Почм 18 - У Сугынь

18 ГЛАВА 1 – 19:5 Вавилонын шаланымыже.

¹ Тылеч вара мый пылпомыш гыч адак ик Суксо волымым ужынам. Тудын моткоч кугу властьше улмаш, да мланде тудын чапше дене волгалтарыме лийын.

² Суксо виян йӱк дене кычкыралын: «Сӱмырлен, кугу Вавилон ола сӱмырлен! Тудо ия-влакын илыме верышт, чыла осал шӱлышын шылме верже да чыла шакше да йыгыжге кайыкын шылме верже лийын. Вет тудо яжарланыме шыде аракажым чыла калыклан йӱктен,

³ мландӱмбалсе кугыжа-влак тудын дене пырля яжарланеныт да мландӱмбалсе сатузо-влак тудын моткоч ракатланен илымыжлан кӧра поеныт».

⁴ Вара пылпомыш гыч вес йӱкым колынам, тудо ойлен: «Мыйын калыкем, тиде ола гыч лек! Уке гын, тудын языкышкыже ушнет да тудын дене пырля эҥгекыш логалат.

⁵ Тудын языкше пылпомышыш шумеш шуын, да Юмо тудын чын огыл ыштымыжым шарналтен.

⁶ Кузе тыланда пуэн, тудлан тугак пуыза, пашажлан кӧра кок пачаш ешарен пӧртылтыза. Весылан аракам варен ямдылыме чашыштыже шкаланже кок пачаш варен ямдылыза.

⁷ Кунар тудо шкенжым чапландарен да ракатланен илен, тунар орланымашым да ойгым тудлан пуыза, вет шке шӱмыштыжӧ тудо ойла: ”Кугыжала шинчем, мый тулык вате омыл да ойгымат ом уж”.

⁸ Сандене эҥгекше ик кечыште толеш: колымаш, шортмаш да шужымаш. Тудо тул дене йӱлалтыме лиеш, вет тудым титаканыш лукшо Господь Юмо виян.

⁹ Тиде ола дене яжарланыше да ракатланыше мландӱмбалнысе кугыжа-влак тудын йӱлымӧ шикшыжым ончымышт годым тудын верч мӱгырен шорташ тӱҥалыт.

¹⁰ Нуно, тудын орланымыж деч лӱдын, ӧрдыжтӧ шогат да ойлат: ”Ойго, ойго тыланет, кугу ола, Вавилон, пеҥгыде ола! Тыйым судитлымаш иканаште толын!”

¹¹ Мландӱмбалсе сатузо-влак тудын верч шортыт да ойгырат, вет нунын сатуштым ынде нигӧ ок нал:

¹² шӧртньӧ ден шийым, шергакан кӱм, ракывотшерым, мотор йытын вынерым, шемалге-йошкар куэмым, порсыным, чевер куэмым, тӱрлӧ тамле пушан пушеҥгым, слон лу дене ыштыме тӱрлӧ ӱзгар-влакым, эн шергакан пушеҥге, вӱргене, кӱртньӧ, мрамор дене ыштыме ӱзгарым,

¹³ корицым, фимиамым, миром, ладыным, йошкар аракам, олив ӱйым, ложашым, шыдаҥым, вольыкым, шорыкым, имньым, орвам, айдеме капым да чоным.

¹⁴ ”Уло чонет дене налаш шонымо саскат тый дечет каен, чыла поян да чапле тый дечет йомын, ынде нуным нигунам от му.”

¹⁵ Чыла нине сатум налше да ужалыше, тиде яжар олалан кӧра пойышо сатузо-влак, тудын орланымыж деч лӱдын, ойгырен шортын ӧрдыжтӧ шогат да

¹⁶ ойлат: ”Ойго, ойго тыланет, кугу ола! Тый мотор йытын вургемым, шемалге-йошкаргым, чеверым чийыше, шӧртньӧ, шергакан кӱ да ракывотшер дене сӧрастарыме лийынат.

¹⁷ Ик шагатыште тыгай поянлык пытен!” Корабль виктарыше, корабль дене ийын коштшо, корабльыште ыштыше да теҥыз кӱшеш илыше-влак чылан ӧрдыжтӧ шогеныт

¹⁸ да, тудын йӱлымӧ шикшыжым ончен, кычкыралыныт: ”Тиде кугу ола гай вес ола уло мо?”

¹⁹ Нуно вуйышкышт пуракым шавеныт да ойгырен-шортын кычкыреныт: ”Ойго, ойго тыланет, кугу ола! Кӧн теҥыз корабльже лийын, олан шергакан сатуж дене чылан поеныт, но ик шагатыште чыла пытен”.

²⁰ Пылпомыш, святой-влак, Апостол ден пророк-влак, тудын дене мо лиймылан куаныза: тендам тудо кузе судитлен, тудым Юмо тугак судитлен».

²¹ Вара куатан ик Суксо кугу вакшкӱ гай кӱм налын, теҥызыш шуэн да ойлен: «Тыгай вий дене кугу Вавилон олат кудалтыме лиеш, ынде тудым огыт му.

²² Кӱсле дене шоктымым, мурымым, шиялтыш дене шоктымым, пучым пуалтымым тыйын уремыштет ынде огыт кол, пашаштлан уста тӱрлӧ кидмастар-влакым тыште ынде огыт му, вакш йоҥыштымо йӱк-йӱанат ок шокто.

²³ Олаште лампын тулжо ынде волгалтараш ок тӱҥал, каче ден ӱдырын йӱкыштым тыште ынде огыт кол. Вет тыйын сатузет-влак мландӱмбалне тӧра лийыныт, да тыйын юзыланымет чыла калыкым ондален.

²⁴ Пророк ден святой-влакын вӱрыштым, мланде ӱмбалне чыла пуштмо-влакын вӱрыштым тиде олаште мумо».