Мк 6 - У Сугынь

6 ГЛАВА 1-6 Назаретыште илыше-влак Иисуслан огыт ӱшане. 7-13 Иисус латкок Апостолжым колта. 14-29 Тынеш Пуртышо Иоаннын колымыжо. 30-44 Вич тӱжем еҥым теммеш пукшымаш. 45-52 Иисус вӱд ӱмбач кая. 53-56 Геннисаретыште черле-влакым паремдымаш.

¹ Иисус тушечын лектын каен да кушмо кундемышкыже толын, тунемшыж-влакат пырля лийыныт.

² Шуматкече шумеке, Тудо синагогышто туныкташ тӱҥалын. Иисусым колыштшо-влак коклаште шукышт ӧрын йодыштыныт: «Кушечын Тудын чыла тиде? Могай кугу уш-акыл Тудлан пуалтын? Могай чудо-влак Тудын кид дене ышталтыт!

³ Тудыжо плотник, Мариян эргыже, Иаковын, Иосийын, Иудан да Симонын шольышт огыл мо? Тудын акаж-влакат мемнан коклаште огытыл мо?» Нуно Тудлан ӱшанен огытыл.

⁴ Но Иисус нунылан каласен: «Шке олаштыже, родо-тукым коклаштыже да суртыштыжо веле пророк чап деч посна лиеш».

⁵ Тудо тыште нимогай чудым ыштен кертын огыл. Икмыняр еҥым гына, ӱмбакышт кидым пыштен, паремден.

⁶ Нине еҥын ӱшанышт укелан Иисус ӧрын. Вара Иисус тиде кундемысе илемлаште коштын да туныктен.

⁷ Иисус латкок тунемшыжым ӱжын да кокыт дене шеледен колташ тӱҥалын. Тудо нунылан осал шӱлышым поктен лукташ вийым пуэн

⁸ да корнышко пондо деч молым нимом налаш кӱштен огыл: киндымат, сумкамат, ӱштеш оксамат,

⁹ но йолышко тыглай йолчиемым чияш, а кок вургемым чияш огыл.

¹⁰ Нунылан ойлен: «Пӧртышкӧ пурымекыда вес вере кайымешкыда туштак илыза.

¹¹ Иктаж-могай верыште тендам огыт пурто, але ынешт колышт гын, тушеч лекса да йол гычда пуракым почкалтыза. Тидыже нунылан ончылгоч шижтарымаш лиеш. Чынак тыланда ойлем: суд кечын Содом ден Гоморралан тиде ола деч куштылгырак лиеш».

¹² Тунемше-влак каеныт, языкым касарыкташ да Юмо деке савырнаш туныктен коштыныт.

¹³ Нуно шуко иям поктен луктыныт да шуко черлым ӱй дене шӱрен паремденыт.

¹⁴ Ирод кугыжат Иисус нерген колын, вет Тудын лӱмжӧ чыла вере палыме лийын. Ирод ойлен: «Тиде Тынеш Пуртышо Иоанн колымаш гыч ылыжын, сандене Тудын гоч тыгай чудо-влак лийыт».

¹⁵ Весышт – Илия манын ойленыт. А кумшышт – пророк але пророк кокла гыч иктыж гай маныныт.

¹⁶ Тидын нерген колмеке, Ирод каласен: «Тиде мыйын кӱштымем почеш вуйжым руал ойырымо Иоанн. Тудо колымаш гыч ылыжын».

¹⁷ Ирод шкеже Иоанным кучаш кӱштен да казаматыш петырен улмаш. Тидым Филипп изажын Иродиада ватыжлан кӧра ыштен. Иродиадам Ирод марлан налын,

¹⁸ сандене Иоанн тудлан каласен: «Тыланет изатын ватыж дене илаш ок лий».

¹⁹ Но Иродиада Иоаннлан сырымым кӧргыштыжӧ кучен да тудым пушташ шонен. Туге гынат кертын огыл.

²⁰ Ирод пален: Иоанн чын ыштыше да святой айдеме, сандене тудын деч лӱдын да тудым арален. Иоаннын ойлымыжым колыштын, Ирод шуко ыштен, тудым колышташ йӧратен.

²¹ Иродиадалан келшыше йӧн Иродын шочмо кечын лектын. Ирод чыла тӧралан, сарзе-влакын вуйлатышыштлан да Галилейысе эн пагалыме еҥ-влаклан пайремым ыштен.

²² Иродиадан ӱдыржӧ тушко пурен да куштен, Иродланат, тудын дене пырля кочшо унаж-влакланат чот келшен. Кугыжа ӱдырлан каласен: «Мом шонет – йод, мый пуэм».

²³ Тудлан эше товатлен: «Кеч-мом йодат гынат, пел кугыжанышем марте пуэм».

²⁴ Ӱдыр лектын да аваж деч йодын: «Мом йодаш?» Аваже вашештен: «Тынеш Пуртышо Иоаннын вуйжым».

²⁵ Ӱдыр тунамак кугыжа деке писын пурен да каласен: «Тынеш Пуртышо Иоаннын вуйжым мыланем, кӱмыжеш пыштен, кызытак пу».

