РИМЛЯН-ВЛАКЛАН 12 - У Сугынь

12 ГЛАВА 1-8 Христос дене у илыш. 9-21 Молым йӧратыме нерген.

¹ Иза-шольо-влак‚ Юмын шӱм порылыкшо дене мый тендам сӧрвалем: капдам илыше, святой, Юмылан келшыше надыр семын пуыза. Тыге те Юмылан шот дене служитледа.

² Тиде саманлан ида келыштаралт‚ а ушдан уэммыж дене вашталт толза. Юмын эрыкше могай, мо поро‚ келшыше да чыла шотыштат сай манын, тунам шонкален, шымлен кертыда.

³ Юмын мылам пуымо порылыкшо дене чылаланда ойлем: шонкалымаштыда шкендам утыждене кӱшкӧ ида шынде‚ но шот дене, кажнылан Юмын пуымо ӱшанымаш виса дене шоныза.

⁴ Кузе мемнан ик капыште шуко ужаш уло да чыла ужаш ик семын огеш кучылталт‚

⁵ тугак меат, шукын улына гынат, Христос дене ушнен, ик кап улына‚ а посна-посна – икте-весынан ужашыже.

⁶ Юмын кажныланна пуымо порылыкшо дене моштымашна тӱрлӧ. Кӧн пророкла ойлен моштымашыже уло гын‚ ӱшанымаш висаж дене келшышын, пророкла ойлыжо;

⁷ служитлен моштымаш пуалтын гын‚ тек служитла; туныктен моштымаш пуалтын гын‚ тек туныкта‚

⁸ кумылаҥден моштымаш гын‚ тек кумылаҥда; кӧ шкенжыным пуа гын‚ тек поро чон дене пуа; вуйлатен моштымаш пуалтын гын‚ тек шке сомылжым тыршен шукта; полшен моштымаш пуалтын гын‚ тек тидым куанен ышта.

⁹ Тек тендан йӧратымашда поро чон гыч лектеш‚ осал деч кораҥ коштса‚ поро деке пижса.

¹⁰ Икте-весыдам иза-шольо семын ныжылгын йӧратыза‚ пагалымаште икте-весыдам ончылтыза.

¹¹ Йолагай огыл, тыршыше лийза‚ йӱлышӧ чон дене Господьлан служитлыза.

¹² Ончыкылан ӱшанда улмылан куаныза‚ нелылык годым чытыше лийза‚ эре кумалза.

¹³ Кӱлешышт годым святой-влаклан полшыза‚ корныеҥ-влакым кумылын ончыза.

¹⁴ Тендам поктылшо-влаклан порым тыланыза; ида карге‚ а порым тыланыза.

¹⁵ Куаныше дене куаныза‚ шортшо дене шортса.

¹⁶ Икте-весе дене келшен илыза‚ ида кугешныл‚ чытен илыше-влак гай лийза, шкендам шке ушанлан ида шотло.

¹⁷ Осаллан осал дене нигӧлан ида тӱлӧ‚ а чыла еҥын шинча ончылныжо мо поро, тудым ышташ тыршыза.

¹⁸ Кертыда гын, лийме семын, чыла еҥ дене тынысын илыза.

¹⁹ Шергакан иза-шольым-влак‚ шкендан верч ӱчым ида шукто‚ Юмын шыдыжлан верым кодыза. Возымо: «Ӱчым Мый шуктем‚ Мый пӧртылтем», ойла Господь.

²⁰ А «тушманет шужышо гын‚ тудым пукшо‚ йӱмыжӧ шуэш гын‚ йӱктӧ: тидым ыштен‚ тудын вуйжылан йӱлышӧ тулшолым погет».

²¹ Осаллан шкендым сеҥаш ит пу‚ осалым поро дене сеҥе.