РИМЛЯН-ВЛАКЛАН 10 - У Сугынь

10 ГЛАВА 5-21 Кеч-кӧ утаралтын кертеш

¹ Иза-шольо-влак‚ Израиль утарыме лийже – тиде мыйын шӱм кумылем, тидым Юмо деч сӧрвалем.

² Мый таныклем: Юмо верч тыршымашышт уло‚ но тидыже тичмаш умылымашеш ок негызлалт.

³ Вет нуно Юмын чын корныжым огыт пале‚ шкеныштыным пеҥгыдемдаш тӧчат‚ Юмын чынжылан мут колыштшо лийын огытыл.

⁴ Вет законын мучашыже – Христос‚ сандене ӱшаныше кажне айдеме чыныш лукталтеш.

⁵ Законлан эҥертыме дене чыныш лекме нерген Моисей тыге воза: «Законын йодмыжым шуктышо айдеме тудлан кӧра илышым налеш».

⁶ А тугай чыныш лекмаш, могайже ӱшанымашлан эҥерта, тыге ойла: «Пылпомышко кӧ кӱза» – вес семынже, Христосым пылпомыш гыч кӧ волта – «манын, шке шӱмыштет ит ойло».

⁷ Але «Кӧ пундашдыме келгытыш вола?» Вес семынже‚ Христосым колымаш гыч кӧ нӧлта?

⁸ Возымаш мом ойла? «Шомак тый денет лишне – тыйын умшаштет да шӱмыштет». Тыште мемнан увертарыме ӱшанымаш шомак нерген ойлалтеш.

⁹ Иисусым Господь манын, тый йылмет дене еҥ ончылно почын ойлет да‚ Юмо Тудым колымаш гыч ылыжтен манын‚ шӱмет дене ӱшанет гын‚ утаралтат.

¹⁰ Вет шӱм дене ӱшанымаш чыныш лекмашке наҥгая‚ йылме дене почын ойлымаш – утаралтмашке.

¹¹ Возымаш ойла: «Тудлан ӱшаныше кеч-кӧат намысыш ок пуро».

¹² Тыште иудей ден эллин коклаште ойыртем уке: чыланнанат Господьна икте. Кӧ Тудын деч полышым йодын кумалеш‚ Господь поянлыкше гыч чылалан пуа.

¹³ Вет «Господь деч полышым йодшо кеч-кӧат утарыме лиеш».

¹⁴ Но кӧлан огыт ӱшане‚ кузе Тудын деч полышым йодын кертыт? Кӧн нерген колын огытыл гын‚ кузе Тудлан ӱшанен кертыт? Увертарыше уке гын‚ кузе нуно колын кертыт?

¹⁵ А колтымо огытыл гын‚ кузе увертарен кертыт? Тыге возымо: «Тыныслык нерген увертарыше-шамычын да поро уверым кондышо-влакын толмышт могай сае!»

¹⁶ Но чылан огыл Поро Уверын мутшым колыштыныт. Исаия ойла: «Господь! Мемнан уверланна кӧ ӱшанен?»

¹⁷ Тыгеже‚ ӱшанымашыже уверым колмо дене шочеш, а уверым колмаш Юмын шомакше гоч толеш.

¹⁸ Но йодам: але нуно колын огытыл? Уке, колыныт: «Нунын йӱкышт уло мланде мучко шарлен‚ мутышт тӱня тӱр марте шуын».

¹⁹ Адак йодам: але Израиль умылен огыл? Эн ондак Моисей каласен: «Тугай калык дене, могайже чынжым калыкат огыл, Мый тендам кӧранаш таратем‚ шонен моштыдымо калык дене тендам шыдештарем».

²⁰ Исаия гын лӱдде ойла: «Кӧ Мыйым кычалын огыл‚ тудо муын‚ кӧ Мыйын нергенем йодын огыл‚ тудлан Шкемым палдаренам».

²¹ Израиль нерген гын ойла: «Мый мут колыштдымо да ваштареш шогышо калык деке кечыгут кидем шуен шогенам».