Почм 5 - У Сугынь

5 ГЛАВА 1-14 Книга да Надыр Пача.

¹ Престолышто Шинчышын пурла кидыштыже книгам ужынам, тудыжо кӧргыштыжат да ӱмбалныжат возыман да шым печать дене петырыме лийын.

² Мый виян Суксым ужынам, тудо кугу йӱк дене кычкырен увертарен: «Кӧ печать-влакым кораҥдаш да книгам почаш йӧрышӧ уло?»

³ Но пылпомыштат, мланде ӱмбалнат, мланде йымалнат книгам почынат, кӧргышкыжӧ ончалынат кертше нигӧ лийын огыл.

⁴ Книгам почаш, кӧргышкыжӧ ончалаш да лудаш йӧрышӧ иктат лийын огылат, мый шуко шортынам.

⁵ Старец кокла гыч иктыже мылам ойлен: «Ит шорт. Теве Иуда тукым гыч лев, Давидын вожшо, сеҥымашке шуын. Тудо шым печатьым кораҥда да тиде книгам почеш».

⁶ Мый ужынам: теве престол, ныл илыше да старец-влак коклаште шӱшкылмӧ гай Пача шога, Тудо шым тӱкан да шым шинчан, нуныжо Юмын уло мланде ӱмбаке колтымо шым шӱлышыжӧ улыт.

⁷ Пача толын да престолышто Шинчышын пурла кидше гыч книгам налын.

⁸ А кунам Тудо книгам налын, ныл илыше да коло ныл старец Пача ончылан кумык возыныт. Кажныжын кӱсле да шӧртньӧ чашыже лийын, чашышт тамлын ӱпшышӧ фимиам дене темыме, тидыже – святой-влакын кумалмышт.

⁹ Нуно у мурым муреныт: «Тый книгам налаш да печать-влакым почаш йӧрышӧ улат, вет Тый шӱшкылмӧ лийынат, чыла йыжыҥ да йылме, калык да тукым гыч мемнам Юмылан шке Вӱрет дене тӱлен налынат.

¹⁰ Тый Юмыланна мемнам кугыжа ден иерей-влакым ыштенат, ме мланде ӱмбалне кугыжаланаш тӱҥалына».

¹¹ Вара мый ужынам да шуко Суксын йӱкшым колынам, нуно престол, илыше-шамыч да старец-влак йыр лийыныт. Нунын чотышт – тӱжем дене, шотлен пытарыдыме.

¹² Нуно виян йӱк дене ойленыт: «Шӱшкылмӧ Пача вийымат, поянлыкымат, уш-акылымат, куатымат, чапымат, пагалымашымат, моктымашымат налаш йӧрышӧ».

¹³ Пылпомыштат, мландӱмбалнат, мланде йымалнат, теҥызыштат Юмын пӱрымӧ-влакын мом ойлымыштым мый кольым. Нуно ойленыт: «Престолышто Шинчышылан да Пачалан курым-курымеш моктымаш, пагалымаш, чап да власть».

¹⁴ Вара ныл илыше каласен: «Аминь». Коло ныл старец кумык возын да курым-курымеш Илышылан вуйым савен.