Почм 4 - У Сугынь

4 ГЛАВА 1-11 Пылпомышсо престол ончылно вуйым савымаш.

¹ Тылеч вара мый ужынам: теве пылпомышто почмо омса. Мыланем ондак пуч семын йоҥген ойлышо йӱк каласен: «Тышке кӱзӧ, тылеч вара мо лийшашым тыланет ончыктем».

² Тунамак мыйым Шӱлыш авалтен. Теве пылпомышто престол шога, а престолышто – Шинчыше.

³ Шинчышыжын тӱсшӧ яспис ден сардис кӱ гай койын, престол йыр смарагдыла койшо шонанпыл лийын.

⁴ Тиде престол йыр коло ныл престол лийын, тушто коло ныл старец шинчымым ужынам, нуно ош вургеман лийыныт, вуйыштышт шӧртньӧ вуйшӱдыш лийын.

⁵ А престол деч волгенче да кӱдырчӧ да йӱк-йӱан лектыныт. Престол ончылно шым светильникыште тул йӱлен, нуно Юмын шым шӱлышыжӧ улыт.

⁶ А престол ончылно хрусталь гай янда теҥыз лийын. Престол покшелне да престол йыр ныл илыше шоген, нунын капыштышт чыла вере, ончылнат, шеҥгелнат, шинчашт лийын.

⁷ Икымшыже лев гай лийын, кокымшыжо – ӱшкыж гай, кумшыжо айдемын гай чуриян лийын, а нылымшыже – чоҥештыше пӱркыт гай.

⁸ Ныл илыше кокла гыч кажныжын куд шулдыржо лийын, шинчашт – уло кап мучко, кӧргыштыштат. Йӱдшӧ-кечыже чарныде ойлат: «Святой, Святой, Святой Господь Юмо, Чылакучышо! Тудо лийын, уло да толеш».

⁹ А кунам илыше-влак престолышто Шинчышым, курым-курымеш Илышым, чапландарат, Тудлан пагалымашым ончыктат да тауштат,

¹⁰ коло ныл старец престолышто Шинчыше ончылан кумык возеш, курым-курымеш Илышылан вуйым сава, вуйшӱдышыжым престол ончыко пышта да ойла:

¹¹ «Господь, Тый чапымат, пагалымашымат, вийымат налаш йӧрышӧ улат: мо уло – чыла Тый ыштенат, Тыйын эрыкетлан кӧра чылажат уло да пӱралтын».