Почм 22 - У Сугынь

22 ГЛАВА 6-21 Христосын толмыжо.

¹ Вара Суксо мыланем илыш вӱдын яндар эҥержым ончыктен, тудо – хрусталь гай волгыдо, Юмын да Пачан престолжо деч лектеш.

² Олан уремже покшелне да эҥерын кок могырыштыжат – илыш пушеҥге. Тудо ийлан латкок гана саскам пуа, тылзе еда саскажым конда, а пушеҥгын лышташыже калыкым паремда.

³ Нимо каргыме ынде ок лий. Тушто Юмын да Пачан престолышт лиеш, да тарзыж-влак Тудлан служитлаш тӱҥалыт.

⁴ Нуно Тудын чурийжым ужыт, да Тудын лӱмжӧ нунын саҥгаштышт лиеш.

⁵ Йӱд тушто ок лий, да нунылан лампе але кече волгыдо ок кӱл: Господь Юмо нуным волгалтараш тӱҥалеш, да нуно курым-курымеш кугыжаланаш тӱҥалыт.

⁶ Суксо мылам ойлен: «Нине шомак чын да ӱшанле улыт. Вашке мо лийшашым тарзыж-влаклан ончыкташ манын, святой пророк-влакын Господь Юмышт шке Суксыжым колтен».

⁷ «Теве, вашке толам. Тиде книгасе пророкла ойлымо шомакым шуктышо поро пиалан».

⁸ Мый, Иоанн, чыла тидым ужынам да колынам. А ужмекем да колмекем, чыла тидым ончыктышо Суксын йол воктекыже вуйым саваш кумык возынам,

⁹ но Суксо мылам каласен: «Ончо, тыге ит ыште! Мый тый денет, пророк иза-шольыч-влак да тиде книгасе шомакым кучышо чыла еҥ дене пырля служитлыше улам. Сукен, вуетым Юмылан саве».

¹⁰ Тудо мылам каласен: «Тиде книгасе пророкла ойлымо шомакым палдарыде ит кодо: шукталтме жап лишемын.

¹¹ Чын огыл ыштыше еҥ тек умбакыжат чын огылым ыштыже, шакше тек умбакыжат шакшын ила. Чын ыштыше тек умбакыжат чыным ышта, святой умбакыжат святитлалтше.

¹² Теве Мый вашке толам, тӱлышашем кондем, кажнылан пашаж почеш тӱлем.

¹³ Мый Альфа да Омега, Тӱҥалтыш да Мучаш, Икымше да Пытартыш улам.

¹⁴ Тудын кӱштымыжым шуктышо-влак поро пиалан улыт: нуно илыш пушеҥге гыч кочкаш да олашке капка гыч пураш эрыкым налыт.

¹⁵ А пий да юзо-влак, яжарланыше, еҥым пуштшо, шояк юмылан кумалше-влак, шоям йӧратыше да тудым ыштыше-влак чылан тӱжвалан кодыт.

¹⁶ Мый, Иисус, тыланда черкылаште тидын нерген таныклаш шке Суксем колтенам. Мый Давидын вожшо да тукымжо улам, волгыдо да эрденысе шӱдыр улам».

¹⁷ Шӱлышат, налшаш ӱдырат ойлат: «Тол!» Кӧ тидым колеш, тек тудат ойла: «Тол!» Кӧн йӱмыжӧ шуэш, тек толеш, кӧ илыш вӱдым налнеже, тек яра налеш.

¹⁸ Кӧ тиде книгасе пророкла каласыме шомакым колеш, мый чылаштлан таныклем: иктаж-кӧ нине шомакыш иктаж-мом ешара гын, тудо еҥлан Юмо тиде книгаште возымо эҥгекым ешара.

¹⁹ А иктаж-кӧ пророкла ойлымо тиде книгасе шомак гыч иктаж-мом кораҥда гын, Юмо тудым илыш книгаште да святой олаште лийме деч, да мом тиде книгаште возымо, тудын деч кораҥда.

²⁰ Тидым Таныклыше каласа: «Чынже денак, вашке толам!» Аминь. Туге, тол, Господь Иисус!

²¹ Господьна Иисус Христосын порылыкшо тек чыланда пелен лиеш. Аминь.