишыл еҥлан осалым ок ыште‚ сандене йӧратымаш – законым шуктымаш.

¹¹ Те кызытсе жапым паледа: ынде мыланна омо деч помыжалташ жап шуын‚ вет утаралтмаш кызыт мемнан деке ӱшанаш тӱҥалмына годсо деч лишнырак.

¹² Йӱд мучашке шуын‚ да кече лишемын. Тыгеже пычкемышын пашажым кодышаш да волгыдын саркуралже дене вӱдылалтшаш улына,

¹³ кечывал кечысе семын шкенам сайын кучен илаш тӱҥалына‚ орен‚ аракам йӱын‚ яжарланен‚ аташланен‚ ӱчашен да кӧранен огына иле.

¹⁴ Иисус Христос Господьна дене вӱдылалтса‚ да кап ден чонда верч тыршымашым сутланымаш марте ида шукто.