СВЯТОЙ АПОСТОЛ ПАВЕЛЫН ФИЛИППЫШТЕ ИЛЫШЕ-ВЛАКЛАН КОЛТЫМО СЕРЫШЫЖЕ 2 - У Сугынь

2 ГЛАВА 1-11 Христосын корныжо. 12-18 Утаралтмаш верч тыршыза. 19-30 Тимофей ден Епафродит.

¹ Тыгеже, Христос дене ушнымаш тендам кумылаҥда гын, Тудын йӧратымыже тендам лыпландара гын, Шӱлыш дене ушнымаш уло гын, шӱм кумыл да порылык уло гын,

² мыйын куанем тичмашым ыштыза: чылан ик семын шоныза, икгай йӧратымашан, икоян да ик кумылан лийза.

³ Тавалымылан але чапланаш тыршымылан кӧра нимом ида ыште, а ӱҥышын икте-весым шке дечда кугураклан шотлыза.

⁴ Тек кажныже шке пайдаж нерген веле огыл, а молынат пайдаж нерген шона.

⁵ Тендан шонымашда да шӱм шижмашда Христос Иисусын гаяк лийже.

⁶ Тудо, чын Юмо улмыж ӱмбач, Юмо дене тӧр лияш тӧчен огыл,

⁷ а Шкенжым Шке ӱлык шынден, тарзын тӱсшым налын, айдеме гай лийын, Тудым чылан айдеме тӱсаным ужыныт.

⁸ Тудо Шкенжым Шке изиэш луктын, колымо марте, ыресеш колымо мартеат, мутым колыштшо лийын.

⁹ Садлан Юмо Тудым кӱшкӧ нӧлтен, чыла лӱм дечат кӱшнӧ шогышо лӱмым пуэн.

¹⁰ Тыгеракын, пылпомышсо, мландысе да мланде йымалсе-влак чылан Иисус лӱмеш сукалтышаш улыт,

¹¹ кажне йылме, Ача Юмын чапшым нӧлташ, Иисус Христосым Господь манын почын ойлышаш.

¹² Тыгеракын, йӧратыме иза-шольым-влак, тендан дене лиймем годым кузе мыйым эре колыштында, ынде тендан деч тораште улмем годым эшеат утларак колыштса: шкендан утаралтмашдам лӱдын да тыршен шуктыза.

¹³ Юмо Шкеак тендан кӧргыштыда пашажым ышта, тыгеже те Тудын поро эрыкше дене келшыше пашам ыштынеда да ыштеда.

^14-15 Локтылалтше да пужлышо тукым коклаште те шылталаш амалдыме, яндар, Юмын титакдыме икшывыже лийза манын, чылажымат ӧпкелыде да кокыте шоныде ыштыза. Тыгай тукым коклаште те тӱняште шӱдыр семын йолгалтыда,

¹⁶ илыш шомакым кучеда. Чыла тидлан кӧра Христосын кечынже мый моктанен кертам, вет тидыже мыйын арам огыл тыршымем да арам огыл пашам ыштымем ончыкта.

¹⁷ Но ӱшанымашда верч надырым пуэн эртарыме служитлымаште жертве лиям ыле гынат, мый куанем, чыланда дене пырля йывыртем.

¹⁸ Тыгак теат куаныза, мый денем пырля куаныза.

¹⁹ Тендан кузе илымыда нерген пален налын, мыйынат кумылем нӧлтшӧ манын, тендан деке вашке Тимофейым колтен керташ Господь Иисус дене ушнен ӱшанем.

²⁰ Тудын семын уло чон дене тендан верч тыршыше мыйын нигӧ весе уке,

²¹ вет чылан Иисус Христосын пашаж верч огыл, а шкеныштын пашашт верч веле тыршат.

²² А Тимофейлан ӱшанаш лиеш манын, те паледа: Поро Уверлан тудо мый денем ачаж дене эрге пырля ыштыме семын ыштен.

²³ Тугеже, мый денем мо лийшашым пален налмекем, тудым тунамак колтен кертам манын ӱшанем.

²⁴ Мый шкежат вашке тендан деке толам манын, Господь мылам ӱшаным пуа.

²⁵ Но Епафродитым, мый денем пырля ыштыше да тыршыше изанам, мыланем кӱлмӧ годым полшаш колтымо еҥдам, тендан деке колташ кӱлешлан шотлем.

²⁶ Тудо тендам чыландам пешак ужнеже да черланымыж нерген уверым колмыланда тургыжлана.

²⁷ Епафродит чынжымак колышаш гай черле лийын, но Юмо тудым чаманен, да тудым веле огыл – мылам ойго ӱмбак ойго ынже ешаралт манын, шкемымат чаманен.

²⁸ Тыгеже тыланда, тудым угыч ужмеке, куан лийже, а мыланем шагалрак ойго лийже манын, мый тудым вашкерак колтенам.

²⁹ Тудым Господь дене ушнымаште куанен вашлийза да тудын гай еҥ-влакым пагалыза.

³⁰ Тудыжо Христосын пашажлан лийын изиш гына колен огыл. Могай полышым те мыланем пуэн кертын огыдал, тудым пуаш манын, илышыжымат чаманен огыл.