Мк 9 - У Сугынь

9 ГЛАВА 2-13 Волгалт вашталтмаш. 14-29 Осал шӱлыш дене орланыше рвезым паремдымаш. 30-32 Иисус угычын Шкенжын колымыж да ылыжмыж нерген каласкала. 33-37 Кӧжӧ кугурак? 38-41 Кӧ мемнан ваштареш огыл, тудо мемнан верч. 42-50 Алгаштарыме нерген.

¹ Тудо нунылан эше каласен: «Тыланда чынак ойлем: Юмын Кугыжанышын уло куат дене толмыжым ужмешке, тыште шогышо кокла гыч южышт огыт коло».

² Куд кече гыч Иисус пеленже Петрым, Иаковым, Иоанным налын да нуным кӱкшӧ курык ӱмбаке посна намиен. Тушто нунын ончылно волгалт вашталтын.

³ Тудын вургемже йылгыжше, лум гай моткоч ошо лийын. Тӱнямбалсе ик ошемдышат тыге ошемден ок керт.

⁴ Нунылан Илия ден Моисей конченыт да Иисус дене мутланеныт.

⁵ Петр Иисуслан каласен: «Равви! Тыште улмына моткоч сай. Айста кум омашым ыштена: иктым Тыланет, иктым Моисейлан да Илиялан иктым».

⁶ Тунемше-влак пеш чот лӱдыныт, сандене Петр мом ойлымыжымат пален огыл.

⁷ Но тиде жапыште нуным пыл леведын, а пыл лоҥга гыч йӱк шоктен: «Тиде Мыйын йӧратыме Эргым, Тудым колыштса!»

⁸ Тунамак, йырымваш ончалмекышт, воктенышт Иисус деч молым ынде нигӧм ужын огытыл.

⁹ Курык гыч волымышт годым Тудо кӱштен ойлен: «Айдеме Эргын колымаш гыч ылыж кынелмешкыже, мом ужмыдам нигӧлан ида каласкале».

¹⁰ Нуно Иисусын мутшым ушыш пыштеныт да, колымаш гыч ылыж кынелмаш мом ончыкта манын, икте-весышт деч йодыштыныт.

¹¹ Тунемшыж-влак Иисус деч йодыныт: «Но кузе законым туныктышо-влак ондак Илия толшаш манын ойлат?»

¹² «Чын, – вашештен Иисус, – Илия ондак толеш да чылажымат тӧрлен ямдыла. А возымо семын Айдеме Эрге шуко орланышаш да ӱлык шындыме лийшаш.

¹³ Тыланда ойлем: Илият ынде толын, тудын дене мом шонымыштым ыштеныт. Тудын нерген тыгак возымо».

¹⁴ Моло тунемшыж-влак деке мӧҥгеш пӧртылмекыже, Иисус нунын йыр шуко калыкым да тунемше-влак дене ӱчашыше закон туныктышо-влакым ужын.

¹⁵ Иисусым ужмеке, уло калык ӧрын, еҥ-влак Тудын деке куржын миеныт да саламленыт.

¹⁶ Иисус закон туныктышо-влак деч йодын: «Мо нерген те нунын дене ӱчашеда?»

¹⁷ Еҥ тӱшка гыч икте вашештен: «Туныктышо, мый Тый декет йылмыдыме шӱлыш кучыман эргым конденам.

¹⁸ Кеч-кушто осал шӱлыш тудым куча, мланде ӱмбаке йӧрыкта. Эргымын умша гычше шоҥ лектеш, тудо пӱйым пуреш, тӱҥеш. Мый тунемшет-влак деч эргымын кӧргӧ гыч осал шӱлышым поктен лукташ йодынам, но нуно кертын огытыл».

¹⁹ Иисус каласен: «О, ӱшаныдыме тукым! Мыняр Мылам эше тендан дене лийман? Мыняр Мылам тендам чытыман? Тудым Мый декем кондыза».

²⁰ Рвезым Тудын деке конденыт. Иисусым ужын, осал шӱлыш рвезым тунамак чытырыктен. Рвезе мланде ӱмбаке йӧрлын, пӧрдалын, да умша гычше шоҥ лекташ тӱҥалын.

²¹ Ачаж деч Иисус йодын: «Кунамсек тудын дене тыге лийын?» Тудо вашештен: «Йоча годсекак.

²² Пытараш манын, осал шӱлыш тудым шуко гана тулышкат, вӱдышкат шуэн. Но иктаж-мом ыштен кертат гын, мемнам чамане, мыланна полшо!»

²³ Иисус тудлан каласен: «Иктаж-мыняр ӱшанен кертат гын – ӱшаныше чыла ыштен кертеш».

²⁴ Йочан ачаже тунамак шинчавӱд йӧре кычкыралын: «Господь, мый ӱшанем! Ӱшанен моштыдымемлан полшо».

