Почм 14 - У Сугынь

14 ГЛАВА 1-5 Сион курыкышто у муро. 6-13 Кум Суксо. 14-20 Мланде ӱмбалне тӱредмаш.

¹ Мый ужынам: теве Сион курыкышто Пача шога, Тудын дене пырля шӱдӧ нылле ныл тӱжем еҥ лийын, нунын саҥгаштышт Тудын Ачажын лӱмжым возымо.

² Мый пылпомыш гыч шуко вӱд лӱшкымӧ, виян кӱдырчӧ кӱдыртымӧ гай йӱкым колынам. Мый кӱслезе-влакын кӱслештым шоктымо гай йӱкым колынам.

³ Нуно престол ончылно, ныл илыше да старец-влак ончылно у гай мурым муреныт. Мландӱмбач тӱлен налме 144 тӱжем еҥ деч моло тиде мурым нигӧ мураш тунем кертын огыл.

⁴ Нине еҥ теве кӧ улыт: нуно шкеныштым ӱдырамаш-влак дене амыртен огытыл, нарашта ӱдыр гай ару улыт, да Пача кушко кая, почешыже мият. Нуным Юмылан да Пачалан икымше шочшо семын еҥ-влак кокла гыч тӱлен налме.

⁵ Йылмыштышт шоя уке, Юмын престолжо ончылно ситыдымаш деч посна улыт.

⁶ Вара мый кӱшнӧ, пылпомыш покшелне чоҥештыше эше ик Суксым ужынам. Мланде ӱмбалне илыше-влаклан, чыла калыклан, тукымлан, йылмылан да йыжыҥлан увертарыже манын, тудын курымашлык Евангелийже улмаш.

⁷ Тудо кугу йӱк дене ойлен: «Юмо деч лӱдса, Тудым чапландарыза, вет Тудын судитлыме жапше толын. Кавам да мландым, теҥызым да памаш-влакым Пӱрышылан, сукен, вуйым савыза!»

⁸ Тудын почеш кокымшо Суксо толын да ойлен: «Сӱмырлен! Яжарланыме шыде аракажым чыла калыклан йӱктымыжлан кугу Вавилон ола сӱмырлен!»

⁹ Вара кумшо Суксо нунын почеш толын да виян йӱк дене ойлен: «Кӧ янлыклан да тудын тӱсшылан вуйым савен кумалеш да тудын палыжым шке саҥгашкыже але кидышкыже шындыкта гын,

¹⁰ тудыжо Юмын шыдыжын аракажым, вӱд дене варыдыме, Юмын шыдыжын чашешыже ямдылыме аракам йӱшаш да святой Суксо-влак ден Пача ончылно тул да киш дене орландарыме лийшаш.

¹¹ Тыгай еҥ-влакым орландарыме деч лекше шикш курым-курымеш нӧлталташ тӱҥалеш. Кӧ янлыклан да тудын тӱсшылан вуйжым савен кумалеш да тудын лӱм палыжым шкаланже шындыкта, тугай еҥлан йӱдымат, кечывалымат тыныс ок лий.

¹² Тыштыже Юмын кӱштымыжым шуктышо да Иисуслан ӱшанле святой-влакын чытымашышт».

¹³ Вара мый пылпомыш гыч йӱкым колынам, тудо мылам ойлен: «Кӧмыт тылеч вара Господь дене ушнымаште колат, нуно пиалан улыт манын возо». «Туге, – Шӱлыш ойла, – нуно шке пашашт деч канат, да нунын пашашт почешышт кая».

¹⁴ Мый ужынам: теве ош пыл, пыл ӱмбалне Айдеме Эргыла койшо шинчен, вуйыштыжо шӧртньӧ вуйшӱдыш, кидыштыже пӱсӧ сорла.

¹⁵ Вара храм гыч вес Суксо лектын да пыл ӱмбалне шинчышылан виян йӱк дене кычкыралын: «Сорлатым колто да тӱред! Тӱредме жап толын, мланде ӱмбалне шурно шуын».

¹⁶ Тунам пыл ӱмбалне шинчыше сорлажым мланде ӱмбаке шуэн, да мланде тӱредме лийын.

¹⁷ Вара пылпомышсо храм гыч адак ик Суксо лектын, тудынат пӱсӧ сорлаже лийын.

¹⁸ Вес Суксо жертвенник деч лектын, тудо тулым кид йымалныже кучен. Пӱсӧ сорлам кучышылан тудо виян кычкыралын: «Пӱсӧ сорлатым колто да мландӱмбалсе виноград орлаҥгым пӱчкеде, вет саскаже шуын».

¹⁹ Суксо сорлажым мланде ӱмбаке шуэн, мландӱмбалсе виноград орлаҥгым, пӱчкын, саскавӱдым темден лукмо верыш, Юмын шыдыжын шучко верышкыже, шуэн.

²⁰ Саскажым ола деч ӧрдыжтӧ темден лукмо верыште тошкеныт, да тушечын тӱжем куд шӱдӧ стадийыш вӱр йоген лектын да имньын шӧрмычшӧ марте шуын.