Почм 17 - У Сугынь

17 ГЛАВА 1-18 Яжарланыше ӱдырамаш да янлык.

¹ Шым чашым кучышо шым Суксо кокла гыч иктыже толын да мылам каласен: «Тышке тол, мый тыланет шуко вӱд ӱмбалне шинчыше чот яжарланыше ӱдырамашым судитлымым ончыктем.

² Тудын дене мландӱмбалсе кугыжа-влак яжарланеныт, да тудын яжарланымыжын аракаж дене мланде ӱмбалне илыше-влак руштыныт».

³ Вара Суксо мыйым шӱлыш дене ир мландыш наҥгаен. Мый йошкар янлык ӱмбалне шинчыше ӱдырамашым ужынам, янлыкын шым вуйжо да лу тӱкыжӧ лийын, капше Юмым мыскылыме лӱм-влак дене темалтше лийын.

⁴ Ӱдырамаш шемалге-йошкар да чевер вургеман лийын, шӧртньӧ, шергакан кӱ да ракывотшер дене сӧрастарыме улмаш, йырнык да яжарланымыжын амырчыкше дене темыме шӧртньӧ чашым кидыштыже кучен.

⁵ Тудын саҥгаштыже шолып шонымашан лӱмым возымо: «Кугу Вавилон – мландӱмбалсе яжарланыше-влакын да йырныкын авашт».

⁶ Святой-влакын вӱрышт да Иисусын таныклышыже-влакын вӱрышт дене тудын йӱын темше улмыжым мый ужынам. Ӱдырамашым ужмекем, мый моткоч чот ӧрынам.

⁷ Суксо мылам каласен: «Молан тый ӧрат? Мый тыланет тиде ӱдырамашын да тудым нумалше шым вуян, лу тӱкан янлыкын тайныштым каласем.

⁸ Тыйын ужмо янлык лийын, а ынде уке. Тудыжо пундашдыме келгыт гыч лектеш да пытымашке кая. Мландӱмбалне илыше-влак, кӧмытын лӱмыштым тӱням ыштыме годсекак илыш книгаш возымо огыл, янлыкым ужмекышт ӧрыт: тиде янлыкше лийын, ынде уке, но толеш.

⁹ Тыште уш-акыл кӱлеш. Шым вуй – тиде шым курык, нунын ӱмбалне ӱдырамаш шинча;

¹⁰ тыгак тиде шым кугыжа. Нунын кокла гыч визытынже сӱмырленыт, иктыже уло, пытартышыже але толын огыл, а кунам толеш, кужу жаплан кодшаш огыл.

¹¹ Тиде янлык, кудо лийын да ынде уке, тудо кандашымше, но нине шымыт кокла гыч улеш да пытымашке кая.

¹² Тыйын ужмо лу тӱкӧ – тиде лу кугыжа, нуно кугыжанышым але налын огытыл, но янлык дене пырля кугыжан гай властьым ик шагатлан налыт.

¹³ Нуно икоян лийыт: вийыштымат, властьыштымат янлыклан пуат.

¹⁴ Нуно Пача дене кредалаш тӱҥалыт, да Пача нуным сеҥа, вет Тудо – господь-влакын Господьышт да кугыжа-влакын Кугыжашт, а Тудын дене пырля улшо-влакше ӱжмӧ, ойырен налме да ӱшанле улыт».

¹⁵ Вара Суксо мылам ойлен: «Яжарын шинчыме верыште тыйын ужмо тӱрлӧ вӱд – тидыже калык, еҥ тӱшка, тукым да йылме-влак.

¹⁶ Янлыкын тыйын ужмо лу тӱкыжӧ яжарым ужмышудымо лийыт. Нуно тудым нимо деч посна, чарам кодат, капшым кочкыт, яжарым тулеш йӱлалтат.

¹⁷ Вет Юмо шкенжын эрыкшым шуктымым нунын шӱмышкышт пыштен, сандене нуно икоян кумылыштым шуктат да, Юмын шомакше шукталтмешке, янлыклан шкеныштын кугыжанышыштым пуат.

¹⁸ А тыйын ужмо ӱдырамаш мландӱмбалсе кугыжа-влак дене кугыжаланыше кугу ола улеш».