РИМЛЯН-ВЛАКЛАН 11 - У Сугынь

11 ГЛАВА 1-10 Юмо шке калыкшым кудалтен огыл. 11-24 Йот калыкын утаралтмашыже. 25-36 Израильын утаралтмашыже.

¹ Тыгеже йодам: але Юмо шке калыкшым кудалтен? Уке! Мый шкежат Израиль калык гыч‚ Авраам тукым гыч, Вениамин йыжыҥ гыч улам.

² Ончылгоч пален налме калыкшым Юмо кудалтен огыл. Илия нерген Возымаш мом ойла але те огыда пале? Тудо Юмын ончылно Израильым тыге титакла:

³ «Господь‚ пророк-влакетым нуно пуштыныт‚ жертвенник-влакетым шалатеныт‚ мый шкет кодынам‚ мыйынат чонем налаш шонат».

⁴ Мом вара Юмо тудлан вашештен? «Ваал ончылно сукен шичдыме шым тӱжем еҥым Мый Шкаланем арален коденам».

⁵ Тыге кызытсе жапыштат Юмо шке порылыкшо дене палемдыме наре еҥым ойырен налын.

⁶ Тидыже Юмын порылыкшо дене лийын гын‚ тыгеже айдемын пашаж дене лийын огыл. Уке гын‚ Юмын порылыкшо чын порылык ок лий ыле. А ойырен налмаш айдемын пашажлан кӧра гын‚ тидыже порылык огыл; уке гын‚ паша – паша огыл.

⁷ Тугеже, Израиль кушко тыршен‚ тушко шуын огыл‚ ойырен налме-влак веле шуыныт. Молыштын шӱмышт кӱэмалтын‚

⁸ Возымо семын «Юмо нунылан шиждымашлык шӱлышым пуэн‚ тачысе кече мартеат шинчашт огеш уж‚ пылышышт ок кол».

⁹ Давидат ойла: «Тек кочмаш-йӱмашышт нунылан оптыш, вапш лиеш, тек шӱртньымӧ кӱш савырна‚ мут кучымашке конда,

¹⁰ тек шинчашт, вудакаҥын, сокыр лиеш да тупышт курымешлан пӱгырна».

¹¹ Тыгеже йодам: але иудей-влак кынел керташ лийдымын шӱртненыт? Уке! Нуно кӧранаш тӱҥалышт манын, шӱртньымышт чын Юмым палыдыме-влаклан утаралташ йӧным пуа.

¹² Нунын камвочмышт тӱнялан поянлык да йорлештмышт чын Юмым палыдыме-влаклан поянлык гын‚ тугеже нунын тичмашлыкышт кунар кугурак поянлыкым конда!

¹³ Тыланда‚ чын Юмым ондак палыдыме-влак‚ ойлем: мый чын Юмым палыдыме-влакын Апостолышт улам гын, шке служитлыме пашамым чапландарем,

¹⁴ вет лийын кертеш, шке калыкемын еҥже-влакым кӧранаш таратен кертам да икмынярыштым утарен кодем.

¹⁵ Иудей-влакым кораҥдымаш тӱня ден Юмо коклаште сӧрасымашым ыштен гын‚ нуным мӧҥгеш налмашыже колымаш гыч ылыжмаш огыл мо?

¹⁶ У руаш святитлыме гын‚ уло руашат святой. Вож святой гын‚ укш-влакат святой улыт.

¹⁷ Олив пушеҥгын южо укшыжо тодылмо улыт гын‚ тый‚ ир оливын укшыжо‚ тудын укш коклашкыже ушымо лийынат да вожшо ден вӱдшӧ дене пайдаланет гын‚

¹⁸ шкендым моло укш деч кӱшкӧ ит шынде. Шкендым кӱшкӧ нӧлтет гын‚ шарне: тый огыл вожым нумалат‚ а вож тыйым нумалеш.

¹⁹ Тый ойлет: «Мыйым ушаш манын, укш-влакым тодылыныт».

²⁰ Йӧра‚ нуным ӱшаныдыме улмыштлан тодыл налыныт‚ а тый ӱшаныметлан кӧра верыштет улат. Но тидын дене ит кугешне‚ а лӱд.

²¹ Вет Юмо пушеҥгын шке укшыжым арален коден огыл гын‚ ала тыйымат арален ок кодо.

²² Тыгеже‚ Юмын порылыкшым да пеҥгыдылыкшым уж: шӱртнен кораҥше-влаклан – пеҥгыдылык‚ а Юмын порылыкшым кучен илет гын‚ тыланет порылык, уке гын, тыйымат руал шуат.

²³ Но иудей-влак ӱшаныдымыштым чарнат гын, пушеҥгыш ушымо лийыт‚ вет нуным мӧҥгеш ушаш Юмын куатше уло.

²⁴ Шочмо ир олив пушеҥгет гыч тыйым пӱчкын ойырымо да пакчаш куштымо пушеҥгыш ушымо гын‚ нине укшым шочмо олив пушеҥгышкышт ушаш эшеат йӧнанрак.

²⁵ Иза-шольо-влак‚ те шке ушда дене ида кугешне манын‚ тендам тиде тайне шотышто палыдымым ынем кодо: Юмын Кугыжанышыш чын Юмым палыдыме-влак кокла гыч тичмаш чот пурымешке, Израиль калыкын икмыняр ужашыжын шӱмжӧ кӱэмалтше лиеш.

²⁶ Тыгеже уло Израиль утаралтеш. Тыге возымо: «Сион гыч Эрыкыш лукшо толеш да Юмым пагалыдымашым Иаковын тукымжо деч кораҥда.

²⁷ Кунам Мый языкыштым кораҥдем‚ нунылан тиде сугыньым пуэм».

²⁸ Поро Увер шотышто иудей-влак тыланда кӧра Юмын тушманже улыт‚ но Тудын ойырен налмыж шотышто нуно шке ачаштлан кӧра Юмын йӧратыме улыт.

²⁹ Юмын пӧлекше-влак да ӱжмашыже вашталташ лийдыме улыт.

³⁰ Ондакше те Юмым колыштын огыдал‚ а ынде нунын мут колыштдымо улмыштлан верчын Юмо тендам чаманен.

³¹ Шкештат чаманыме лийышт манын, Юмо тендам чаманымылан кӧра нунат тидын семынак кызыт мут колыштдымо лийыныт.

³² Вет чыла еҥым чаманаш манын‚ Юмо чыла еҥым мут колыштдымашке петырен шынден.

³³ Юмын поянлыкше, уш-акылже да шинчымашыже мучашдыме! Тудын судшо тергаш лийдыме‚ Тудын корныжо шымлаш лийдыме!

³⁴ «Кӧ Господьын кӧргӧ шонымыжым пала? Кӧ Тудлан каҥаш пуышо лийын?»

³⁵ Юмо пӧртылтыжӧ манын‚ кӧ Тудлан ончылгоч пуэн?

³⁶ Вет чылажат Тудын деч‚ Тудын гоч да Тудлан. Тудлан курым-курымеш чап лийже! Аминь.