Почм 12 - У Сугынь

12 ГЛАВА 1-17 Ӱдырамаш ден дракон.

¹ Пылпомышто палдарыше кугу пале кончен: кече дене вӱдылалтше ӱдырамаш, йол йымалныже тылзе, а вуйыштыжо латкок шӱдыран вуйшӱдыш.

² Ӱдырамаш нелемше улмаш, йоча ыштыме корштымаш дене орланен кычкырен.

³ Вара пылпомышто палдарыше вес пале кончен: теве шым вуян, лу тӱкан, тул гай йошкар кугу дракон, тудын вуйлаштыже шым диадим.

⁴ Тудын почшо кавасе шӱдыр-влакын кумшо ужашыштым ӱлыкӧ шупшылын да нуным мланде ӱмбаке йоктарен. Драконжо азам ыштыше ӱдырамаш ончылно шоген, аза шочмеке, тудым кочнеже улмаш.

⁵ Ӱдырамаш эрге азам ыштен, эргыже чыла калыкым кӱртньӧ тоя дене кӱтышаш. Ӱдырамашын икшывыже Юмо деке да Тудын престолжо деке налме лийын.

⁶ А ӱдырамаш ир мландыш куржын, тудлан тушто Юмын ямдылыме вер лийын, тушто тудым тӱжем кок шӱдӧ кудло кече пукшаш тӱҥалыт.

⁷ Вара пылпомышто сар тӱҥалын: Михаил да тудын Суксыж-влак дракон ӱмбаке сар дене каеныт. Дракон да тудын суксыж-влак кредалыныт,

⁸ но вийышт ситен огыл, нунылан пылпомышто ынде вер лийын огыл.

⁹ Уло сандалыкым ондалыше кугу драконым, акрет годсо кишкым, диавол да сатана манын лӱмдымым, мланде ӱмбаке сӱмырал шуэныт, тудын дене пырля суксыж-влакымат сӱмыралыныт.

¹⁰ Вара мый виян йӱкым колынам, тудо пылпомышто ойлен: «Мемнан Юмынан утарымашыже, куатше да Кугыжанышыже, Тудын Христосшын властьше ынде толын, вет мемнан иза-шольынам титаклышым, мемнан Юмына ончылно нуным йӱдшӧ-кечыже титаклышым, сӱмырал шуымо.

¹¹ Тудым нуно Пачан вӱржӧ да шке таныклыме мутышт дене сеҥеныт, чоныштымат чаманен огытыл, колашат ямде лийыныт.

¹² Тугеже, пылпомыш да тушто илыше-влак, куаныза! А мланде ӱмбалне да теҥызыште илыше-влаклан – ойго! Тендан деке диавол волен, жапше шагал улмым паленат, тудым ажгынымаш авалтен».

¹³ Шкенжым мланде ӱмбаке сӱмыралмым ужмеке, эрге азам ыштыше ӱдырамашым дракон поктылаш тӱҥалын.

¹⁴ Ир мландышке, палемдыме верыш, ӱдырамаш чоҥештен каен кертше манын, тудлан кугу пӱркытын кок шулдыржым пуымо: тушто, кишке деч тораште, пагыт, кок пагыт да пелпагыт жапыште тудо пукшымо лийшаш.

¹⁵ Ӱдырамашым йогын дене наҥгаяш манын, тудын почеш кишке умшаж гыч эҥер семын вӱдым йоктарен колтен.

¹⁶ А ӱдырамашлан мланде полшен: мланде шке умшажым почын да драконын умшаж гыч колтымо эҥерым нелын.

¹⁷ Ӱдырамашлан дракон чот сырен да тудын моло икшывыж-влак дене кредалаш каен, Юмын кӱштымыжым шуктышо, Иисус Христосын таныклымыжым кучышо моло шочшыж ваштареш кынелын.