Мк 5 - У Сугынь

5 ГЛАВА 1-20 Осал шӱлышаным паремдымаш. 21-43 Ӱдырым ылыжтымаш да вӱр йогымо черан ӱдырамашым паремдымаш.

¹ Нуно теҥызын вес серышкыже, Гадара кундемыш, миеныт.

² Иисусын пуш гыч волымекыже, осал шӱлыш кучыман пӧръеҥ Тудын ваштареш шӱгарла гыч тунамак лектын.

³ Тиде еҥ шӱгар-влакыште илен. Тудым нигӧ шинчырленат кертын огыл.

⁴ Кунар гана тудым кидге-йолге шинчырленыт гынат, тудо эреак шинчырым кӱрыштын, кӱртньӧ кепшылым шалатылын. Нигӧ тудым лыпландарен кертын огыл.

⁵ Йӱдшӧ-кечыже тудо шӱгарлаште да курыклаште лийын, кычкырен да шкенжым кӱэш кырен.

⁶ Иисусым тора гыч ужынат, куржын миен, Тудын ончылан вуйым савен сукен

⁷ да виян кычкыралын: «Иисус, Кӱшнысӧ Юмын Эргыже, Тыйын мый денем мо пашат? Юмын ончылно сӧрвален йодам, мыйым ит орландаре!»

⁸ Вет Иисус каласен: «Осал шӱлыш, тиде айдеме кӧргӧ гыч лек!»

⁹ Вара йодын: «Тыйын лӱмет кузе?» Тудо вашештен: «Легион мыйын лӱмем. Ме шукын улына».

¹⁰ Тиде кундем гыч нуным поктен колташ огыл манын, тудо Иисусым чот сӧрвален.

¹¹ Тушто, курык воктене, кугу сӧсна кӱтӱ коштын.

¹² Осал шӱлыш-влак Иисус деч йодыныт: «Мемнам сӧсна кӱтӱшкӧ колто, нунын кӧргыш пураш эрыкым пу».

¹³ Иисус нунылан тунамак эрыкым пуэн. Осал шӱлыш-влак лектыныт да сӧсна кӧргыш пуреныт. Уло кӱтӱ, кок тӱжем наре сӧсна, тура сер гыч теҥызыш керылтын да пурен каен.

¹⁴ Кӱтӱчӧ-влак куржыныт да тидын нерген олаште, яллаште каласкаленыт. Мо лиймым ончаш еҥ-влак миеныт.

¹⁵ Иисус деке мийымекышт, ия легион кучем гыч лекше еҥым ужыныт, тудо вургеман да яндар уш-акылан шинчен. Нуно моткоч лӱдыныт.

¹⁶ Ужшо-влак тиде еҥ да сӧсна-влак дене мо лийме нерген нунылан каласкаленыт.

¹⁷ Еҥ-влак Иисусым шке кундемышт гыч каяш сӧрвалаш тӱҥалыныт.

¹⁸ Кунам Иисус пушыш шинчын, ия кучем гыч лекше еҥ Тудын пелен лияш йодын.

¹⁹ Иисус келшен огыл, каласен: «Мӧҥгышкет кае, да мом тыланет Господь ыштен, кузе тыйым чаманен, мӧҥгысет-влаклан ойло».

²⁰ Тиде еҥ каен да тудын дене Иисус мом ыштыме нерген Декаполис кундемыште каласкалаш тӱҥалын. Тудын ойлымыжо чыламат ӧрыктарен.

²¹ Иисус, пушыш шинчын, мӧҥгеш вес могырыш вончымеке, йырже шуко калык погынен. Тудо теҥыз серыште лийын.

²² Теве тушко синагогын Иаир лӱман ик вуйлатышыже миен. Иисусым ужмеке, Тудын йол воктекыже кумык возын

²³ да чот сӧрвален: «Мыйын ӱдырем колаш кия. Утаралтше, илыше кодшо манын, тудын деке миен, кидетым ӱмбакыже пыште!»

²⁴ Иисус тудын дене пырля каен. Иисус почеш моткоч шуко калык тарванен. Чылан Тудым шыгыремденыт.

²⁵ Калык тӱшкаште латкок ий вӱр йогымо чер дене орланыше ӱдырамаш лийын.

²⁶ Тудо шуко эмлызе дене йӧсым чытен эмлалтын, тидлан чыла погыжым пытарен, да нимогай пайдам налын огыл, утларак веле начарештын.

²⁷ Тудо Иисус нерген колын, калык кокла гыч Тудын деке шеҥгечше миен, вургемжым тӱкалтен.

²⁸ «Тудын вургемышкыже тӱкнем веле гынат, утаралтам», – шонен ӱдырамаш.

²⁹ Тунамак вӱр йогымыжо чарнен. Капыштыже чер пытымым тудо шижын.

³⁰ Иисус кӧргыж гыч вий лекмым вигак шижын. Тудо калык коклаште савырнен да йодын: «Кӧ Мыйын вургемышкем тӱкныш?»

³¹ Тунемшыж-влак Тудлан каласеныт: «Тыйым тынар калык шыгыремда, а Тый кӧ тӱкнымӧ нерген йодат?»

³² Тидым ыштышым ужаш манын, Иисус йыр ончалын.

³³ Лӱдмыжлан кӧра чытырыше ӱдырамаш, шкеж дене мо лиймым пален, Тудын деке миен, кумык возын да чыла чыным ойлен.

³⁴ Иисус тудлан каласен: «Ӱдырем, тыйым ӱшанымашет утарен! Тыныслык дене кай да таза лий».

³⁵ Иисус але ойленат пытарен огыл, синагог вуйлатышын пӧртшӧ гыч уверым конденыт: «Тыйын ӱдырет колен, мом эше Туныктышым азапландарет?»

³⁶ Иисус нине мутым колын да Иаирлан каласен: «Ит лӱд, ӱшане гына!»

³⁷ Шкеж дене пырля Петрым, Иаковым да тудын Иоанн шольыжым гына налын. Молылан иктыланат почеш мияш кӱштен огыл.

³⁸ Синагог вуйлатышын пӧртышкыжӧ миен шумеке, йӱк-йӱаным колын, мӱгырен шортшо-влакым ужын.

³⁹ Иисус пӧртыш пурен да каласен: «Те молан йӱкланеда да шортыда? Ӱдыр колен огыл, тудо мала».

⁴⁰ Тудым воштылыныт. Но Иисус чылаштымат поктен луктын. А Шкеже ӱдырын ачажым, аважым да пеленже лийше-влакым налын, ӱдыр кийыме пӧлемыш пурен.

⁴¹ Йочан кидшым кучен, Иисус тудлан каласен: «Талифа куми!» Тидыже «Ӱдыр, тылат ойлем: кынел» манме лиеш.

⁴² Ӱдыр тунамак кынелын да кошташ тӱҥалын. Тудлан латкок ий наре лийын. Чылан моткочак ӧрыныт.

⁴³ Мо лийме нерген нигӧлан каласкалаш огыл манын, Иисус чоткыдын кӱштен. А ӱдырлан кочкаш пуаш шӱден.