²⁶ Кугыжа чот ойганен, но чыла уна ончылно товатлымыжлан кӧра тореш ынеж каласе улмаш.

²⁷ Иоаннын вуйжым кондаш кӱштен, тудо тунамак оролым колтен.

²⁸ Орол казаматыш каен да Иоаннын вуйжым руал ойырен. Вара тудым кӱмыжыш пыштен конден да ӱдырлан пуэн. А ӱдыр аважлан пуэн.

²⁹ Иоаннын тунемшыж-влак, тидын нерген колмеке, толыныт, тудын капшым налыныт да шӱгарыш пыштеныт.

³⁰ Апостол-влак Иисус деке погыненыт да мом ыштымышт, калыкым молан туныктымышт нерген чылажымат ойленыт.

³¹ Иисус нунылан каласен: «Ӧрдыжкырак, тымык верыш, посна каена, тушто изиш каналтыза». Вет шуко еҥ толмо-кайымылан кӧра нунын кочкашыштат жапышт лийын огыл.

³² Нуно, пушыш шинчын, тымык верыш посна каеныт.

³³ Но шукышт кайымыштым ужыныт да нуным паленыт, почешышт чыла ола гыч куржыныт, тушко ондакрак миен шуыныт да Тудын деке погыненыт.

³⁴ Серыш лекмеке, шуко калыкым ужынат, Иисус нуным чаманен. Еҥ-влак кӱтӱчӧ деч посна кодшо шорык тӱшка гай лийыныт. Нуным шукылан туныкташ тӱҥалын.

³⁵ Ятыр жап эртымеке, тунемшыж-влак Иисус деке миеныт да ойленыт: «Вержат тыште калык илыдыме, ынде жапат шуко эртен.

³⁶ Калыкым колто. Тек нуно лишыл яллашке да илемлашке каят да шкаланышт киндым налыт, вет кочкаш нимошт уке».

³⁷ Но Иисус вашештен: «Те нунылан кочкаш пуыза». Тунемшыж-влак каласеныт: «Ме кок шӱдӧ динарийлан киндым налаш кайышаш да нунылан кочкаш пуышаш улына мо?»

³⁸ Тудо йодын: «Тендан кунар киндыда уло? Мийыза, ончалза». Пален налмекышт, нуно ойленыт: «Вич сукыр кинде да кок кол».

³⁹ Иисус калыкым ужар шудо ӱмбаке тӱшкан-тӱшкан шындаш кӱштен.

⁴⁰ Витле да шӱдӧ еҥ дене чыланат радам дене шинчыныт.

⁴¹ Иисус вич кинде ден кок колым кидыш налын, пылпомышко ончалын да благословитлен. Вара киндым тодылын, калыклан пуэдышт манын, тунемшыж-влаклан пуэн. Тиде кок колымат чылалан пайлен.

⁴² Чылан теммешке кочкыныт.

⁴³ Кодшо катыш дене латкок комдым поген теменыт. Тыгак кодшо колымат погеныт.

⁴⁴ Кочшо пӧръеҥ-влак вич тӱжем нарын лийыныт.

⁴⁵ Тунамак Иисус тунемшыж-влаклан, пушыш шинчын, вес велысе Вифсаида велке Шкеж деч ондакрак вончаш кӱштен. А Шкеже калыкым ужатен колташ кодын.

⁴⁶ Нуным колтымеке, курыкыш кумалаш каен.

⁴⁷ Кас шуын. Пуш теҥыз покшелне улмаш, а Иисус шкетын серыште лийын.

⁴⁸ Тунемшыж-влакын мардеж ваштареш пуш дене нелын ийын кайымыштым ужынат, Иисус йӱдым, нылымше орол годым, теҥыз ӱмбач ошкеден толын да нунын воктеч эртен кайынеже улмаш.

⁴⁹ Теҥыз ӱмбач ошкылшо Иисусым ужмекышт, тунемшыж-влак шинчаланна коеш шоненыт да кычкыраш тӱҥалыныт.

⁵⁰ Чыланат Тудым ужыныт да моткоч лӱдыныт, но Иисус тунамак нунын дене мутланаш тӱҥалын да каласен: «Чот шогыза, ида лӱд, тиде Мый улам».

⁵¹ Тудо нунын деке пушыш шинчын, мардеж чарнен. Тунемшыж-влак ӧрын-лӱдын шогеныт.

⁵² Нуно але кинде дене лиймымат умылен огытыл. Нунын шӱмышт кӱэмалтше улмаш.

⁵³ Вес веке вончымеке, нуно Геннисарет кундемыш шуыныт да серыш лектыныт.

⁵⁴ Пуш гыч волен гына шуктеныт, тусо калык Иисусым пален

⁵⁵ да тиде кундем мучко куржтал савырнен. Кушто улмыж нерген колмеке, черле-влакым тушко вакшышеш нумал кондаш тӱҥалыныт.

⁵⁶ Кушко гына Тудо миен, – олашке, ялышке але илемышке, – черле-влакым уремыш нумал луктыныт да кеч Тудын вургем урвалтыж деке тӱкнаш черле-влаклан эрыкым пуаш Иисус деч йодыныт. Тудын деке тӱкнышӧ-влак чылан паремыныт.