²⁵ Калык погынымым ужын, Иисус осал шӱлышлан шӱден: «Йылмыдыме да соҥгыра шӱлыш, Мый тыланет кӱштем: тудын кӧргӧ гыч лек да ит пӧртыл!»

²⁶ Осал шӱлыш кычкыралын, рвезым чот чытырыктен да кӧргыж гыч лектын. Рвезе колышо гай лийын. «Колыш», – ятыр еҥ ойлен.

²⁷ Но Иисус тудым кидше гыч кучен, кынелашыже полшен, рвезе кынел шогалын.

²⁸ Кунам Иисус пӧртышкӧ пурен, тунемшыж-влак, Тудын дене шкет кодмеке, йодыныт: «Молан ме тиде шӱлышым поктен луктын кертын огынал?»

²⁹ Иисус вашештен: «Тыгай шӱлышым кумалме да пӱтым кучымо дене веле поктен лукташ лиеш».

³⁰ Иисус ден тунемшыж-влак, тиде верым коден, Галилей вошт эртен каеныт. Нунын кушто улмыштым Иисус ынеже палдаре улмаш.

³¹ Тудо тунемшыж-влакым туныктен да нунылан ойлен: «Айдеме Эрге айдеме кидышке пуалтеш, да Тудым пуштыт. Пуштмеке, кумшо кечын Тудо ылыж кынелеш».

³² Но тиде шомакым нуно умылен огытыл, а Тудын деч йодаш лӱдыныт.

³³ Иисус Капернаумыш толын. Пӧртышкӧ пурымекыже, Тудо нунын деч йодын: «Те корнышто мо нерген кутырышда?»

³⁴ Но тунемшыж-влак нимом пелештен огытыл, вет нуно шке коклаштышт кӧжӧ кугурак манын корнышто ӱчашеныт.

³⁵ Тунам Иисус шинчын, шке йырже латкок тунемшыжым поген да каласен: «Кӧ эн ончылно лийнеже, тек тудо эн шеҥгелне да чылалан тарзе лиеш».

³⁶ Иисус йочам налын, нунын коклашке шогалтен, ӧндалын да ойлен:

³⁷ «Кӧ тидын гай ик йочам Мыйын лӱмем верч йӧратен налеш гын, Мыйым налеш. А кӧ Мыйым налеш, тудо Мыйым огыл, Мыйым Колтышым налеш».

³⁸ Иисуслан Иоанн каласен «Туныктышо! Тыйын лӱмет дене иям поктен лукшо ик еҥым ужынна. Тудо мемнан дене пырля огыл, садлан ме тудым чарышна».

³⁹ Но Иисус вашештен: «Тудым ида чаре. Кӧ Мыйын лӱмем дене чудым ышта, тудо Мыйын нерген вигак осалым ойлен ок керт.

⁴⁰ Кӧ тендан ваштареш огыл, тудо тендан верч шога.

⁴¹ Тыланда чынак ойлем: Мыйын лӱмемлан кӧра да Христосын улмыланда верч кӧ тыланда корка вӱдым йӱаш пуа гынат, тудо суапым налде ок код.

⁴² А Мыланем ӱшаныше тыгай изирак-влак кокла гыч иктыжым чын корно гыч кӧ кораҥда гын, тудын шӱйышкыжӧ вакшкӱм сакен, теҥызыш шуат гын, тудлан сайрак лиеш ыле.

⁴³ Кидет тыйым алгаштарынеже гын, тудым руал шу. Тамыкысе йӧрташ лийдыме тулыш кок кидан логалмешке, илышыш пел кидан пураш тыланет сайрак.

⁴⁴ Тамыкыште ”нунын шукшыштат ок коло, тулат ок йӧрӧ”.

⁴⁵ Йолет тыйым алгаштарынеже гын, тудым руал шу. Тамыкыш йӧрташ лийдыме тулыш кок йолан кудалтыме лиймешке, илышыш пел йолан пураш тыланет сайрак.

⁴⁶ Тамыкыште ”нунын шукшыштат ок коло, тулат ок йӧрӧ”.

⁴⁷ Шинчат тыйым алгаштарынеже гын, тудым луктын шу. Тулан тамыкыш кок шинчан кудалтыме лиймешке, Юмын Кугыжанышыш пел шинчан пураш тыланет сайрак.

⁴⁸ Тамыкыште ”нунын шукшыштат ок коло, тулат ок йӧрӧ”.

⁴⁹ Кажне еҥ тул дене шинчалтыме лиеш, да кажне надыр шинчал дене шинчалтыме лиеш.

⁵⁰ Шинчал сай. Но шинчал шинчалан лиймым чарна гын, мо дене тудым угыч шинчаланым ыштен кертыда? Тендан кӧргыштыда шинчал лийже, да икте-весе дене келшен илыза».