Почм 20 - У Сугынь

20 ГЛАВА 1-6 Тӱжем ий. 7-10 Сатанам сӱмырал шуымаш. 11-15 Колышо-влакым судитлымаш.

¹ Мый пылпомыш гыч Суксо волымым ужынам, тудын кидыштыже пундашдыме келгытын сравочшо да кугу шинчыр лийын.

² Суксыжо драконым – акрет годсо кишкым кучен, тидыже – диавол да сатана, тудым тӱжем ийлан шинчырлен

³ да пундашдыме келгытышке кудалтен, тудын аҥжым петырен, ӱмбаланже печатьым пыштен. Тек дракон, тӱжем ий эртымешке, умбакыже калык-влакым ондален ок керт. Тидын деч вара тудо кӱчык жаплан эрыкыш лукмо лийшаш.

⁴ Мый престол-влакым да тушто шинчыше-влакым ужынам, нунылан судитлаш властьым пуымо улмаш. Иисусын таныклымыже да Юмын шомакше верч вуйыштым руал ойырымо-влакын чоныштым ужынам. Нуно янлыкланат, тудын тӱсшыланат вуйым савен кумалын огытыл, тудын палыжым саҥгашышт але кидешышт шындыктен огытыл. Нуно ылыжыныт да Христос дене пырля тӱжем ий кугыжаланеныт.

⁵ Моло колышыжо тӱжем ий эртымешке ылыжын огыл. Тиде – икымше ылыжмаш.

⁶ Икымше ылыжмаш годым илышым налшаш-влак пиалан да святой улыт: нунын ӱмбалне кокымшо колымашын властьше ок лий, а Юмын да Христосын иерейышт лийыт да Тудын дене пырля тӱжем ий кугыжаланаш тӱҥалыт.

⁷ Тиде тӱжем ий жап эртымеке, сатана шке казаматше гыч эрыкыш лукмо лиеш. Тудыжо мландын ныл могырыштыжат илыше калык-влакым, вес семынже Гог ден Магогым, ондалаш лектеш. Тудо нуным сарыш пога, а нунын чотышт теҥыз ошма пырче наре.

⁸ Нуно уло мланде мучко шарлен кынелыныт, святой-влакын илемыштым да йӧратыме олам авырен налыныт,

⁹ но пылпомыш гыч Юмо деч тул волен да нуным пытарен.

¹⁰ Нуным ондалыше диаволым йӱлышӧ кишан ерыш шуэныт, тушкак ондакше янлыкым да шояк пророкым шуэныт. Тушто нуно йӱдшӧ-кечыже курым-курымеш орландарыме лийыт.

¹¹ Мый кугу ош престолым да тушто Шинчышым ужынам. Тудын чурийже деч мланде ден кава торлен йомыныт – нунылан вер лийын огыл.

¹² Мый колышо-влакым изимат, кугумат ужынам, нуно Юмо ончылно шогеныт. Книга-влакым почыныт. Адак вес книгам почыныт, тиде – илыш книга. Колышо-влак книгалаш возымо негызеш пашаштлан келшышын судитлыме лийыныт.

¹³ Теҥызат колышо-влакшым пуэн, колымаш ден тамыкат колышо-влакыштым пуэныт. Кажныже пашажлан келшышын судитлыме лийын.

¹⁴ Колымашымат, тамыкымат тулан ерыш шуымо. Тиде – кокымшо колымаш.

¹⁵ А кӧн лӱмжым илыш книгаште возымым муын огытыл гын, тудым тулан ерыш шуэныт.