Почм 13 - У Сугынь

13 ГЛАВА 1-18 Кок шучко янлык.

¹ Мый теҥыз серысе ошмаш шогалынам да теҥыз гыч янлыкын лекмыжым ужынам. Тудын шым вуйжо да лу тӱкыжӧ лийын, тӱкыштыжӧ лу диадим, а вуйлаштыже – Юмым мыскылыме лӱм-влак.

² Мыйын ужмо янлыкше барс гай лийын, а йолжо – маскан гай, умшаже – левын умшаж гай. Дракон тудлан шке вийжым, шке престолжым да кугу властьым пуэн.

³ Мый ужынам: янлыкын ик вуйжо колышаш гай сусыргышо лийын улмаш, но сусыржо паремын. Уло мланде ӧрмыж дене янлык почеш эскерен. Янлыклан властьым пуышо драконлан еҥ-влак, кумалын, вуйым савеныт

⁴ да янлыклан, сукен, вуйым савен ойленыт: «Кӧ тиде янлык гай, да кӧ тудын дене кредалын кертеш?»

⁵ Янлыклан кугешнен да Юмым мыскылен ойлышо умша пуалтын, тыгак тудлан нылле кок тылзе шке пашажым ышташ эрыкым пуымо.

⁶ Юмым мыскылаш, Тудын лӱмжым, илемжым да пылпомышто илыше-влакым вурсаш умшажым почын.

⁷ Святой-влак ӱмбаке сар дене каяш да нуным сеҥаш тудлан эрык пуалтын, тыгак чыла йыжыҥ, калык, йылме да тукым-влакым тудын кидышкыже пуымо.

⁸ Мландӱмбалне чыла илыше, кӧн лӱмыштым шӱшкылмӧ Пачан илыш книгаштыже тӱня тӱҥалтыш гычак возымо огыл, сукен, янлыклан вуйым сават.

⁹ Кӧн пылышыже уло, тек колеш.

¹⁰ Кӧ пленыш наҥгая, пленыш логалеш, кӧ керде дене пуштеш, керде деч колышаш. Тыштыже святой-влакын чытымашышт да ӱшанымашышт.

¹¹ Мый вес янлыкын мланде гыч лекмыжым ужынам, тудын пачан гай кок тӱкыжӧ лийын, да дракон семын ойлен.

¹² Тудо икымше янлыкын чумыр властьше дене тудын ончылно ышта, колымашыш шуктышо сусыр деч паремше икымше янлыклан вуйым савен кумалаш уло мландым да мландӱмбалне илыше-влакым ӧкымла.

¹³ Тудо кугу палдарыше пале-влакым ончыкта, еҥ-влак ончылно пылпомыш гыч мландыш тулымат волта.

¹⁴ Янлык ончылно тудлан ышташ пуымо палдарыше пале-влак дене мланде ӱмбалне илыше-влакым ондала, керде дене сусыргышо да илыше кодшо янлык лӱмеш тӱсым ышташ мланде ӱмбалне илыше-влаклан кӱшта.

¹⁵ Янлыкын тӱсшылан шӱлышым пурташ тудлан эрык пуалтын, сандене янлыкын тӱсшӧ ойлашат тӱҥалын да, кӧ янлыкын тӱсшылан вуйым савен кумалын огыл, чылаштым пуштыктен.

¹⁶ Изилан да кугулан, поянлан да йорлылан, эрыканлан да куллан – чылаштлан пурла кидышкышт але саҥгашкышт палым шындыкта.

¹⁷ Тыгеракын, тиде палым – янлыкын лӱмжым але лӱмжын чотшым – налше деч молыжо ужаленат, налынат огыт керт.

¹⁸ Тыште кугу уш-акыл. Кӧн ушыжо уло, тек янлыкын чотшым шотла: тиде айдемын чотшо, тудын чотшо – куд шӱдӧ кудло кудыт.