Почм 19 - У Сугынь

19 ГЛАВА 6-10 Пачан сӱан сийже. 11-21 Ош имне ӱмбалне имнешке.

¹ Тылеч вара мый пылпомыш гыч шуко калык тӱшкан гай виян йӱкым колынам. Нуно ойленыт: «Аллилуия! Утарымаш, чап, пагалымаш да куат мемнан Юмынан:

² Тудын судитлымыже чын да поро, яжарланымыж дене мландым локтылшо кугу яжарым Тудо судитлен да тарзыж-влакын вӱрыштым йоктарыме верч тудын кидше гыч тӱлыкташ йодын».

³ Вара угычын кычкыралыныт: «Аллилуия! Тудын йӱлымӧ шикшыже курым-курымеш нӧлталтеш!»

⁴ Коло ныл старец да ныл илыше кумык возыныт да престолышто шинчыше Юмылан вуйым савен ойленыт: «Аминь! Аллилуия!»

⁵ Престол деч йӱк лектын: «Мемнан Юмынан тарзыже-влак, Тудлан лӱдын кумалше-влак, изиже-кугужо чылан Тудым моктыза!»

⁶ Вара мый моткоч кугу тӱшкан гай, кугу вӱд лӱшкымӧ гай, кӱдырчӧ виян кӱдыртымӧ гай йӱкым колынам. Тудо ойлен: «Аллилуия! Чылакучышо Господь Юмо кугыжаланаш тӱҥалын.

⁷ Куанышаш да йывыртышаш, Тудым чапландарышаш улына, вет Пачан сӱанже шуын, да Тудын налшаш ӱдыржӧ шкенжым ямдылен.

⁸ Тудлан чияш ару волгалтше виссон вургемым пуымо». Виссонжо святой-влакын чын пашашт лиеш.

⁹ Суксо мылам каласен: «Возо: Пачан сӱан сийышкыже ӱжмӧ-влак поро пиалан улыт». Вара ешарен: «Ниныже Юмын чын шомакше улыт».

¹⁰ Тунам мый, вуйым саваш манын, тудын йолжо деке кумык возынам, а тудо мылам ойлен: «Ончо, тыге ит ыште! Мый тый денет да Иисусын таныклымыжым кучышо иза-шольыч-влак дене пырля служитлыше улам. Юмылан вуетым саве». А Иисусын таныклымыже пророкла каласкалымын шӱлышыжӧ улеш.

¹¹ Мый почылтшо пылпомышым ужынам: теве ош имне, а ӱмбалныже шинчышым Ӱшанле да Чын манын лӱмдымӧ. Тудо чын почеш судитла да кредалеш.

¹² Тудын шинчаже – тулйылме гай, вуйыштыжо шуко диадим. Тудын возымо лӱмжӧ уло, тиде лӱмым Шкеж деч весе нигӧ ок пале.

¹³ Тудо вӱр дене йошкаргыше вургеман лийын, да Тудын лӱмжӧ – Юмын Шомакше.

¹⁴ Ош ару виссон вургеман пылпомышсо сарзе-влак, ош имньым кушкыжын, почешыже каеныт.

¹⁵ Умшаж гыч пӱсӧ керде лектын, тудын дене калык-влакым пытарышаш улмаш. Нуным Тудо кӱртньӧ тоя дене кӱташ тӱҥалеш, виноградым темден лукмо верыште Чылакучышо Юмын шыдыжын да чот сырымыжын аракажым Шке тошкен ышта.

¹⁶ Тудын вургемешыже да эрдешыже «Кугыжа-влакын Кугыжашт, господь-влакын Господьышт» манын возымо лӱм уло.

¹⁷ Мый кечыште шогышо ик Суксым ужынам. Кӱшнӧ каваште чоҥештылше кайык-влаклан тудо кугу йӱк дене кычкыралын: «Толза, Юмын кугу кас кочкышышкыжо погыныза!

¹⁸ Кугыжа, сарзывуй да виян-влакын капыштым, имне да имнешке-влакын капыштым, чыла эрыкан да кулын, изи еҥын да кугу еҥын капыштым кочса!»

¹⁹ Вара мый янлыкын, мландысе кугыжа-влакын да нунын сарзе-влакыштын погынымыштым ужынам. Нуно имне ӱмбалне Шинчыше дене да Тудын сарзыже-влак дене кредалаш ямдылалтыныт.

²⁰ Но янлыкым руалтен кученыт, тудын ончылно палдарыше палым ончыктышо шояк пророкымат пырля кученыт. Чудыжо-влак дене тудо янлыкын палыжым налше да янлыкын тӱсшылан вуйым савен кумалше-влакым ондален улмаш. Нуным когыньыштымат илышынек киш дене йӱлышӧ тулан ерыш шуымо.

²¹ А молыштым имне ӱмбалне Шинчышын умшаж гыч лекше керде дене пуштмо, да кайык-влак, нунын колышо капыштым кочкын, чылан темыныт.