Почм 21 - У Сугынь

21 ГЛАВА 1-8 У кава ден у мланде. 9 – 22:5 У Иерусалим.

¹ Вара мый у кава ден у мландым ужынам. Ончычсо кава ден ончычсо мланде пытеныт, теҥызат ынде уке.

² Мый, Иоанн, святой олам, у Иерусалимым, ужынам. Тудо качылан сӧрастарыме марлан лекшаш ӱдыр семын ямдылыме улмаш да пылпомыш гыч Юмо деч волен.

³ Пылпомыш гыч виян йӱкым колынам, тудо ойлен: «Теве, Юмын илемже ынде айдеме коклаште. Тудо нунын пелен илаш тӱҥалеш, нуно Тудын калыкше лийыт, да Юмо, нунын Юмышт, Шкежак нунын коклаште лиеш.

⁴ Юмо нунын чыла шинчавӱдыштым ӱштылеш. Ынде колымаш ок лий, ойгат, мӱгырен шортмашат, черат ок лий, вет ончычсо эртен».

⁵ Престолышто Шинчыше каласен: «Теве, Мый чылажымат уым ыштем». Вара ойлен: «Возен нал, вет нине шомак чын да ӱшанле улыт».

⁶ Адак мылам ойлен: «Шукталтын. Мый Альфа да Омега, Тӱҥалтыш да Мучаш улам. Мый йӱмӧ шушылан илыш вӱд памаш гыч вӱдым яра пуэм.

⁷ Сеҥыше чыла тидын наследникше лиеш, а Мый тудын Юмыжо лиям, тудо Мыйын эргым лиеш.

⁸ Но лӱдшӧ, ӱшанымаш деч кораҥше, шакше, еҥым пуштшо, яжарланыше ден юзо-влакын, шояк юмылан кумалше-влакын да чыла шоячын ужашышт – йӱлышӧ кишан ер. Тиде – кокымшо колымаш».

⁹ Пытартыш шым эҥгекым темыман шым чашым кучышо шым Суксо кокла гыч иктыже толын да мыланем каласен: «Тол, мый тыланет Пачан налшаш ӱдыржым, вате лийшашыжым, ончыктем».

¹⁰ Тудо мыйым шӱлыш дене кугу да кӱкшӧ курыкыш наҥгаен, да пылпомыш гыч Юмо деч волышо кугу олам, святой Иерусалимым, мылам ончыктен.

¹¹ Юмын чапше тудын уло, олаже шергакан кӱ семын, хрусталь гай яндар яспис кӱ семын йолген.

¹² Ола йыр кугу да кӱкшӧ пырдыж лийын, тушто – латкок капка, капкаште латкок Суксо. Капка ӱмбалне лӱм-влакым возымо, тиде – Израиль эрге-влакын латкок тукымын лӱмышт.

¹³ Эрвел могырым кум капка, йӱдвел могырым кум капка, кечывалвел могырым кум капка да касвел могырым кум капка.

¹⁴ Олан пырдыжшын латкок негызше лийын, да тушто – Пачан латкок Апостолжын лӱмышт.

¹⁵ Мый денем мутланыше Суксын олам да тудын капка ден пырдыжшым висаш шӧртньӧ тояже лийын.

¹⁶ Ола ныл лукан лийын, тудын кутышыжо – лопкытшо гаяк. Суксо тояж дене олам висен, висымыже латкок тӱжем стадий лийын: тудын кутышыжо, лопкытшо да кӱкшытшӧ икгай.

¹⁷ Вара пырдыжым висен, айдемын висаж дене келшышын, тудо шӱдӧ нылле ныл кынергут лийын, Суксынат висаже тыгаяк.

¹⁸ Пырдыжшым яспис дене ыштыме, а олаже ару янда гай яндар шӧртньӧ лийын.

¹⁹ Олан пырдыж негызшым тӱрлӧ шергакан кӱ дене сӧрастарыме: икымше негызым – яспис дене, кокымшым – сапфир дене, кумшым – халкидон дене, нылымшым – смарагд дене,

²⁰ визымшым – сардоникс дене, кудымшым – сердолик дене, шымшым – хризолит дене, кандашымшым – вирилл дене, индешымшым – топаз дене, луымшым – хризопрас дене, латикымшым – гиацинт дене, латкокымшым – аметист дене.

²¹ А латкок капка латкок ракывотшер пырче лийын: кажне капкаже ик ракывотшер пырче гыч шоген. А олан уремже – вошт койшо янда гай яндар шӧртньӧ.

²² Мый олаште храмым ужын омыл, вет тудын храмже – Чылакучышо Господь Юмо да Пача.

²³ Олам волгалтараш кечат, тылзат ок кӱл: Юмын чапше тудым волгалтара; тудын волгалтарышыже – Пача.

²⁴ Тиде олан волгыдыштыжо утарыме калык-влак кошташ тӱҥалыт. Мландӱмбалсе кугыжа-влак чапыштым да пагалымашыштым тушко кондат.

²⁵ Капка-влакшым кечывалым петыраш огыт тӱҥал, а йӱд тушто ок лий.

²⁶ Тушко калык-влакын чапыштым да пагалымашыштым кондат.

²⁷ Тушко нимо амыргыше, йырныкым да шоям ыштыше нигӧ ок пуро. Пачан илыш книгашкыже возымо-влак веле тушко пурат.