РИМЛЯН-ВЛАКЛАН 1 - У Сугынь

1 ГЛАВА 1-7 Саламлымаш. 8-15 Тауштен кумалмаш. 16-17 Поро Уверын куатше. 18-32 Чыла еҥ языкан.

¹ Иисус Христосын тарзыже‚ Юмын ӱжмӧ, Тудын Поро Увержым каласкалаш ойырен налме Апостол Павел деч 7а Юмын йӧратыме да ӱжмӧ Римысе святой-влаклан.

² Поро Уверым Юмо пророкшо-влак гоч Святой Возымаште ончылгоч сӧрен‚

³ тидыже Тудын Эргыж нерген ойла‚ Тудыжо кап могырым – Давидын урлыкшо деч шочшо‚

⁴ а шӱлышыжын святой улмыж могырым – Юмын Эрге, тидым колымаш гыч кугу куат дене ылыжме гоч почын ончыктымо. Тудо – мемнан Господьна Иисус Христос‚

⁵ ме Тудын гоч порылыкым да Апостол пашам налынна да чыла калыкым Тудын лӱмжылан кӧра ӱшанымаш мутым колыштмашке виктарышаш улына.

⁶ Теат‚ Иисус Христосын ӱжмӧ еҥже-влак‚ нунын кокла гыч улыда.

⁷ Тыланда мемнан Юмо Ачана деч да Господь Иисус Христос деч порылык да тыныслык лийже.

⁸ Тендан ӱшанымыда нерген уло тӱняште ойлат, сандене эн ондак Иисус Христос гоч чыланда верч Юмемлан таум ыштем.

⁹ Юмо мыланем танык – Эргыж нерген Поро Уверым каласкален‚ мый Тудлан шӱм-чон шӱлышем дене служитлем – Юмо мыланем танык: мый чарныде тендам ушыштем кучем

¹⁰ да‚ пытартышлан мыйын корнем Юмын эрыкше почеш тендан деке виктаралтше манын‚ кумалмем годым эреак йодам.

¹¹ Тендам пеҥгыдемдаш манын, Святой Шӱлышын иктаж-могай пӧлекшым тендан дек шукташ мый тендам моткоч ужнем‚

¹² вес семынже‚ тыландат, мыланемат икте-весынан ӱшанымашланна кӧра кумылаҥаш манын шонем.

¹³ Иза-шольо-влак‚ тыланда палдарыде ынем кодо: але марте тидлан чарак лийын гынат, мый шуко гана тендан деке мияш да‚ могай саскам моло калык коклаште налынам‚ тугайымак тендан денат налаш шоненам.

¹⁴ Эллинлан да варварлан‚ ушанлан да тунемдымылан мыйын парымем уло‚

¹⁵ сандене тыландат‚ Римыште илыше-влаклан‚ Поро Уверым каласкалымем шуэш.

¹⁶ Мый Христосын Поро Уверже деч ом вожыл‚ вет тудо – Юмын куатше, ӱшаныше кажне еҥлан – ондак иудейлан‚ вара эллинлан – утарымашым конда.

¹⁷ Вет туштыжо Юмын чынже ӱшанымаш гыч ӱшанымашке почылтеш: Возымо семын «Чын ыштыше айдеме ӱшанымашыж дене илаш тӱҥалеш».

¹⁸ Чын огылын кепшылыштыже чыным кучышо еҥ-влакын кеч-могай мут колыштдымышт да чын огылышт ӱмбаке Юмын шыдыже пылпомыш гыч почылтын толеш.

¹⁹ Вет Юмо нерген мом палаш лиеш‚ тиде нунылан палыме: Юмо нунылан тидым палдарен.

²⁰ Тудын койдымо ойыртемже-влакым – курымашлык куатшым да Юмо улмыжым – тӱням ыштыме гычак пашаж гоч ужаш да умылаш лиеш‚ сандене тыгай еҥ-влак шкеныштым чыныш луктын огыт керт.

²¹ Нуно Юмо нерген паленыт гынат‚ Тудым Юмо семын пагален огытыл да Тудлан тауштен огытыл‚ а нунын шонкалымышт арам лийын‚ да шонен моштыдымо шӱмыштым пычкемыш авалтен.

²² Нуно шкеныштым ушан улына маныныт‚ но ушдымо лийыныт

²³ да колыдымо Юмын чапшым колышаш айдемын‚ кайыкын‚ ныл йоланын‚ нушкын коштшын сын-тӱсышт дене алмаштеныт.

²⁴ Сандене Юмо нуным языкан шӱм шонымашышт дене амырчыкеш коден, шке капыштым шке намыслаш кудалтен.

²⁵ Нуно Юмын чынжым шоя дене вашталтеныт да Пӱрышылан служитлыме олмеш Тудын мом пӱрымыжым пагаленыт‚ тидлан кумалыныт. Пӱрышӧ курымеш моктымо лийже‚ аминь.

²⁶ Тидлан кӧра Юмо нуным намысле кумыл шупшмылан пуэн: ӱдырамаш-влак пӱртӱс туныктымо почеш вате-марийла илымым пӱртӱс ваштареш улшо койыш дене алмаштеныт‚

²⁷ тыгак пӧръеҥ-влакат ӱдырамаш дене пӱртӱс туныктымо почеш вате-марийла илымым кудалтеныт да шакше сутланымышт дене икте-весышт деке ылыжыныт‚ пӧръеҥ ден пӧръеҥ яжарланат‚ да чын койыш деч кораҥмыштлан сулен налме мут кучыктымаш нунылан логалеш.

²⁸ Юмым палымашым нуно йӧрдымыш луктыныт‚ сандене Юмо нуным йӧрдымӧ ушышт почеш илаш кудалтен, да нуно пышткойшым ыштат.

²⁹ Нуно тӱрлӧ чын огыл дене тич улыт: яжарланымаш‚ чояланымаш‚ опкынланымаш‚ шыдым кучымаш‚ кӧранымаш‚ еҥым пуштедымаш‚ ӱчашымаш‚ ондалкалымаш, еҥлан осалым шонымаш нуным авалтен.

³⁰ Нуно осал шомакым шаркалат‚ еҥ ӱмбаке ойлат да Юмым ужмышт огеш шу‚ торжа‚ моктаныше, кугешнылше улыт‚ осал пашам шонен луктын моштат‚ ача-аваштым огыт колышт.

³¹ Нуно шонен моштыдымо улыт‚ ӱшанле огытыл‚ йӧратыдыме‚ икте-весе дене келшыдыме да чаманыдыме улыт.

³² Тыге ыштыше-влак колымашым сулен налыт манын, Юмын судитлымыжым нуно палат‚ но тыгайым шке веле огыл ыштат, тыге ыштылше моло еҥымат сайлан шотлат.